Last Updated on by Sampurna Samachar
વેપારીને મોટા પાયે આર્થિક નુકસાન થયું
શોર્ટ સર્કિટના કારણે આગ લાગી હોવાની માહિતી
(સંપૂર્ણ સમાચાર સેવા)
વડોદરાના આજવા-વાઘોડિયા રિંગ રોડ વિસ્તારમાં એકાએક આગની ઘટના બનતા અફરાતફરી મચી ગઈ હતી. અહીં આવેલા એક સોફાના ગોડાઉનમાં ભીષણ આગ ફાટી નીકળી હતી. આગ એટલી વિકરાળ હતી કે જોતજોતામાં આખું ગોડાઉન લપેટમાં આવી ગયું હતું અને આકાશમાં ધુમાડાના કાળા ગોટેગોટા જોવા મળ્યા હતા.
માહિતી અનુસાર આજવા-વાઘોડિયા રિંગ રોડ પર આવેલા સોફા બનાવવાના એક ગોડાઉનમાંથી અચાનક ધુમાડો નીકળતો સ્થાનિકોના નજરે પડ્યો હતો. હજુ તો લોકો કંઈ સમજે તે પહેલા જ આગે રૌદ્ર સ્વરૂપ ધારણ કરી લીધું હતું. ગોડાઉનમાં સોફા બનાવવાનો કાચો માલ, લાકડું અને ફોમ જેવી જ્વલનશીલ વસ્તુઓ હોવાને કારણે આગ ઝડપથી ફેલાઈ હતી. આ દ્રશ્યો જોઈને આસપાસના રહીશો અને દુકાનદારોમાં ભયનો માહોલ ફેલાયો હતો. ઘટના અંગે તાત્કાલિક વડોદરા ફાયર બ્રિગેડને જાણ કરવામાં આવી હતી.
ઘટનામાં કોઈ જાનહાનિ નહીં
બનાવની ગંભીરતાને જોતા ફાયર ફાઈટરોની ટીમ કાફલા સાથે ઘટનાસ્થળે દોડી આવી હતી. ફાયર જવાનોએ પાણીનો સતત મારો ચલાવી ભારે જહેમત બાદ આગ પર કાબૂ મેળવ્યો હતો. સદનસીબે, આ ઘટનામાં કોઈ જાનહાનિ થઈ નથી, જે મોટી રાહતની વાત છે.આગ પર કાબૂ મેળવી લેવાયો છે, પરંતુ ગોડાઉનમાં રહેલો સોફા બનાવવાનો કાચો માલ અને તૈયાર સામાન બળીને ખાખ થઈ ગયો છે. પ્રાથમિક અંદાજ મુજબ વેપારીને મોટા પાયે આર્થિક નુકસાન થયું છે. હાલમાં આગ લાગવાનું ચોક્કસ કારણ જાણી શકાયું નથી, પરંતુ શોર્ટ સર્કિટના કારણે આગ લાગી હોવાની શક્યતા સેવાઈ રહી છે.
