Last Updated on by Sampurna Samachar
ઓનલાઇન અને ઓફલાઇન બેંકમાં ફોર્મ ભરી થશે રજીસ્ટ્રેશન
યાત્રા ૩ જુલાઈથી શરૂ થશે અને ૯ ઓગસ્ટ સુધી ચાલુ રહેશે
(સંપૂર્ણ સમાચાર સેવા)
અમરનાથ યાત્રા ૨૦૨૫ માટે નોંધણી ઓનલાઇન અને ઓફલાઇન શરૂ થઈ ગઈ છે. ત્યારે યાત્રામાં જોડાવા માટે ભક્તો જલ્દીથી નોંધણી કરાવી રહ્યા છે. નોંધણી બાદ મુસાફરી પરમિટ મેળવવા માટે આરોગ્ય પ્રમાણપત્ર પણ ફરજિયાત રહેશે. આ યાત્રા ૩ જુલાઈથી શરૂ થશે અને ૯ ઓગસ્ટ સુધી ચાલુ રહેશે.
ત્યારે આ પવિત્ર યાત્રામાં ભાગ લેવા માટે નોંધણી જરૂરી છે કારણ કે તેના વિના તમારી યાત્રા શરૂ થઈ શકતી નથી. નોંધણી માટે અરજી ઓફલાઇન અને ઓનલાઈન બંને રીતે કરી શકાય છે. ઑફલાઇન અરજી માટે ફોર્મ કઈ બેંકોમાંથી મેળવી શકાય છે તે જાણો.
બાબા બરફાનીની યાત્રા માટે શ્રધ્ધાળુઓ ખૂબ ઉત્સાહિત
અમરનાથ યાત્રા માટે નોંધણી ૧૫ એપ્રિલથી શરૂ થઈ ગઈ છે. જમ્મુ અને કાશ્મીરની ૨૦ બેંક શાખાઓમાં અમરનાથ યાત્રા માટે ઓફલાઇન નોંધણીની પ્રક્રિયા પણ શરૂ થઈ ગઈ છે. નોંધણીના નિયમો અંગે અમરનાથ શ્રાઇન બોર્ડે કહ્યું, ‘આ યાત્રા માટે ૧૩ થી ૭૦ વર્ષની વયના લોકો નોંધણી કરાવી શકે છે.’
અમરનાથ યાત્રા માટે નોંધણી કરાવવા આવેલા યાત્રાળુઓએ બમ બમ ભોલેના નારા લગાવ્યા. આ માટે લાંબી કતારો લાગે છે. મુસાફરો પોતાનું રજીસ્ટ્રેશન કરાવવા માટે એક કલાક રાહ જોઈ રહ્યા છે. મુસાફરો કહે છે કે અમે બાબા બરફાનીની યાત્રા માટે નોંધણી કરાવવા આવ્યા છીએ, જેના માટે અમે ખૂબ જ ઉત્સાહિત છીએ, કારણ કે આ વખતે બાબાએ અમને બોલાવ્યા છે.
જે લોકો ઓનલાઈન અરજી કરવા માંગતા નથી, તેમના માટે બેંકોમાં ફોર્મ પણ પૂરા પાડવામાં આવી રહ્યા છે. લોકો જે શાખાઓમાંથી ફોર્મ મેળવી શકે છે તેમાં પંજાબ નેશનલ બેંક, જમ્મુ અને કાશ્મીર બેંક, યસ બેંક અને સ્ટેટ બેંક ઓફ ઈન્ડિયાનો સમાવેશ થાય છે. ફોર્મમાં જરૂરી માહિતી ભર્યા પછી, તેને સબમિટ કરવાનુ રહેશે.
ઓનલાઈન નોંધણી માટે સત્તાવાર વેબસાઇટ પર જઈ શકો છો. અહીં, ટોપના મેનુમાં ઓનલાઈન સર્વિસ વિકલ્પ પર ક્લિક કરો. આ પછી ટ્રાવેલ પરમિટ રજીસ્ટ્રેશનનો વિકલ્પ દેખાશે. આ પછી, કેટલીક શરતો માટે તમારી પરવાનગી માંગવામાં આવશે. પછી રજિસ્ટર પર ક્લિક કરો, ત્યારબાદ નામ, મુસાફરીની તારીખ, મોબાઇલ નંબર, આધાર નંબર પૂછવામાં આવશે. બધી માહિતી ભર્યા પછી, આરોગ્ય પ્રમાણપત્રની નકલ ફોટો સાથે સબમિટ કરો. તમારા મોબાઇલ નંબર પર OTP મોકલવામાં આવશે, જેની ચકાસણી પછી ચુકવણી લિંક પ્રાપ્ત થશે. ફી જમા કરાવ્યા પછી તમને મુસાફરી પરમિટ મળશે.
