Last Updated on by Sampurna Samachar
રિઝર્વ ખેલાડીઓને પ્રત્યેક મેચના ૫ હજાર રૂપિયા મળશે
PCB અધિકારીઓને મળે છે લાખો રૂપિયાનો માસિક પગાર
(સંપૂર્ણ સમાચાર સેવા)
પાકિસ્તાન (PAKISTHAN) ક્રિકેટ બોર્ડ એક બાજુ ચેમ્પિયન્સ ટ્રોફીની સફળ મેજબાની બદલ પોતાની પીઠ થપથપાવી રહ્યું છે ત્યારે બીજી બાજુ તેની ખરાબ હાલતના લીરેલીરા ઉડી રહ્યા છે. PCB એ ચેમ્પિયન્સ ટ્રોફી ખતમ થયા બાદ ચોંકાવનારું પગલું ભર્યું છે. PCB એ ઘરેલુ ક્રિકેટમાં ખેલાડીઓની મેચ ફીમાં ધરખમ કાપ મૂક્યો છે.
પાકિસ્તાન ક્રિકેટ બોર્ડે આગામી નેશનલ ટી૨૦ ચેમ્પિયનશીપમાં ક્રિકેટરોની મેચ ફી એક લાખ રૂપિયા પ્રતિ મેચથી ઘટાડીને ૧૦ હજાર રૂપિયા પ્રતિ મેચ કરી છે. રિઝર્વ ખેલાડીઓને પ્રત્યેક મેચના ૫ હજાર રૂપિયા મળશે. આ ટુર્નામેન્ટ ૧૪ માર્ચથી શરૂ થઈ રહી છે. એટલું જ નહીં બોર્ડ ઘરેલુ ક્રિકેટના વિકાસ પર ખર્ચ ઓછો કરવા પર વિચાર કરી રહ્યું છે. મેચ ફીમાં કાપથી ખેલાડીઓની ચિંતા વધી ગઈ છે.
હવાઈ મુસાફરી પણ ઓછી કરાઈ
PCB ના ઘરેલુ ક્રિકેટના પ્રમુખ અબ્દુલ્લા ખુર્રમ નિયાઝી ખેલાડીઓની સુવિધાઓમાં કાપ મૂકી રહ્યા છે. સૂત્રોના જણાવ્યાં મુજબ પહેલા ખેલાડીઓને ફાઈવ સ્ટાર હોટલ અને ફોર સ્ટાર હોટલોમાં રખાતા હતા પરંતુ હવે તેમને સસ્તી હોટલની રજૂઆત થઈ રહી છે. હવાઈ મુસાફરી પણ ઓછી કરાઈ છે અને ફીસ પણ ઘટાડવામાં આવી છે.
એક અન્ય સૂત્રએ જણાવ્યું કે ગત સીઝનની બાકી ચૂકવણી હજુ સુધી ખેલાડીઓ અને એમ્પાયરોને કરાઈ નથી. PCB એ પૂર્વ ટેસ્ટ ક્રિકેટરો માટે વાર્ષિક પેન્શન વધારો પણ લાગૂ કર્યો નથી. જે બોર્ડની પોલીસી હેઠળ જરૂરી છે.
અત્રે જણાવવાનું કે PCB એ ચેમ્પિયન્સ ટ્રોફી અગાઉ લાહોર, કરાચી અને રાવલપિંડીના ક્રિકેટ સ્ટેડિયમને અપગ્રેડ કરવા ઉપર લગભગ ૧.૮ અબજ રૂપિયા ખર્ચો કર્યો છે. વિડંબણા એક બાજુ જ્યાં ખેલાડીઓની મેચ ફી ઘટાડવામાં આવી રહી છે ત્યાં PCB અધિકારીઓને લાખો રૂપિયાનો માસિક પગાર મળે છે. PCB ના પસંદગીકારો અને ટીમોના મેન્ટર્સને તગડી રકમ મળે છે. મેન્ટર્સ મિસ્બાહ ઉલ હક, વકાર યુનુસ, શોએબ મલિક, સરફરાઝ અહેમદ અને સકલિન મુશ્તાકને ૨ વર્ષના કરાર પર પ્રતિ માસ લગભગ ૫૦ લાખ રૂપિયાની ચૂકવણી થાય છે.
