Last Updated on by Sampurna Samachar
BCCI સેક્રેટરીએ આપ્યું મોટું નિવેદન
આ કરાર ૨૦૨૬ સુધીનો હતો
(સંપૂર્ણ સમાચાર સેવા)
ક્રિકેટ એશિયા કપ ૨૦૨૫ શરૂ થવામાં લગભગ ૧૫ દિવસ બાકી છે, આ પહેલા ભારતીય ક્રિકેટ ટીમના ટાઇટલ સ્પોન્સર ડ્રીમ૧૧ સાથે BCCI નો કરાર સમાપ્ત થઈ ગયો છે ‘ઓનલાઈન ગેમિંગ (પ્રમોશન અને નિયમન) બિલ ૨૦૨૫‘ લાગુ થયા પછી આ પગલું લેવામાં આવ્યું હતું. BCCI સચિવ દેવજીત સૈકિયાએ આ માહિતી આપી. BCCI સચિવ દેવજીત સૈકિયાએ કહ્યું, “ઓનલાઈન ગેમિંગ પ્રમોશન અને નિયમન બિલ, ૨૦૨૫ લાગુ થયા પછી, BCCI અને ડ્રીમ૧૧ તેમનો કરાર સમાપ્ત કરી રહ્યા છે. BCCI ખાતરી કરશે કે ભવિષ્યમાં આવા કોઈપણ સંગઠન સાથે તેનો કોઈ સંબંધ ન રહે.”
૨૦૨૩ માં ડ્રીમ ૧૧ અને BCCI વચ્ચે ૩૫૮ કરોડ રૂપિયાનો ૩ વર્ષનો કરાર થયો હતો. આ પછી, તમે ભારતીય સિનિયર પુરુષ ટીમ, મહિલા અને અંડર-૧૯ ટીમની જર્સી પર આ કંપનીનું બ્રાન્ડિંગ જોતા હતા. આ કરાર ૨૦૨૬ સુધીનો હતો. પરંતુ નવો કાયદો આવ્યા પછી આ કરાર સમય પહેલા જ સમાપ્ત થઈ રહ્યો છે.
૩ વર્ષની જેલ અને ૧ કરોડ રૂપિયાની જોગવાઈ
હવે સૌથી મોટો પ્રશ્ન એ છે કે શું ભારતીય ક્રિકેટ ટીમ ટાઇટલ સ્પોન્સર વગર એશિયા કપમાં રમશે કે તે પહેલાં BCCI કોઈ ટૂંકા ગાળાનો કરાર કરશે. કારણ કે BCCI ઉતાવળમાં કોઈ લાંબા ગાળાનો કરાર કરવા માંગશે નહીં. એશિયા કપ ૯ સપ્ટેમ્બરથી શરૂ થઈ રહ્યો છે, ભારતનો પહેલો મેચ ૧૦ સપ્ટેમ્બરે સાથે છે. આ પછી, ભારતનો આગામી મેચ ૧૪ સપ્ટેમ્બરે પાકિસ્તાન સાથે છે. ગ્રુપ સ્ટેજમાં ભારતનો છેલ્લો મેચ ૧૯ સપ્ટેમ્બરે ઓમાન સાથે હશે.
લોકસભામાં કાયદો આવ્યા પછી જ ઓનલાઈન ગેમિંગ કંપનીઓએ તેમનો મની ગેમિંગ વ્યવસાય બંધ કરી દીધો હતો. હવે આવા મની ગેમિંગ ચલાવનારાઓ સામે કડક કાર્યવાહી કરવામાં આવશે, ૩ વર્ષની જેલ અને ૧ કરોડ રૂપિયાની જોગવાઈ છે. આ પ્લેટફોર્મની જાહેરાત અથવા પ્રચાર કરનારાઓને ૨ વર્ષની જેલ અથવા ૫૦ લાખ રૂપિયાનો દંડ પણ થઈ શકે છે. હવે સોશિયલ ગેમ્સને પ્રોત્સાહન આપવામાં આવશે જેથી ખેલાડીઓ જવાબદારીપૂર્વક અને સુરક્ષિત રીતે રમી શકે. હવે ઈ-સ્પોર્ટ્સને એક રમત તરીકે કાનૂની માન્યતા મળશે, જે અત્યાર સુધી નહોતી.
