Last Updated on by Sampurna Samachar
બાળકોને ફક્ત એક ટકા મિલકત વારસામાં આપશે બિલ ગેટ્સ
બાળકો તેમના પોતાના દમ પર ઊભા થાય તેવી ધારણાં
(સંપૂર્ણ સમાચાર સેવા)
બિલ ગેટ્સ તેમના બાળકોને તેમની મિલકતમાંથી એક ટકા કરતાં પણ ઓછી સંપત્તિ આપવાના હોવાની માહિતી મળી છે. તેમની ભૂતપૂર્વ પત્ની મેલિન્ડા ફ્રેન્ચ સાથે તેમને ત્રણ બાળકો છે. જેમનુ નામ રોરી, જેનિફર અને ફીબી ગેટ્સ છે. આ બાળકોના પિતા વિશ્વના સૌથી ધનવાન વ્યક્તિઓમાંના એક છે. માઇક્રોસોફ્ટ જેવું એમ્પાયર ઊભું કરનાર વ્યક્તિના બાળકોની લાઇફસ્ટાઇલ કેવી હશે, એ દરેકને ખબર છે.
જોકે આ બાળકો પોતાની પિતાની સંપત્તિમાં ભાગ ન લઈ શકે તેવું જણાય છે. બિલ ગેટ્સે તાજેતરમાં ‘ફિગરીંગ આઉટ વિથ રાજ શમાની‘ પોડકાસ્ટમાં હાજરી આપી હતી. આ પોડકાસ્ટમાં તેમણે પોતાની ધારણા શેર કરી કે તેમના બાળકો તેમના પોતાના દમ પર ઊભા થાય.
માઇક્રોસોફ્ટ માટે કામ કરવા માટે જબરજસ્તી નહીં કરું
બિલ ગેટ્સે તાજેતરેથી કહ્યું છે કે તેમની લેગસીને જીવતી રાખવી અને મિલકત સાથે કેવી રીતે વ્યવહાર કરવો તે દરેક વ્યક્તિ પોતાની માન્યતાઓ અને મૂલ્યોના આધારે નક્કી કરે છે. તેમણે ઉમેર્યું કે, “દરેક વ્યક્તિને તેમની મિલકત અંગે ર્નિણય કરવાનો હક છે. મારા બાળકોને સારું ઉછેર અને ઉતમ ભણતર મળ્યું છે. પરંતુ તેમને મારી મિલકતમાંથી એક ટકા કરતાં ઓછી મિલકત આપવામાં આવશે.
હું કોઈ રાજાશાહી ચલાવતો નથી. તેમને માઇક્રોસોફ્ટ માટે કામ કરવા માટે જબરજસ્તી નહીં કરું. તેઓ પોતાની મહેનત અને દમ પર પોતાને સાબિત કરી શકે એ માટે હું તેમને તક આપવા માગું છું.” દરેક ઇન્ડસ્ટ્રીમાં નેપોટિઝમનો પ્રશ્ન હોય છે. અમુક લોકો માનતા હોય છે કે પૈસાદાર વ્યક્તિનો છોકરો છે એટલે તેને કંઈ કરવામાં રહેવું નથી.
પરંતુ બિલ ગેટ્સ એકદમ વિપરીત વિચારધારા ધરાવે છે. તેમણે કહ્યું, “હું નથી ઇચ્છતો કે મારા બાળકો મારી છત્રછાયામાં રહે. હું નથી ઇચ્છતો કે લોકો કહે કે તેઓ ધનવાન પિતાના સંતાન છે. તેઓ પોતાના દમ પર કામ કરી જાત મહેનતથી ઊભા રહેવું જોઈએ.”
બિલ ગેટ્સ કહે છે કે દરેક વ્યક્તિએ પોતાના બાળકોને સફળ થવા માટે સમાન તક આપવી જોઈએ. બ્લૂમબર્ગના બિલિયોનેર ઇન્ડેક્સ મુજબ બિલ ગેટ્સ પાસે ૧૫૫ બિલિયન અમેરિકન ડોલરની મિલકત છે. આના એક ટકા એટલે કે ૧.૫૫ બિલિયન ડોલર થાય છે. જો આ મિલકત ત્રણ ભાઈ-બહેન વચ્ચે વહેંચવામાં આવે તો પણ તેઓ ધનવાન લોકોના ટોચના એક ટકામાં ગણી શકાય છે.
બિલ ગેટ્સ એકમાત્ર બિલિયોનેર નથી, જેઓ બાળકો માટે પૂરી મિલકત છોડી જતા નથી. અગાઉ, સ્ટીવ જોબ્સે તેમના બાળકો માટે ચોક્કસ સંપત્તિ છોડી હતી, જ્યારે બાકીની પૂંજી ફિલાન્થ્રોપી માટે આપી દેવામાં આવી હતી.
એમેઝોનના માલિક જેફ બેઝોસ પણ તેમની બાળકો માટે સંપૂર્ણ મિલકત છોડી જતા નથી. સ્ટીવ જોબ્સનું મૃત્યુ ૨૦૧૧માં થયું હતું ત્યારે તેમની પાસે ૭ બિલિયન અમેરિકન ડોલરની મિલકત હતી. તેમની વિધવા લોરેન પોવેલ જોબ્સે ૨૦૨૦માં ન્યુ યોર્ક ટાઈમ્સને કહ્યું હતું કે તેમની બાળકોને આ પૈસા માટે એક બિલિયન પણ મળ્યાં નથી.
