Last Updated on by Sampurna Samachar
લો-ગાર્ડન ખાતે ૯૮ કરોડના ખર્ચે બનશે ઓવરબ્રિજ
પંચવટી જંકશન, ગીતા સર્કલથી સીએન વિદ્યાલય સુધી બનશે પુલ
(સંપૂર્ણ સમાચાર સેવા)
અમદાવાદમાં વધતી જતી ટ્રાફિક સમસ્યાને ધ્યાનમાં રાખીને AMC ઓવરબ્રિજ બનાવી રહ્યું છે. આ જ સંદર્ભમાં લો ગાર્ડનથી પંચવટી જંકશન, ગીતા સર્કલથી સીએન વિદ્યાલય સુધી ૭૮૦ મીટર લાંબો એલ-આકારનો ઓવરબ્રિજ બનાવવામાં આવી રહ્યો છે. આ પુલનું બાંધકામ ૯૮ કરોડના ખર્ચે શરૂ થઈ ગયું છે, જેમાં ત્રણ તબક્કામાં રૂટ ડાયવર્ઝનનું આયોજન કરવામાં આવ્યું છે.
ત્યારે આ પુલના બાંધકામના પગલે આંબાવાડીથી સીએન વિદ્યાલય સુધીનો રસ્તો બંધ કરવામાં આવ્યો છે. ગુજરાત એસટી બસો, ખાનગી ટ્રાવેલ, એએમટીએસ અને અન્ય ભારે વાહનોએ પાલડી બસ સ્ટેન્ડથી અંજલી ક્રોસ રોડ થઈને નહેરુ નગર થઈને મહાલક્ષ્મી સુધીનો વૈકલ્પિક માર્ગ અપનાવવો પડશે. પુલના નિર્માણ માટે રસ્તા પર ફૂટપાથ બનાવવામાં આવ્યા છે.
૧૭ મીટર પહોળો અત્યાધુનિક ટેકનોલોજીથી પુલ બનશે
બ્રિજ પ્રોજેક્ટ વિભાગના અધિકારીના જણાવ્યા અનુસાર, લો ગાર્ડનથી પંચવટી, આંબાવાડી સર્કલથી સીએન વિદ્યાલય સુધીનો આ પુલ દોઢ વર્ષમાં ૯૮.૧૮ કરોડના ખર્ચે પૂર્ણ થશે. એકવાર પુલ પૂર્ણ થઈ ગયા પછી, દરરોજ ૧,૫૦,૦૦૦ થી વધુ વાહનોને ટ્રાફિક જામમાંથી મુક્તિ મળશે.
આશરે ૬૯,૦૦૦ ટુ-વ્હીલર અને ૩૧,૦૦૦ ફોર-વ્હીલર આ માર્ગ પરથી પસાર થાય છે. એકવાર પુલ પૂર્ણ થઈ ગયા પછી, તેમને ટ્રાફિક સિગ્નલ પર રોકવાની ઝંઝટમાંથી મુક્તિ મળશે. વધુમાં, આશરે ૧૩,૦૦૦ રિક્ષાઓ પણ આ માર્ગ પરથી મુસાફરી કરે છે, જે રાહત આપે છે. આ પુલ ૧૭ મીટર પહોળો છે અને અત્યાધુનિક ટેકનોલોજીનો ઉપયોગ કરીને બનાવવામાં આવશે.
