Last Updated on by Sampurna Samachar
વડોદરામાં ફેસબુક મારફતે શિક્ષિકાને હેરાનગતિ કરનાર યુવક ઝડપાયો
વર્ષ ૨૦૨૩માં સ્મિત આર.જે. નામની બીજી આઈડી પરથી ફરી મેસેજ કરાતા મહિલાએ તેને પણ અવગણી બ્લોક કરી હતી
(સંપૂર્ણ સમાચાર સેવા)
વડોદરા શહેરમાં સોશિયલ મીડિયા મારફતે મહિલાને સતત હેરાનગતિ કરવાનો ચોંકાવનારો બનાવ સામે આવ્યો છે. મૂળ કોલકત્તાની રહેવાસી અને નવાપુરા વિસ્તારમાં રહેતી ૩૦ વર્ષની શિક્ષિકાએ આ અંગે પોલીસમાં ફરિયાદ નોંધાવી છે.
ફરિયાદ મુજબ, વર્ષ ૨૦૨૨ દરમિયાન હિરેન રાજપુત નામની ફેસબુક મેસેન્જર આઈડી પરથી મહિલાને કેમ છો? એવો મેસેજ આવ્યો હતો. મહિલાએ જવાબમાં મેસેજ ન કરવા જણાવ્યું અને તે આઈડી બ્લોક કરી દીધી હતી. ત્યારબાદ વર્ષ ૨૦૨૩માં સ્મિત આર.જે. નામની બીજી આઈડી પરથી ફરી મેસેજ કરાતા મહિલાએ તેને પણ અવગણી બ્લોક કરી હતી.
મહિલામાં ભય અને દહેશત ફેલાવી
છતાંય વર્ષ ૨૦૨૫માં ફરી હિરેન રાજપુત નામથી મેસેજ કરી યુવકે તમે મને ગમો છો, કેમ આટલો ઘમંડ રાખો છો? જેવા મેસેજ કરીને હેરાનગતિ શરૂ રાખી હતી. વર્ષ ૨૦૨૬ના ફેબ્રુઆરીમાં માય વેલેન્ટાઈન જેવી કોમેન્ટ કરતા મહિલાએ પોલીસ ફરિયાદ કરવાની ચેતવણી આપી હતી.
પરંતુ આરોપી અહીં અટક્યો નહીં. વારંવાર નવા ફેસબુક એકાઉન્ટ બનાવી મહિલાનો સંપર્ક કરવાનો પ્રયાસ કરતો રહ્યો. એટલું જ નહીં, તેના સોશિયલ મીડિયા પર નજર રાખવી, ઘર નજીક આવી ધમકી આપવા જેવી હરકતો કરી મહિલામાં ભય અને દહેશત ફેલાવી હતી.
આખરે પીડિતાએ નવાપુરા પોલીસનો સંપર્ક કર્યો હતો. તપાસ દરમિયાન આરોપીનું નામ હિરેનકુમાર રમેશભાઈ રાજપુત (રહે-દર્શનમ સોસાયટી, તરસાલી) હોવાનું સામે આવ્યું હતું. પોલીસે આરોપી સામે બીએનએસની કલમ ૭૮ અને ૩૫૧(૨) હેઠળ ગુનો નોંધી તેની અટકાયત કરી આગળની કાર્યવાહી હાથ ધરી છે.
