Last Updated on by Sampurna Samachar
ગ્રેનાઈટ પાવડરની આડમાં છુપાવેલો હજારો વિદેશી દારૂ
કુલ ૧.૦૯ કરોડ રૂપિયાથી વધુનો મુદ્દામાલ જપ્ત કરાયો
(સંપૂર્ણ સમાચાર સેવા)
ગુજરાતમાં સ્ટેટ મોનિટરિંગ સેલ દ્વારા મહેસાણા બાયપાસ હાઈવે પર દરોડો પાડતાં લાખોની કિંમતનો વિદેશી દારૂ ઝડપી પાડી મોટી સફળતા મેળવી છે. બાતમીના આધારે પાડવામાં આવેલા દરોડામાં પોલીસે આંતરરાજ્ય દારૂની હેરાફેરીના નેટવર્કનો પર્દાફાશ કર્યો છે. આ કાર્યવાહીમાં SMC દ્વારા કુલ ૧.૦૯ કરોડ રૂપિયાથી વધુનો મુદ્દામાલ જપ્ત કરવામાં આવ્યો છે અને એક આરોપીની ધરપકડ કરવામાં આવી છે, જ્યારે મુખ્ય સપ્લાયર સહિત ચાર શખસોને વોન્ટેડ જાહેર કરવામાં આવ્યા છે.
મળતી માહિતી અનુસાર, સ્ટેટ મોનિટરિંગ સેલની ટીમે મહેસાણા-અમદાવાદ બાયપાસ હાઈવે પર આવેલા ઉપાસના સર્કલ નજીક અંડર બ્રિજ પાસે વોચ ગોઠવી હતી. તપાસ દરમિયાન એક શંકાસ્પદ ટ્રકને અટકાવી તેની તલાશી લેતા, તેમાંથી ગ્રેનાઈટ પાવડરની આડમાં છુપાવેલી ભારતીય બનાવટના વિદેશી દારૂની કુલ ૨૫,૭૪૭ બોટલો મળી આવી હતી. જપ્ત કરાયેલા આ દારૂના જથ્થાની બજાર કિંમત અંદાજે ૯૪,૬૦,૧૫૬/- આંકવામાં આવી છે.
દારૂ કેસમાં કુલ ૦૪ વ્યક્તિઓને વોન્ટેડ જાહેર કર્યાં
પોલીસે ઘટનાસ્થળેથી ટ્રક ડ્રાઈવર ભજનલાલ રત્નારામ બિશ્નોઈની ધરપકડ કરી છે. પોલીસ તપાસમાં બહાર આવ્યું છે કે દારૂનો આ જથ્થો છુપાવવા માટે ૨૦૦ નંગ ગ્રેનાઈટ પાવડરની બેગ અને તાડપત્રીનો ઉપયોગ કરવામાં આવ્યો હતો. પોલીસે દારૂ, ટ્રક , મોબાઈલ ફોન અને અન્ય સાધન-સામગ્રી મળી કુલ ૧,૦૯,૮૭,૫૩૬ નો મુદ્દામાલ કબજે કરી મહેસાણા રૂરલ પોલીસ સ્ટેશનમાં સોંપ્યો છે.
આ કેસમાં પોલીસે દારૂ સપ્લાય કરનાર રાજસ્થાનના જાલોરના હિતેશભાઈ સુથાર, ટ્રક માલિક, પાયલોટિંગ કરનાર સ્વિફ્ટ કારચાલક અને દારૂ મંગાવનાર રીસીવર સહિત કુલ ૦૪ વ્યક્તિઓને વોન્ટેડ જાહેર કર્યાં છે. મહેસાણા રૂરલ પોલીસ દ્વારા ગુજરાત પ્રોહિબિશન એક્ટની વિવિધ કલમો હેઠળ ગુનો નોંધી આગળની તપાસ હાથ ધરવામાં આવી છે.
