ટ્રમ્પ સરકારે H- 1B  વિઝા ફી વધારીને હવે અન્ય ફેરફારો કર્યા

Last Updated on 01/10/2025 by Sampurna Samachar

આ પ્રક્રિયા ફેબ્રુઆરી ૨૦૨૬માં લાગુ થશે

હોવર્ડ લુટનિકે વર્તમાન વિઝા પ્રક્રિયાને સંપૂર્ણપણે ખોટી ગણાવી

(સંપૂર્ણ સમાચાર સેવા)

અમેરિકામાં ટ્રમ્પ સરકારે H- 1B  વિઝાની ફી અનેકગણી વધારીને ૧,૦૦,૦૦૦ અમેરિકી ડોલર કરી દીધી છે. ત્યારે અમેરિકાના વાણિજ્ય મંત્રી હોવર્ડ લુટનિકે H- 1B  વિઝા નિયમો વિશે એક મોટી વાત કહી છે. લુટનિકે જણાવ્યું છે કે ફેબ્રુઆરી ૨૦૨૬ પહેલાં H- 1B  વિઝા પ્રક્રિયામાં ઘણા ફેરફારો થશે.

હોવર્ડ લુટનિકે વર્તમાન વિઝા પ્રક્રિયાને સંપૂર્ણપણે ખોટી ગણાવી છે. તેમણે ઓછા ખર્ચે આવતા ટેક્નિકલ કન્સલ્ટન્ટ્સને અમેરિકામાં પ્રવેશવાની અને તેમના પરિવારોને સાથે લાવવાની પરવાનગી સામે પણ વાંધો ઉઠાવ્યો છે. લુટનિકે મીડિયાને જણાવ્યું કે, ‘આ પ્રક્રિયા ફેબ્રુઆરી ૨૦૨૬માં લાગુ થશે.

ભારતીય પ્રોફેશનલ્સ H- 1B  વિઝા દ્વારા અમેરિકામાં કામ કરી શકે

લુટનિકે સંકેત આપ્યા છે કે અમેરિકી સરકાર H- 1B  વિઝા હેઠળની લોટરી સિસ્ટમને સમાપ્ત કરી શકે છે. લોટરી સિસ્ટમની ટીકા કરતા લુટનિકે સવાલના અંદાજમાં કહ્યું કે, શું કોઈ દેશે લોટરી દ્વારા કુશળ કામદારોને પોતાના દેશમાં લાવવા જોઈએ? તેમણે કહ્યું કે H- 1B  વિઝા લોટરી સિસ્ટમને સુધારવી જોઈએ અને અમેરિકાએ નોકરીઓ ફક્ત સૌથી કુશળ લોકોને જ આપવી જોઈએ.

મંત્રી લુટનિકે કહ્યું, ‘કંપનીઓએ એવા ટેક્નિકલ કન્સલ્ટન્ટ્સ અને ટ્રેઈનીને રાખવાનો વિચાર છોડી દેવો જોઈએ જેઓ ઓછા ખર્ચે આવતા હોય. આ વિશે મારો મત પાકો છે. મને લાગે છે કે ડોનાલ્ડ ટ્રમ્પ આ મુદ્દાઓ પર મારી સાથે છે. મારું માનવું છે કે ઓછા ખર્ચે આવતા ટેક્નિકલ કન્સલ્ટન્ટ્સ આ દેશમાં આવે અને તેમના પરિવારોને પણ લાવે, તે મને બિલકુલ ખોટું લાગે છે અને હું તેને યોગ્ય માનતો નથી.‘

નોંધનીય છે કે, H- 1B  વિઝાની વધેલી ફીની ભારતીયો પર મોટી અસર થશે. ૐ-૧મ્ વિઝા પ્રક્રિયા ૧૯૯૦માં શરૂ કરવામાં આવી હતી. આ વિઝા સિસ્ટમ વિશ્વભરના એવા પ્રોફેશનલ્સ માટે ખૂબ જ લોકપ્રિય છે જેઓ અમેરિકામાં પોતાનું કરિયર બનાવવા માંગે છે. હવે જ્યારે અમેરિકી સરકાર નિયમોમાં ફેરફાર કરી રહી છે, ત્યારે તેની અસર ભારતીય પ્રોફેશનલ્સ પર પણ પડશે. મોટી સંખ્યામાં ભારતીય પ્રોફેશનલ્સ H- 1B  વિઝા દ્વારા અમેરિકામાં કામ કરી શકે છે.