Last Updated on by Sampurna Samachar
PM મોદીના ભત્રીજા અને તેના મિત્રોનો મહાકુંભમાં ભજનના સુર રેલાવતો વિડીયો વાયરલ
(સંપૂર્ણ સમાચાર સેવા)
પ્રધાનમંત્રી મોદીની સાદગીની ચારે તરફ ચર્ચા થઇ રહી છે. ત્યારે તેમના પરિવારની સાદગીના પણ એટલા જ વખાણ થાય છે. આ બધાની વચ્ચે હાલમાં વડાપ્રધાનના ભત્રીજા સચિન મોદી મહાકુંભમાં ભજનના સુર રેલાવી રહ્યાનો વિડીયો સોશિયલ મીડિયામાં વાયરલ થઇ રહ્યો છે. જેમાં સચિન મોદી મહાકુંભના મેળામાં સામાન્ય વ્યક્તિની જેમ નીચે બેસીને ભજનમાં મગ્ન થયા હતા. તેમણે મિત્રો સાથે પ્રયાગરાજમાં કબીરના ભજનો લલકાર્યા. સચિન મોદી PM ના સૌથી નાના ભાઈ પંકજ મોદીના પુત્ર છે. પંકજ મોદી હાલ પરિવાર સાથે મહાકુંભ પહોંચ્યા છે. સોશિયલ મીડિયા પર સચિનનો વીડિયો વાયરલ થતાં સૌ લોકોએ તેમની સાદગીના વખાણ કર્યાં હતા.
પ્રયાગરાજમાં ચાલી રહેલા મહાકુંભમાં અત્યાર સુધીમાં કરોડો ભક્તો સંગમમાં સ્નાન કરી ચૂક્યા છે અને આ સિલસિલો ચાલુ છે. આ દરમિયાન મહાકુંભના ઘણા વીડિયો પણ સામે આવી રહ્યા છે, જેને લોકો ખૂબ પસંદ કરી રહ્યા છે. આવો જ એક વીડિયો PM મોદીના ભત્રીજાનો પણ છે. વડાપ્રધાન મોદીના ભત્રીજા સચિન પંકજભાઈ મોદી પણ કુંભ મેળામાં પહોંચ્યા છે. તે વ્યવસાયે કોમ્પ્યુટર એન્જિનિયર છે પરંતુ તેને ભજન ગાવાનો શોખ છે. સચિન તેના બે મિત્રો સાથે મહાકુંભમાં પહોંચ્યો છે અને આ મિત્રો વ્યવસાયે CA છે.
સચિન અને તેના મિત્રોના જે વીડિયો સામે આવ્યા છે તેમાં જોઈ શકાય છે કે તેઓ મહાકુંભ મેળામાં ભજન ગાઈ રહ્યા છે અને યુવાનોમાં સનાતન ધર્મ પ્રત્યે ઉત્સાહ જગાડી રહ્યા છે. સચિનને ધાર્મિક ગીતો ગાવામાં પહેલેથી જ રસ છે. તેણે તેના મિત્રો સાથે એક ભજન ગ્રુપ પણ બનાવ્યું છે અને દર શનિવારે તે તેના ગ્રુપ સાથે અમદાવાદ અને ગાંધીનગરના અલગ-અલગ કાફેમાં જાય છે અને હનુમાન ચાલીસા અને ભજન ગાય છે અને યુવાનોને પોતાની સાથે જોડે છે.
દામોદરદાસ મોદી અને હીરાબેનને કુલ ૬ સંતાનો હતા. જેમાંથી વડાપ્રધાન મોદી ત્રીજા સંતાન છે. બાકીના ભાઈ-બહેનો અમૃત મોદી, પંકજ મોદી, પ્રહલાદ મોદી, સોમા મોદી અને પુત્રી વાસંતી બેન હંસમુખલાલ મોદી છે. વાસંતીબેન PM મોદીના એકમાત્ર બહેન છે. જ્યારે સોમા મોદી તેમના મોટા ભાઈનું નામ છે. ત્યારે PM મોદીના બીજા મોટા ભાઈનું નામ અમૃત ભાઈ મોદી છે. અને વડાપ્રધાન મોદી પ્રહલાદ અને પંકજ ભાઈ મોદી કરતા મોટા છે. પંકજ માહિતી વિભાગમાંથી નિવૃત્ત થયા છે.
