Last Updated on by Sampurna Samachar
ભાજપના ધારાસભ્ય કલ્પેશ પરમારનો ભત્રીજો જુગારધામ ચલાવતા ઝડપાયો
પોલીસે કુલ ૧૬ જુગારીઓને રંગેહાથ ઝડપી પાડ્યા
(સંપૂર્ણ સમાચાર સેવા)
ગુજરાતમાં આગામી સ્થાનિક સ્વરાજની ચૂંટણીઓને લઈ તમામ રાજકીય પક્ષો સક્રિય થયા છે અને માહોલ ગરમાયો છે, ત્યારે ખેડા જિલ્લાના માતર તાલુકામાંથી એક ચોંકાવનારા સમાચાર સામે આવ્યા છે. માતરના ભારતીય જનતા પાર્ટીના ધારાસભ્ય કલ્પેશ પરમારના જ ગામ ભલાડામાં સ્ટેટ વિજિલન્સની ટીમે ત્રાટકીને ચાલતા જુગારધામનો પર્દાફાશ કર્યો છે. આ દરોડામાં ધારાસભ્યનો સગો ભત્રીજો મુખ્ય આરોપી તરીકે ઝડપાતા રાજકીય આલમમાં ભારે ખળભળાટ મચી ગયો છે.
મળતી માહિતી અનુસાર, માતર તાલુકાના ભલાડા ગામે હરસિધ્ધિ ફળિયા નજીક આવેલા એક ખુલ્લા ખેતરમાં મોટા પાયે જુગાર રમાતો હોવાની ચોક્કસ બાતમી સ્ટેટ વિજિલન્સ પોલીસને મળી હતી. બાતમીના આધારે પોલીસે દરોડો પાડતા જુગારીઓમાં નાસભાગ મચી ગઈ હતી. પોલીસે કોર્ડન કરીને સ્થળ પરથી કુલ ૧૬ જુગારીઓને રંગેહાથ ઝડપી પાડ્યા હતા. આ અડ્ડો રાજેશ ઉર્ફે લાલો ગુલાબ પરમાર દ્વારા ચલાવવામાં આવતો હતો, જે બહારથી લોકોને બોલાવીને જુગાર રમાડતો હતો.
કુલ ૨૨.૩૬ લાખ રૂપિયાનો મુદ્દામાલ જપ્ત કર્યો
આ મામલે સૌથી ચોંકાવનારી બાબત એ સામે આવી છે કે, પકડાયેલ મુખ્ય આરોપી રાજેશ પરમાર સ્થાનિક ધારાસભ્ય કલ્પેશ પરમારનો સગો ભત્રીજાે છે. ધારાસભ્યના પોતાના જ ગામમાં અને તેમના નજીકના સંબંધી દ્વારા જ ગેરકાયદે પ્રવૃત્તિ ચલાવવામાં આવતી હોવાની વાત બહાર આવતા સ્થાનિક રાજકારણમાં જાણે ભૂકંપ આવ્યો હોય તેવી સ્થિતિ સર્જાઈ છે.
ચૂંટણીના ટાણે જ શાસક પક્ષના ધારાસભ્યના પરિવારજનની આવી સંડોવણી સામે આવતા વિરોધ પક્ષો અને સ્થાનિક લોકોમાં વિવિધ તર્કવિતર્ક થઈ રહ્યા છે. સ્ટેટ વિજિલન્સની ટીમે આ કાર્યવાહી દરમિયાન સ્થળ પરથી કુલ ૨૨.૩૬ લાખ રૂપિયાનો મુદ્દામાલ જપ્ત કર્યો છે. જેમાં ૩.૨૦ લાખ રૂપિયા રોકડા, મોબાઈલ ફોન અને અન્ય વાહનોનો સમાવેશ થાય છે. પોલીસે તમામ ૧૬ આરોપીઓની અટકાયત કરી છે અને આ મામલે લીંબાસી પોલીસ મથકે કાયદેસરનો ગુનો નોંધી આગળની તપાસ અને કાર્યવાહી હાથ ધરી છે.
એક તરફ જ્યારે રાજ્ય સરકાર કાયદો અને વ્યવસ્થાની કડક અમલવારીની વાતો કરી રહી છે, ત્યારે સત્તાધારી પક્ષના જ ધારાસભ્યના ભત્રીજા સામેની આ કાર્યવાહી ચર્ચાનો વિષય બની છે. સ્થાનિક સ્વરાજની ચૂંટણી પહેલા જ આ ઘટનાને પગલે માતરના રાજકારણમાં ભારે ગરમાવો જોવા મળી રહ્યો છે.
