Last Updated on by Sampurna Samachar
અબ્દુલ કલામે જેની કલ્પના કરી હતી એ ધ્રૂવાસ્ત્ર સૈન્યમાં જોડાશે
આ મિસાઈલ ખાસ કરીને લદ્દાખ જેવા ઊંચાઈવાળા પહાડી વિસ્તારોમાં ચીન અને પાકિસ્તાનના ટેન્કોનો કાળ સાબિત થશે.
(સંપૂર્ણ સમાચાર સેવા)
ભારતીય સેનાની તાકાતમાં ટૂંક સમયમાં જબરદસ્ત વધારો થવા જઈ રહ્યો છે. DRDO દ્વારા વિકસિત અને સંપૂર્ણપણે સ્વદેશી એવી એન્ટી-ટેન્ક ગાઈડેડ મિસાઈલ ધ્રુવાસ્ત્ર હવે સેનાના બેડામાં સામેલ થવા માટે તૈયાર છે. આ મિસાઈલ ખાસ કરીને લદ્દાખ જેવા ઊંચાઈવાળા પહાડી વિસ્તારોમાં ચીન અને પાકિસ્તાનના ટેન્કોનો કાળ સાબિત થશે.
ધ્રુવાસ્ત્ર એ પ્રખ્યાત નાગ મિસાઈલનું હવાઈ સંસ્કરણ છે. જેને હેલિકોપ્ટર પરથી લોન્ચ કરવામાં આવશે. તેની મુખ્ય વિશેષતાઓ નીચે મુજબ છે. એકવાર લક્ષ્ય નક્કી થયા પછી આ મિસાઈલ જાતે જ દુશ્મનના ટેન્કનો પીછો કરીને તેને નેસ્તનાબૂદ કરે છે. તે ફાયર એન્ડ ફરગેટ ટેક્નોલોજી ધરાવે છે. દુનિયાના આધુનિક ટેન્કોનું ઉપરનું પડ સૌથી નબળું હોય છે.
ધ્રુવાસ્ત્રની હાજરી ભારતીય વાયુસેના અને થલ સેનાને પહાડી યુદ્ધમાં અજેય બનાવશે.
ધ્રુવાસ્ત્ર હવામાં ઊંચાઈ પર જઈને સીધો ઉપરથી હુમલો કરે છે. ૪૩ કિલો વજનની આ મિસાઈલ ૮૦૦ મીમી જાડી સ્ટીલ પ્લેટને પણ આરપાર ચીરી નાખવાની ભારે મારક ક્ષમતા ધરાવે છે. તે ૭ કિલોમીટર દૂર બેઠેલા દુશ્મનને પણ સચોટ રીતે નિશાન બનાવી શકે છે.
આ મિસાઈલને હિન્દુસ્તાન એરોનોટિક્સ લિમિટેડ દ્વારા નિર્મિત રુદ્ર અને પ્રચંડ જેવા એટેક હેલિકોપ્ટર્સ પર તૈનાત કરવામાં આવશે. સરકાર દ્વારા તાજેતરમાં ૧૫૬ પ્રચંડ હેલિકોપ્ટરનો ઓર્ડર આપવામાં આવ્યો છે. જેમાં ધ્રુવાસ્ત્રની હાજરી ભારતીય વાયુસેના અને થલ સેનાને પહાડી યુદ્ધમાં અજેય બનાવશે.
સરકારે ૭૦૦ કરોડ રૂપિયાના ખર્ચે ૨૦૦ થી વધુ ધ્રુવાસ્ત્ર મિસાઈલોની ખરીદીને મંજૂરી આપી દીધી છે. ખાસ વાત એ છે કે, એક મિસાઈલની કિંમત ૧ કરોડથી પણ ઓછી હોવાનો અંદાજ છે.
આ સફળતા બાદ હવે ભારતને રશિયા કે યુરોપ પર ર્નિભર રહેવું નહીં પડે અને વિદેશી મુદ્રાની પણ બચત થશે.
ધ્રુવાસ્ત્રની સફળતા બાદ હવે DRDO SANT મિસાઈલ પર કામ કરી રહ્યું છે. તેની રેન્જ ધ્રુવાસ્ત્ર કરતા પણ વધુ હશે અને તે રડાર સેન્સરથી સજ્જ હશે, જે ભારતીય સરહદોને વધુ સુરક્ષિત બનાવશે.
