Last Updated on by Sampurna Samachar
ભાવનગરની સસ્પેન્ડેડ મહિલા કોન્સ્ટેબલે ઝેરી દવા ગટગટાવી
DySPએ તેનું ઘર બરબાદ કરી દીધાનો આરોપ લગાવ્યો
(સંપૂર્ણ સમાચાર સેવા)
ભાવનગરની સસ્પેન્ડેડ મહિલા કોન્સ્ટેબલ નયના બારૈયાએ DySP રીમા ઝાલા પર સનસનીખેજ આરોપ કરતો વીડિયો ઉતારી આપઘાતનો પ્રયત્ન કરતાં હડકંપ મચ્યો છે. બોટાદના સાળંગપુર રોડ પર આવેલા એક ગેસ્ટહાઉસમાં નયનાએ ઝેરી દવા ગટગટાવી છે, બોટાદની ખાનગી હોસ્પિટલમાં તેની સારવાર ચાલી રહી છે, હાલત હાલ ગંભીર છે.
નયનાએ આરોપ લગાવ્યો છે કે DySP રીમા ઝાલાએ તેનું ઘર બરબાદ કરી દીધું છે, જ્યારે તેની ધરપકડ થઈ ત્યારે કોઈ મહિલા પોલીસ સાથે રાખી ન હતી ઉપરાંત ૩૫૦ કિલોમીટર સુધી વૉશરૂમ પણ જવા દીધી ન હતી.
એટ્રોસિટી કેસમાં ફરાર આરોપીને પોતાના ઘરમાં આશરો આપ્યો
ઉલ્લેખનીય છે કે સસ્પેન્ડેડ મહિલા કોન્સ્ટેબલે એટ્રોસિટી કેસમાં ફરાર એક આરોપીને પોતાના ઘરમાં આશરો આપ્યો હતો. આરોપી પાર્થ દિનેશ ધાંધલ્યાને શોધવા ભાવનગર પોલીસ દિવસ રાત એક કર્યા હતા પણ આખરે તે તત્કાલીન પોલીસ કોન્સ્ટેબલ નયના નાનજીભાઈ બારૈયાના ઘરે તેને આશરો મળ્યો હતો. આરોપીને આશરો આપતા તેને ફરજ પરથી સસ્પેન્ડ કરી દેવામાં આવી હતી. જે બાદ તેને જેલ થઈ હતી. હમણાં જ તેને જામીન મળ્યા હતા.
