Last Updated on by Sampurna Samachar
ગ્રામીણોએ બંને નેતાને જોતા દંગ થઇ ગયા ને કારને ઘેરી લીધી
મહિલા નેતાએ પોતાને ફસાવાઇ હોવાનો આરોપ લગાવ્યો
(સંપૂર્ણ સમાચાર સેવા)
પશ્ચિમ બંગાળના જલપાઈગુડીમાં મોડી રાતે કારમાં બે અલગ અલગ રાજનીતિક પાર્ટીના નેતાઓના દારૂ પાર્ટીથી વિવાદ છેડાયો છે. મીડિયા રિપોર્ટ મુજબ ગામના લોકોએ TMC અને ભાજપના નેતાઓને એક સૂમસામ જંગલમાં ઊભેલી એક કારમાં સાથે દારૂ પીતા પકડ્યા હતા. આ ઘટના અપલચંદ જંગલ પાસે ઘટી.
સ્થાનિકોએ જ્યારે વિસ્તારમાં એક ખાનગી કારને અસામાન્ય રીતે લાંબા સમય સુધી ઊભેલી જોઈ તો શંકા ગઈ. ભીડ ભેગી થઈ અને તેમાં બેઠેલા લોકોને બહાર નીકળવા જણાવ્યું. તો ભાજપ મહિલા મોરચાની જલપાઈગુડી જિલ્લા અધ્યક્ષ દીપા બનિક અધિકારી એક TMC નેતાની ગાડીમાં બેઠેલા જોઈને લોકો દંગ રહી ગયા.
સ્થાનિક રાજનીતિક નેતૃત્વનું શરમજનક પ્રતિબિંબ
અત્રે જણાવવાનું કે બાદમાં જાણવા મળ્યું કે TMC ના પંચાયત સમિતિના અધ્યક્ષ અને જિલ્લા સ્તરના નેતા પંચાનન રોય, દીપા બનિક અધિકારી અને તેમના ડ્રાઈવર સાથે દારૂ પાર્ટીનું આયોજન કરી રહ્યા હતા. ગુસ્સે ભરાયેલા ગ્રામીણોએ કાર ઘેરી લીધી અને વિરોધ કર્યો તથા સમગ્ર ઘટનાક્રમનો વીડિયો બનાવી લીધો. ફૂટેજમાં અધિકારી કારની પાછળની સીટ પર બેઠેલા જણાય છે. સ્થાનિક લોકો દ્વારા ટોકવામાં આવતા તેઓ એક દારૂ ભરેલો પ્લાસ્ટિકનો ગ્લાસ આગળની સીટ પર સરકાવી દે છે.
કારમાં એક અન્ય વ્યક્તિ પણ દેખાય છે જે ડ્રાઈવર હોવાનું કહેવાય છે. જેવો કેમેરા તેના પર આવે છે કે તે જલદી બારી ઉપર કરી દે છે. થોડીવાર બાદ અધિકારી ગાડીમાંથી ઉતરીને જતા રહે છે. રોય અને તેમના ડ્રાઈવરને ગ્રામીણોએ થોડીવાર સુધી બંધક બનાવી રાખ્યા અને ત્યારબાદ છોડી દીધા. આ ઘર્ષણની ટીકા થઈ છે. ખાસ કરીને ડાબેરીઓએ તેને સ્થાનિક રાજનીતિક નેતૃત્વનું શરમજનક પ્રતિબિંબ જણાવ્યું છે.
આ વિવાદ પર પ્રતિક્રિયા આપતા દીપા બનિક અધિકારીએ કહ્યું કે તેમને ખોટી રીતે ફસાવવામાં આવ્યા છે અને દાવો કર્યો કે આ ઘટના એક રાજકીય કાવતરાનો ભાગ હતી. હંગામો છતાં TMC અને ભાજપ બંનેએ અધિકૃત નિવેદન આપવાથી અંતર જાળવ્યું છે. અપલચંદ ગ્રામ પ્રધાન અને બંને દળોના જિલ્લા નેતાઓ પણ ચૂપ છે.
