દેશમાં ગાળો બોલવામાં દિલ્હીના લોકો ટોપ પર

Last Updated on 15/07/2025 by Sampurna Samachar

જુઓ કયા રાજ્યમાં કેટલા ટકા લોકોની ભાષામાં ગાળો

પ્રોફેસર ડૉ. સુનિલ જગલા દ્વારા કરાયો સર્વે

(સંપૂર્ણ સમાચાર સેવા)

તમારી આસપાસ ઘણા લોકો એવા હશે, જે દરેક નાની વાત પર ગાળો બોલતા હોય છે. ભલે તેમનો હેતુ કોઈનું અપમાન કરવાનો ન હોય, પરંતુ તે તેમના વિચાર અને વર્તનને સ્પષ્ટપણે પ્રતિબિંબિત કરે છે. અપમાનજનક શબ્દ માનવામાં આવતી ગાળ હવે લોકોની વ્યવહારિક ભાષાનો એટલો બધો ભાગ બની ગયો છે કે, ન ઇચ્છવા છતાં પણ, માતા, બહેન અને પુત્રીના નામે ગાળો મોંમાંથી નીકળી જાય છે.

ચોંકાવનારી વાત એ છે કે, દુર્વ્યવહારમાં પુરુષો જ નહીં, કોલેજની છોકરીઓ અને મહિલાઓ પણ મોટી સંખ્યામાં શામેલ છે. સેલ્ફી વિથ ડોટર ફાઉન્ડેશનના સ્થાપક અને રોહતકની મહર્ષિ દયાનંદ યુનિવર્સિટીના પ્રોફેસર ડૉ. સુનિલ જગલાને આ અંગે એક સરવે કર્યો છે. આ સરવેમાં બહાર આવ્યું છે કે, ગાળો બોલનારા રાજ્યોમાં દિલ્હી ટોચ પર છે.

છોકરીઓ ગાળો બોલવામાં પાછળ નથી

દેશના તમામ રાજ્યોમાં ગાળોનો ઉપયોગ કરવામાં દિલ્હી ટોચ પર છે. સરવેના આંકડા દર્શાવે છે કે, દિલ્હીમાં ૮૦% લોકો ગાળો બોલે છે. તેવી જ રીતે, પંજાબ બીજા સ્થાને છે, જ્યાં ૭૮% લોકો દરેક નાની-નાની વાત પર લોકોની માતા, બહેન અને પુત્રીની ગાળો બોલતા હોય છે. ઉત્તર પ્રદેશમાં, ૭૪% લોકો લોકોની માતા અને બહેનને લઈને ગાળો બોલતા હોય છે, જ્યારે બિહાર ચોથા સ્થાને છે.

દિલ્હી-૮૦%

પંજાબ-૭૮%

ઉત્તર પ્રદેશ-૭૪%

બિહાર-૭૪%

રાજસ્થાન-૬૮%

હરિયાણા-૬૨%

મહારાષ્ટ્ર-૫૮%

ગુજરાત-૫૫%

મધ્યપ્રદેશ-૪૮%

ઉત્તરાખંડ-૪૫%

કાશ્મીર-૧૫%

ઉત્તર પૂર્વ અને અન્ય – ૨૦ થી ૩૦%

આ સરવેનું સૌથી ચોંકાવનારું પાસું એ છે કે, છોકરીઓ પણ છોકરાઓ સાથે ગાળો બોલવામાં પાછળ નથી. સરવેમાં સમાવિષ્ટ ૩૦% છોકરીઓ અને મહિલાઓ પણ ગોળો બોલે છે. શાળાઓ અને કોલેજોમાં પણ માતા, બહેન અને દીકરીના નામે ગાળો સામાન્ય બની ગઈ છે. આ સરવેમાં છેલ્લા ૧૧ વર્ષમાં વિવિધ રાજ્યોના ૭૦ હજાર લોકોને સામેલ કરવામાં આવ્યા છે, જેમાં યુવાનો, માતાપિતા, શિક્ષકો, પોલીસકર્મીઓ, ડોકટરો, વકીલો, ઉદ્યોગપતિઓ, પંચાયત સભ્યો, પ્રોફેસરો વગેરેનો સમાવેશ થાય છે.