Last Updated on by Sampurna Samachar
કટનીથી પ્રયાગરાજ ૩૦૦ કિમી સુધી લોકો વાહનોમાં ફસાયેલા જોવા મળ્યા
(સંપૂર્ણ સમાચાર સેવા)
ઉત્તર પ્રદેશના પ્રયાગરાજમાં મહાકુંભ મેળા તરફ જતા રસ્તાઓને ૩૦૦ કિલોમીટર સુધી લાંબો કારનો ટ્રાફિક જામ થયો હતો. વિશ્વના સૌથી મોટા ધાર્મિક મેળામાં હાજરી આપવા માટે ઉત્સુક લાખો યાત્રાળુઓ મેળા સ્થળથી સેંકડો કિલોમીટર દૂર પોતાની કારમાં ફસાયેલા જોવા મળ્યા હતા.
પ્રયાગરાજ મહાકુંભમાં જતા શ્રદ્ધાળુઓ માટે જબલપુર, કટની, રેવા થઈને પ્રયાગરાજ જતા મુખ્ય માર્ગ પર છેલ્લા ઘણા કલાકોથી લાંબો જામ લાગ્યો હતો. કટની પોલીસે તો લોકોને હાથ જોડીને પાછા ફરવા અપીલ પણ કરી છે. આ જામનું મુખ્ય કારણ મહાકુંભમાં ભાગ લેવા માટે લાખો ભક્તોનું રસ્તાઓ પર આગમન છે. ટોલ બેરિયર્સ પર મનસ્વી વસૂલાત પણ આ સમસ્યાને વધારી રહી છે. દક્ષિણ ભારતમાંથી આવતા ભક્તો પણ આ માર્ગનો ઉપયોગ કરે છે, જેના કારણે ટ્રાફિકનું દબાણ વધુ વધી ગયું છે. વહીવટીતંત્રની અપૂરતી તૈયારી પણ સામે આવી છે.
એક રિપોર્ટ અનુસાર, ૨૦૦-૩૦૦ કિમી સુધી ટ્રાફિક જામ થયો હતો જેમાં મધ્યપ્રદેશ થઈને મહાકુંભ મેળા તરફ જતા યાત્રાળુઓના વાહનોનો સમાવેશ થતો હતો અને રવિવારે ત્યાંની પોલીસે વિવિધ જિલ્લાઓમાં ટ્રાફિક બંધ કરી દીધો હતો, જેના કારણે લોકો ઘણા કલાકો સુધી રસ્તાઓ પર અટવાઈ ગયા હતા.
કટની જિલ્લામાં પોલીસ વાહનોએ જાહેરાત કરી કે સોમવાર સુધી ટ્રાફિક બંધ છે, જ્યારે મૈહર પોલીસે વાહનોને કટની અને જબલપુર તરફ પાછા ફરવા અને ત્યાં જ રહેવા કહ્યું હતુ. મળેલા રિપોર્ટમાં પોલીસને ટાંકીને કહ્યું હતું કે ” પ્રયાગરાજ તરફ આગળ વધવું અશક્ય છે કારણ કે ૨૦૦-૩૦૦ કિલોમીટરનો ટ્રાફિક જામ છે. સોશિયલ મીડિયા પરના ઘણા વીડિયોમાં મધ્યપ્રદેશના કટની, જબલપુર, મૈહર અને રેવા જિલ્લાઓના રસ્તાઓ પર હજારો કાર અને ટ્રકની મોટી કતારો જોવા મળી રહી છે. પ્રત્યક્ષદર્શીઓએ દાવો કર્યો છે કે રેવા જિલ્લાના ચકઘાટ ખાતે કટનીથી MP – UP સરહદ સુધીના ૨૫૦ કિલોમીટરમાં ભારે ટ્રાફિક જામ છે. મુસાફરોએ સોશિયલ મીડિયા પર ટ્રાફિક જામ અંગે વાત કરી હતી. જેમાં એક યુઝરે કહ્યું, “જબલપુરથી ૧૫ કિમી પહેલા ટ્રાફિક જામ છે. હજુ પણ પ્રયાગરાજથી ૪૦૦ કિમી દૂર છે.
પ્રયાગરાજ મહાકુંભમાં પવિત્ર ડૂબકી લગાવવા માટે લાખો ભક્તો એકઠા થયા છે. આના કારણે જબલપુર, કટની અને રીવા થઈને પ્રયાગરાજ જતો મુખ્ય રસ્તો સંપૂર્ણપણે જામ થઈ ગયો છે. આ જામ લગભગ ૧૦ થી ૧૫ કિમી લાંબો છે. પરિસ્થિતિ વધુ વણસી ગઈ હતી. દૂર દૂર સુધી વાહનોની લાંબી કતારો જોવા મળી રહી છે.
કટનીમાં પરિસ્થિતિ એટલી ખરાબ થઈ ગઈ કે પોલીસે લોકોને પાછા ફરવા માટે અપીલ કરવી પડી હતી. કટની પોલીસ કર્મચારીઓ હાથ જોડીને ભક્તોને કહી રહ્યા છે કે, “અલાહાબાદના રસ્તાઓ પર ટ્રાફિક જામ થઇ ગયો છે, કૃપા કરીને પાછા ફરો. તમે તમારી આસપાસની કોઈપણ હોટલ કે ઢાબામાં રહી શકો છો.
પોલીસે જણાવ્યું કે શહેરમાં ભારે ભીડને કારણે યાત્રામાં ઘણી મુશ્કેલી પડી રહી છે. તેઓ પ્રયાગરાજના પોલીસ અધિકારીઓના સંપર્કમાં છે અને ત્યાંના રસ્તાઓ જામ છે. તેમજ ૨૦૦ થી ૩૦૦ કિમી લાંબો જામ છે. કટની પોલીસ લોકોને ઘરે પાછા ફરવા વિનંતી કરી રહી છે. આ ટ્રાફિક જામ રીવામાં પણ જોવા મળ્યો હતો.
દક્ષિણ ભારતને પ્રયાગરાજ સાથે જોડતા રેવા-પ્રયાગરાજ રૂટ પર મુસાફરોને ઘણી મુશ્કેલીનો સામનો કરવો પડી રહ્યો છે. તેઓ પોતાની સમસ્યાઓ વ્યક્ત કરી શકતા નથી. વહીવટીતંત્ર દ્વારા કરવામાં આવેલી બધી વ્યવસ્થાઓ અપૂરતી સાબિત થઈ રહી છે. રસ્તાઓ પર લાખો વાહનો હોવાથી ટ્રાફિકને નિયંત્રિત કરવો મુશ્કેલ બની ગયો છે. મહાકુંભને હવે થોડા જ દિવસો બાકી છે, તેથી દરેક વ્યક્તિ સંગમમાં ડૂબકી લગાવવા માંગે છે.
