Last Updated on by Sampurna Samachar
થાઈલેન્ડ સમલૈગિક લગ્નને મંજુરી આપનાર સમગ્ર એશિયામાં ત્રીજો દેશ બન્યો
(સંપૂર્ણ સમાચાર સેવા)
ભારતીયોના ફેવરિટ ટ્રાવેલ ડેસ્ટિનેશન વાળા દેશ થાઈલેન્ડમાં સમલૈંગિક લગ્નને કાયદાકીય માન્યતા મળી ગઈ છે. આ અંગે દેશમાં એક કાયદો પણ બનાવવામાં આવ્યો છે, જે અમલમાં આવી ગયો છે. આ સાથે જ થાઈલેન્ડ દક્ષિણ પૂર્વ એશિયાનો પ્રથમ દેશ અને સમગ્ર એશિયામાં ત્રીજો દેશ બન્યો છે કે જેણે સમલૈંગિક લગ્નને કાયદાકીય માન્યતા આપી છે.
તમને જણાવી દઈએ કે, અગાઉ એશિયામાં નેપાળ અને તાઈવાન સમલૈંગિક લગ્નને માન્યતા આપી ચૂક્યા છે અને હવે થાઈલેન્ડમાં પણ મેરેજ ઈક્વાલિટી એક્ટને કાયદાકીય માન્યતા મળી ચૂકી છે. દેશમાં આજથી સમલૈંગિક લગ્ન અમલમાં આવી ગયા છે અને કાયદાના અમલીકરણના પહેલા જ દિવસે ૩૦૦ LGBTQ નવયુગલે પ્રભુતામાં પગલાં માંડ્યા છે. થાઈલેન્ડમાં આજથી LGBTQ સમુદાયના લોકોને સમલૈંગિક લગ્ન કરવાનો કાનૂની દરજ્જજો મળી ગયો છે.
નોંધનીય છે કે, લગભગ ૨૦ વર્ષથી થાઈલેન્ડમાં LGBTQ સમુદાય સમલૈંગિક લગ્નને કાયદાકીય માન્યતા આપવાની માગ કરી રહ્યો હતો. જેને હવે માન્યતા મળી ગઈ છે. હવે થાઈલેન્ડમાં ૧૮ વર્ષ કે તેથી વધુ ઉંમરની કોઈપણ વ્યક્તિ સમલૈંગિક લગ્ન કરી શકે છે.
થાઈલેન્ડની રાજધાની બેંગકોકના એક શોપિંગ મોલમાં એક ભવ્ય સમારોહનું આયોજન કરવામાં આવ્યું છે, જેમાં લગભગ ૩૦૦ યુગલોએ સમલૈંગિક લગ્ન માટે પોતાની ઔપચારિકતાઓ પૂર્ણ કરી. લગ્ન બાદ યુગલોને તમામ અધિકારો આપવામાં આવશે. થાઈલેન્ડની સંસદના બંને ગૃહ દ્વારા મેરેજ ઈક્વાલિટી એક્ટ પસાર કરવામાં આવ્યો છે. આ ઉપરાંત થાઈલેન્ડની સંસદે સિવિલ અને કોમર્શિયલ કોડમાં સુધારો પણ કર્યો છે.
થાઈલેન્ડની સંસદે સિવિલ અને કોમર્શિયલ કોડમાં પતિ અને પત્નીના સ્થાને ઈન્ડિવિજ્યુઅલ અને મેરેજ પાર્ટનર કરી દીધું છે. કાયદામાં સુધારો કરીને LGBTQ યુગલોને એ તમામ અધિકારો આપવામાં આવ્યા છે, જે સામાન્ય લગ્નમાં પતિ-પત્નીને આપવામાં આવે છે. આમાં સમલૈંગિક યુગલોને સમાન કાનૂની, નાણાકીય અને મેડિકલમાં તમામ અધિકારો આપવામાં આવ્યા છે. આ ઉપરાંત સંપત્તિમાં જોઈન્ટ એક્સેસનો અધિકાર પણ આપવામાં આવ્યો છે.
આજે અમેરિકા, જર્મની, ફ્રાન્સ અને બેલ્જિયમ સહિત વિશ્વના ૩૧ દેશોમાં સમલૈંગિક લગ્નને કાયદાકીય માન્યતા આપવામાં આવી છે. ઘણા દેશો એવા છે જ્યાં સમલૈંગિક લગ્ન પર સંપૂર્ણપણે પ્રતિબંધ છે. તેમાં યમન, ઈરાન, બ્રુનેઈ, નાઈજીરીયા, કતાર સહિત વિશ્વના ૧૩ દેશો સામેલ છે. અહીં સુધી કે આ દેશોમાં સમલૈંગિક લગ્ન કરનારાઓ માટે સજાની પણ જોગવાઈ છે.
આ માટે મૃત્યુદંડની સજા આપવામાં આવે છે. બીજી તરફ ભારતની સુપ્રીમ કોર્ટે સમલૈંગિક લગ્નને કાયદાકીય માન્યતા આપવાનો ઈનકાર કર્યો છે. દુનિયામાં કેટલાક દેશો એવા છે જ્યાં સમલૈંગિક લગ્નને ગુનો માનવામાં નથી આવતો, પરંતુ તેને કાયદાકીય માન્યતા પણ આપવામાં નથી આવી. આ દેશોમાં ભારત, ચીન, રશિયા, બ્રિટન અને શ્રીલંકા સામેલ છે.
