Last Updated on by Sampurna Samachar
મોદી સરકારની કેબિનેટ બેઠકમાં ખેડૂતોના હિતમાં નિર્ણય
ભારતે પોતાનુ અંતરિક્ષ મથક બનાવવા તરફ ભર્યુ પગલુ
(સંપૂર્ણ સમાચાર સેવા)
મોદી સરકારની કેબિનેટ બેઠકમાં ત્રણ મહત્ત્વપૂર્ણ ર્નિણયો લેવામાં આવ્યા છે. જેમાંથી એક ખેડૂતોના હિતમાં ર્નિણય લેવામાં આવ્યો છે. જેમાં કેબિનેટ બેઠકમાં ૨૪,૦૦૦ કરોડ રૂપિયાના વાર્ષિક ખર્ચ સાથે PM ધન-ધાન્ય કૃષિ યોજનાને મંજૂરી આપી છે. જેમાં ૩૬ યોજનાઓનો સમાવેશ કરવામાં આવશે. તેમજ સરકારે ગ્રીન એનર્જીમાં રોકાણ માટે NLCIL ને ૭,૦૦૦ કરોડ રૂપિયા મંજૂર કર્યા છે. આ ઉપરાંત શુભાંશુ શુક્લાના અંતરિક્ષ મિશન બાદ ભારતે પોતાનું અંતરિક્ષ મથક બનાવવા તરફ વધુ એક પગલું આગળ વધાર્યું છે.
કેન્દ્રીય બજેટ ૨૦૨૫-૨૬ માં, નાણામંત્રી ર્નિમલા સીતારમણે કૃષિ ક્ષેત્રને પ્રોત્સાહન આપવા માટે PM ધન-ધાન્ય કૃષિ યોજનાની જાહેરાત કરી હતી, જેને હવે મંત્રીમંડળની મંજૂરી મળી ગઈ છે. આ યોજના હેઠળ, કૃષિ જિલ્લાઓનો વિકાસ કરવામાં આવશે. આ યોજના ઓછી ઉત્પાદકતા, પાકનું ઓછું વાવેતર અને સરેરાશથી ઓછી લોન ઉપલબ્ધતા ધરાવતા ૧૦૦ જિલ્લાઓને લક્ષ્ય બનાવશે.
૨૦,૦૦૦ કરોડના ઇક્વિટી રોકાણને મંજૂરી
ભારતીય કૃષિને આધુનિક બનાવવા માટે બહુપક્ષીય અભિગમ સાથે આ યોજના તબક્કાવાર રીતે લાગુ કરવામાં આવશે. આ યોજના હેઠળ, પાક વૈવિધ્યકરણ, ટકાઉ અને આબોહવા-સ્થિતિસ્થાપક ખેતી પર ધ્યાન કેન્દ્રિત કરવામાં આવશે. આ ઉપરાંત, લણણી પછીની સંગ્રહ ક્ષમતા વધારવા અને ટેકનોલોજી સુધારવા પર પણ ભાર મૂકવામાં આવશે.
કેબિનેટે સૌર, પવન અને ગ્રીન હાઇડ્રોજન પ્રોજેક્ટ્સમાં રોકાણ વધારવા માટે NTPC ની પેટાકંપની NTPC ગ્રીન એનર્જી લિમિટેડમાં રૂ. ૨૦,૦૦૦ કરોડના ઇક્વિટી રોકાણને મંજૂરી આપી છે. અત્યાર સુધીમાં, NTPC એ NGEL માં રૂ. ૭,૫૦૦ કરોડનું રોકાણ કર્યું છે. ગ્રીન એનર્જી પોર્ટફોલિયોમાં હાલમાં ૬ GW કાર્યકારી ક્ષમતા અને ૨૬ GW બાંધકામ હેઠળની ક્ષમતાનો સમાવેશ થાય છે. ૨૦૩૨ સુધીમાં તેને ૬૦ GW સુધી પહોંચાડવાનું લક્ષ્ય છે.
આ અંગે અશ્વિની વૈષ્ણવેએ પણ સ્પષ્ટ કર્યું કે, કેબિનેટે NTPC અને NLC ને આ ભંડોળ એકત્ર કરવા માટે મંજૂરી આપી છે. સરકારે તેના ઉર્જા ક્ષેત્રને વિસ્તૃત કરવા માટે રૂ. ૭,૦૦૦ કરોડના પેકેજને મંજૂરી આપી છે. આ રોકાણ NLC ઇન્ડિયા રિન્યુએબલ્સ લિમિટેડ (NIRL ) ને ટેકો પૂરો પાડશે, જે નેવેલી લિગ્નાઇટ કોર્પોરેશન (NLC) ની સંપૂર્ણ માલિકીની શાખા છે. આ યોજના હેઠળ, રૂ. ૬,૨૬૩ કરોડની નવીનીકરણીય ઉર્જા સંપત્તિ NLC માંથી NIRL માં ટ્રાન્સફર કરવામાં આવશે.
મંત્રીમંડળની બેઠક બાદ કેન્દ્રીય મંત્રી અશ્વિની વૈષ્ણવે જણાવ્યું હતું કે, આજે કેન્દ્રીય મંત્રીમંડળે ISS (આંતરરાષ્ટ્રીય અંતરિક્ષ મથક) માંથી ગ્રુપ કેપ્ટન શુભાંશુ શુક્લાના પરત ફરવા અંગે ઠરાવ પસાર કર્યો છે. આ સમગ્ર દેશ માટે ગર્વ, ગૌરવ અને ખુશીનો પ્રસંગ છે. આજે મંત્રીમંડળ, દેશ સાથે મળીને ગ્રુપ કેપ્ટન શુભાંશુ શુક્લાને પૃથ્વી પર સફળ વાપસી બદલ અભિનંદન આપે છે. તેમણે આંતરરાષ્ટ્રીય અંતરિક્ષ મથક પર ૧૮ દિવસનું ઐતિહાસિક મિશન પૂર્ણ કર્યું છે.
આ ભારતના અંતરિક્ષ કાર્યક્રમમાં એક નવો અધ્યાય છે. તે આપણા અંતરિક્ષ કાર્યક્રમના ભવિષ્યની સુવર્ણ ઝલક આપે છે. મંત્રીમંડળ ISRO ના વૈજ્ઞાનિકો અને ઇજનેરોની સમગ્ર ટીમને આ ઐતિહાસિક સિદ્ધિ માટે અભિનંદન આપે છે.
