Last Updated on by Sampurna Samachar
ટ્રમ્પે જાપાન સાથે કરેલી ઐતિહાસિક વેપાર ડીલ વિશે જાણો
જાપાન હવે અમેરિકામાં $ ૫૫૦ બિલિયનનુ કરશે રોકાણ
(સંપૂર્ણ સમાચાર સેવા)
અમેરિકાના રાષ્ટ્રપતિ ડોનાલ્ડ ટ્રમ્પે જાપાન સાથે વેપાર ડીલની જાહેરાત કરી છે, જેને તેઓ અત્યાર સુધીનો સૌથી મોટી ટ્રેડ ડીલ કહી રહ્યા છે. આ કરારથી બંને દેશો વચ્ચેના જૂના વેપાર તણાવનો અંત આવ્યો છે. જાપાન હવે અમેરિકામાં $ ૫૫૦ બિલિયન (લગભગ ૫૫,૦૦૦ કરોડ ડોલર) નું રોકાણ કરશે, જેનાથી લાખો નોકરીઓ સર્જાશે અને આર્થિક પરિવર્તન આવશે તેવી અપેક્ષા છે. પરંતુ આ કરાર પછી ભારત અને વિશ્વ પર શું અસર પડશે ?
એક અહેવાલ મુજબ, રાષ્ટ્રપતિ ડોનાલ્ડ ટ્રમ્પે જાપાન સાથે લાંબા સમયથી ચાલી રહેલી વાતચીતનો અંત લાવીને આખરે સાથે કામ કરવા સંમતિ આપી અને બંને દેશોએ વેપાર ડીલ કરી. થોડા દિવસો પહેલા સુધી, કોઈ કરાર પર પહોંચવું અને સાથે વેપાર કરવો અશક્ય લાગતું હતું. આનાથી એવી આશા પણ જાગી છે કે આગામી દિવસોમાં, અમેરિકા ભારત સાથે પણ આવી જ ડીલ કરી શકે છે. હાલમાં અમેરિકા અને ભારત ઘણા વેપાર મુદ્દાઓ ઉકેલવામાં વ્યસ્ત છે.
રોકાણ અમેરિકા માટે ગેમ-ચેન્જર બની શકે
ટ્રમ્પે જાપાન સાથેની ડીલ વિશે તેમના સોશિયલ મીડિયા પ્લેટફોર્મ ટ્રૂથ સોશિયલ પર લખ્યું કે અમે જાપાન સાથે અત્યાર સુધીનો સૌથી મોટી ડીલ કરી છે. આ ડીલમાં, જાપાનથી અમેરિકા આવતા માલ પર ૧૫% ટેરિફ (કર) લગાવવામાં આવશે. બદલામાં, જાપાન કાર, ટ્રક, ચોખા અને અન્ય કૃષિ ઉત્પાદનો જેવા અમેરિકન માલ માટે તેનું બજાર ખોલશે.
ટ્રમ્પનો દાવો છે કે આ સોદાથી અમેરિકાને ૯૦% નફો મળશે અને લાખો નોકરીઓનું સર્જન થશે. જાપાનનું $ ૫૫૦ બિલિયનનું રોકાણ અમેરિકા માટે ગેમ-ચેન્જર બની શકે છે. ગમે તે હોય, અમેરિકામાં આજકાલ પરિસ્થિતિ સારી નથી.
અગાઉ અમેરિકા અને જાપાન વચ્ચે વેપારને લઈને ઘણો તણાવ હતો. ટ્રમ્પે જૂનમાં કહ્યું હતું કે, જાપાનીઓ ખૂબ જ કઠોર છે. જાપાન તેના બજારમાં અમેરિકન ચોખા અને કારને ઓછી જગ્યા આપતું હતું, જેનાથી ટ્રમ્પ નારાજ થયા હતા.
ગયા વર્ષે જાપાને માત્ર ૧૬,૭૦૭ અમેરિકન કાર અને ચોખા ખરીદ્યા હતા જેની કિંમત $ ૨૯૮ મિલિયન હતી. પરંતુ લાંબી વાટાઘાટો અને અમેરિકન ટ્રેઝરી સેક્રેટરી સ્કોટ બેસન્ટની જાપાનના વડા પ્રધાન શિગેરુ ઇશિબા સાથેની બેઠક બાદ, આ સોદો અંતિમ સ્વરૂપ પામ્યો. ટ્રમ્પે તેને બંને દેશો વચ્ચેના સંબંધો માટે ઉત્તેજક સમય ગણાવ્યો.
