Last Updated on by Sampurna Samachar
ટીમમાં પ્રથમ સ્પિનર તરીકે રવિન્દ્ર જાડેજાનું સ્થાન લગભગ નિશ્ચિત
કરુણ નાયર અને સાઈ સુદર્શન વચ્ચે સ્પર્ધા
(સંપૂર્ણ સમાચાર સેવા)
૨૦ જૂનથી ભારતીય ટીમ ઇંગ્લેન્ડ સામે પાંચ મેચની ટેસ્ટ શ્રેણી રમશે. ગૌતમ ગંભીરના કોચિંગ હેઠળ આ યુવા ટીમ નવા વર્લ્ડ ટેસ્ટ ચેમ્પિયનશિપ ૨૦૨૫-૨૭ ચક્રની મજબૂત શરૂઆત કરવા માંગે છે. ૧૮ સભ્યોની ટીમમાં ઘણા પ્રતિભાશાળી ખેલાડીઓનો સમાવેશ થાય છે, પરંતુ ઇંગ્લેન્ડની પરિસ્થિતિઓ અને ટીમ સંયોજનને ધ્યાનમાં રાખીને કેટલાક ખેલાડીઓને પ્લેઇંગ ઇલેવનમાંથી બહાર રાખવા પડી શકે છે. ત્યારે એ ૩ ખેલાડીઓ વિશે જાણીએ જેમનું ઇંગ્લેન્ડમાં રમવું મુશ્કેલ લાગે છે.
ઘરેલુ ક્રિકેટમાં અને ભારત છ માટે સતત સારું પ્રદર્શન કરનાર અભિમન્યુ ઈશ્વરન, ટેસ્ટ ટીમમાં સ્થાન મેળવવા છતાં ફરી એકવાર પ્લેઇંગ ઇલેવનમાંથી બહાર થઈ શકે છે. તાજેતરમાં, તેણે ઈંગ્લેન્ડ લાયન્સ સામે ૮૦ રનની ઇનિંગ રમી, જે ઈન્ડિયા એ માટે તેની સાતમી અડધી સદી હતી.
આ ખેલાડી પ્લેઇંગ ઇલેવનમાંથી બહાર થઈ શકે
ટીમના ટોપ ઓર્ડરમાં, યશસ્વી જયસ્વાલ અને કેએલ રાહુલ પ્રથમ બે ઓપનિંગ સ્લોટમાં લગભગ નિશ્ચિત છે. નંબર ૩ માટે કરુણ નાયર અને સાઈ સુદર્શન વચ્ચે સ્પર્ધા છે, જ્યારે કેપ્ટન શુભમન ગિલ નંબર ૪ પર રમશે. આ સ્થિતિમાં, ઈશ્વરન માટે કોઈ સ્લોટ ઉપલબ્ધ હોય તેવું લાગતું નથી.
કુલદીપ યાદવ : ચાઇનામેન સ્પિનર કુલદીપ યાદવ જેણે ૧૩ ટેસ્ટમાં ૫૬ વિકેટ લીધી છે, તે ઇંગ્લેન્ડની સીમિંગ સ્થિતિમાં પ્લેઇંગ ઇલેવનમાંથી બહાર થઈ શકે છે. ટીમમાં પ્રથમ સ્પિનર તરીકે રવિન્દ્ર જાડેજાનું સ્થાન લગભગ નિશ્ચિત છે.
જો જાડેજાને આરામ આપવામાં આવે છે, તો ભારત વોશિંગ્ટન સુંદરને પ્રાથમિકતા આપી શકે છે, જે એક સારો ઓલરાઉન્ડ વિકલ્પ છે. ઇતિહાસ દર્શાવે છે કે દક્ષિણ આફ્રિકા, ઇંગ્લેન્ડ, ન્યુઝીલેન્ડ, ઓસ્ટ્રેલિયામાં ભારત સામાન્ય રીતે ફક્ત એક જ સ્પિનરને મેદાનમાં ઉતારે છે, જેના કારણે કુલદીપની તક ઓછી છે.
ધ્રુવ જુરેલ : યુવા વિકેટકીપર-બેટ્સમેન ધ્રુવ જુરેલ જેણે ઇંગ્લેન્ડ લાયન્સ સામે શાનદાર પ્રદર્શન કર્યું (૯૪ અને અણનમ ૫૩), તેને આ પ્રવાસમાં બેકઅપ કીપર તરીકે સામેલ કરવામાં આવ્યો છે. ઈજામાંથી વાપસી કરી રહેલો ઋષભ પંત ટીમનો ઉપ-કપ્તાન છે અને ૫મા નંબર પર રમશે. પંતની ગેરહાજરીમાં ભારત કેએલ રાહુલને વિકેટકીપિંગની જવાબદારીઓ પણ સોંપી શકે છે.
આ ઉપરાંત, શાર્દુલ ઠાકુર અથવા નીતિશ રેડ્ડી જેવા ઓલરાઉન્ડરોને ટીમમાં નીચલા ક્રમને મજબૂત કરવા માટે પસંદગી મળવાની શક્યતા છે, જે નિષ્ણાત બેટ્સમેન તરીકે જુરેલની તકોને પણ મર્યાદિત કરી શકે છે.
ઈંગ્લેન્ડ પ્રવાસ માટે ૧૮ સભ્યોની ભારતીય ટીમ : શુભમન ગિલ (કેપ્ટન), યશસ્વી જયસ્વાલ, કેએલ રાહુલ, સાઈ સુદર્શન, ઋષભ પંત (વાઈસ-કેપ્ટન/વિકેટકીપર), નીતિશ કુમાર રેડ્ડી, રવીન્દ્ર જાડેજા, ધ્રુવ જુરેલ (વિકેટકીપર), અભિમન્યુ ઈશ્વરન, શાર્દુલ ઠાકુર, જસપ્રીત બુમરાહ, મોહમ્મદ સિરાજ, પ્રસિદ્ધ કૃષ્ણા, કરુણ નાયર, વોશિંગ્ટન સુંદર, આકાશ દીપ, અર્શદીપ સિંહ, કુલદીપ યાદવ.
