Last Updated on by Sampurna Samachar
આરોપી ચોરી , લૂંટ , ચેન સ્નેચિંગ જેવા ગુનામાં છે સંડોવાયેલો
ઘટના બાદ યુવતી અને બહેનપણીએ નોંધાવી હતી ફરિયાદ
(સંપૂર્ણ સમાચાર સેવા)
પુણેના સ્વારગેટ બસ સ્ટેશનમાં એક ૨૬ વર્ષીય યુવતી સાથે દુષ્કર્મની ઘટના સામે આવી હતી. હવે પોલીસે આ મામલે આરોપીને દબોચી લીધો છે. પોલીસે પુણે શહેરના શિરુર તહસીલથી આરોપી દત્તાત્રેય ગાડેને કસ્ટડીમાં લીધો હતો. મળતી માહિતી અનુસાર આરોપી પર પહેલેથી જ ચોરી, ચેન સ્નેચિંગ અને લૂંટના કેસ નોંધાયેલા છે. એક કેસમાં તેની ધરપકડ પણ થઈ ચૂકી છે અને વર્ષ ૨૦૧૯થી તે જામીન પર બહાર છે.
પોલીસે આરોપી દત્તાત્રેય ગાડેની મધરાતે અટકાયત કરી અને તેને પકડવા માટે રાજ્યની અનેક જગ્યાઓ પર પોલીસફોર્સની તૈનાત કરાઈ હતી. આરોપીને પકડવા માટે પોલીસની ૮ ટીમોએ સર્ચ અભિયાન ચલાવતા સ્નીફર ડોગ્સ અને ડ્રોન્સ પણ તૈનાત કર્યા હતા. અત્રે જણાવવાનું કે ૩૭ વર્ષનો આરોપી દત્તાત્રેય રામદાસ ગાડે એક હિસ્ટ્રીશીટર છે. તેના પર વર્ષ ૨૦૨૪માં પણ ચોરીનો કેસ નોંધાયો હતો જેના કારણે તેને પોલીસ સ્ટેશન બોલાવવામાં આવ્યો હતો.
યુવતીને પહેલા દીદી કહીને સંબોધ્યુ
આ ઘટના પુણેમાં કામ કરતી એક યુવતી પોતાના ગામ જવા માટે સ્વારગેટ બસ સ્ટેન્ડમાં ઊભી હતી. અહીંથી સમગ્ર રાજ્ય માટે બસો જાય છે. યુવતી પોતાના ગામ ફટલણ જનારી બસ (BUS) ના સ્ટેન્ડ તરફ ઊભી હતી કે ત્યારે જ આરોપી ત્યાં આવ્યો અને તેને દીદી કહીને સંબોધન કરી પૂછ્યું કે તેને ક્યાં જવું છે. યુવતીએ જેવું જગ્યાનું નામ બતાવ્યું કે તેણે ગેરમાર્ગે દોરતા કહ્યું કે ત્યાંની બસ બીજી બાજુ ઊભી છે અને તેને બસ સ્ટેન્ડની બીજી બાજુ લઈ ગયો.
આ આરોપી પીડિત મહિલાને ત્યાં એક બસમાં લઈ ગયો અને પહેલા તો તેની મહિલા સાથે રકઝક થઈ પરંતુ આરોપીએ તેને સમજાવતા કહ્યું કે આ જ બસ છે. બસની અંદર લાઈટો બંધ હતી. યુવતી જેવી બસમાં ચડી કે આરોપી પણ તેની પાછળ બસમાં ચડ્યો અને પછી તેની સાથે દુષ્કર્મ કરીને ફરાર થઈ ગયો. યુવતીએ તેની બહેનપણીને આ ઘટના અંગે જાણ કરી અને ત્યારબાદ પોલીસ ફરિયાદ નોંધાવી હતી.
