Last Updated on by Sampurna Samachar
ડુપ્લિકેટ, મૃત અથવા અયોગ્ય મતદારોની ઓળખ કરાશે
SIR માટેનું શેડ્યૂલ યોગ્ય સમયે જાહેર કરાશે
(સંપૂર્ણ સમાચાર સેવા)
ચૂંટણીપંચે મતદાર યાદીના સ્પેશિયલ ઈન્ટેન્સિવ રિવિઝન (SIR) અંગે મહત્ત્વનો ર્નિણય લીધો છે. બિહારની જેમ હવે દેશભરમાં SIR ની પ્રક્રિયા શરૂ કરવામાં આવશે. ચૂંટણીપંચ અનુસાર, મતદાર યાદીઓની તટસ્થતા અને વિશ્વસનીયતા સુનિશ્ચિત કરવાની બંધારણીય જવાબદારી નિભાવવા માટે દેશભરમાં SIR શરૂ કરવામાં આવશે.
અહેવાલો અનુસાર, ચૂંટણી પંચે ૨૪મી જૂનના રોજ મતદાર યાદીઓના ખાસ સઘન સુધારા અંગેના આદેશમાં જણાવ્યું હતું કે, ચૂંટણીપંચ હવે મતદાર યાદીઓની અખંડિતતાને સુરક્ષિત રાખવા માટેના તેના બંધારણીય આદેશનું પાલન કરવા માટે દેશભરમાં ખાસ સઘન સુધારા શરૂ કરવાનો ર્નિણય લીધો છે. દેશના બાકીના ભાગોમાં SIR માટેનું શેડ્યૂલ યોગ્ય સમયે જાહેર કરાશે.
બિહારમાં ૭ લાખ ડુપ્લિકેટ એન્ટ્રીઓ મળી આવી
ચૂંટણીપંચ દ્વારા શરૂ કરાયેલી સ્પેશિયલ ઈન્ટેન્સિવ રિવિઝન પ્રક્રિયા હેઠળ, દેશભરમાં ડુપ્લિકેટ, મૃત અથવા અયોગ્ય મતદારોની ઓળખ કરવામાં આવશે અને મતદાર યાદીમાંથી તેમના નામ દૂર કરવામાં આવશે. ખાસ કરીને એવા મતદારોની ઓળખ કરવામાં આવી રહી છે જેઓ કાયમી અને વર્તમાન બંને સરનામાં પર નોંધાયેલા છે.
અહેવાલો અનુસાર, બિહારમાં SIR હેઠળ હાથ ધરવામાં આવેલી તપાસમાં ૧૮ લાખ મૃત મતદારો, ૨૬ લાખ મતદારો જેમણે પોતાની વિધાનસભા બેઠક બદલી છે અને ૭ લાખ ડુપ્લિકેટ એન્ટ્રીઓ મળી આવી હતી.
