Last Updated on by Sampurna Samachar
દર્દીના સારવાર મુદ્દે ઉશ્કેરાયેલો હતો પરિવાર
હિંસક ઘટનાના લાઈવ કેમેરા ફૂટેજ વાયરલ
(સંપૂર્ણ સમાચાર સેવા)
રાજકોટ સિવિલ હોસ્પિટલના ન્યૂરો સર્જરી વિભાગમાં ફરજ બજાવતા તબીબ પર હુમલાનો બનાવ સામે આવ્યો છે. વાત કરીએ તો ડૉ. પાર્થ પંડ્યા પર દર્દીના પરિવારે આડેધડ હુમલો કર્યો હતો. કેમેરા ફૂટેજમાં સ્પષ્ટ જોઈ શકાય છે કે, ઉશ્કેરાયેલા પરિવારજનોએ ડોક્ટરને ઢોર માર માર્યો હતો. હોસ્પિટલના સુરક્ષાકર્મીઓ વચ્ચે પડે તે પહેલા જ હુમલાખોરોએ ડોક્ટરને ગંભીર ઈજાઓ પહોંચાડી હતી.
આ હિંસક ઘટનાના લાઈવ કેમેરા ફૂટેજ સોશિયલ મીડિયા પર વાયરલ થતા તબીબી જગતમાં ઘેરા પ્રત્યાઘાતો પડ્યા છે. પોતાની સુરક્ષાને લઈને ચિંતિત સિવિલના તબીબો હવે હડતાળ પર જવાની તૈયારી કરી રહ્યા છે.
ઘટનાએ સુરક્ષા વ્યવસ્થા સામે સવાલો ઉભા કર્યા
તબીબોની માંગ છે કે આરોપીઓ વિરુદ્ધ કડક કાયદાકીય કાર્યવાહી કરવામાં આવે અને હોસ્પિટલમાં ડોક્ટરોની સુરક્ષા માટે પૂરતો પોલીસ બંદોબસ્ત ગોઠવવામાં આવે. ઘટનાની જાણ થતા જ પોલીસ કાફલો સિવિલ હોસ્પિટલ પહોંચ્યો હતો અને ફૂટેજના આધારે હુમલાખોરોની ઓળખ કરવાની તજવીજ હાથ ધરી છે.
સરકારી હોસ્પિટલમાં વારંવાર તબીબો પર થતા હુમલાની ઘટનાઓએ સુરક્ષા વ્યવસ્થા સામે મોટા સવાલો ઉભા કર્યા છે. જો તબીબો હડતાળ પર જશે તો ગરીબ દર્દીઓની સારવાર ખોરવાય તેવી શક્યતા છે.
