રાજ્યમાંથી રો – રો ફેરી મારફતે દારૂની હેરાફેરીનો પર્દાફાશ

Last Updated on 16/04/2025 by Sampurna Samachar

૧૮ લાખના મુદ્દામાલ સાથે બે આરોપીઓની ધરપકડ

ટ્રકમાં સ્ક્રેપની આડમાં સંતાડીને લઇ લવાતો હતો દારૂ

(સંપૂર્ણ સમાચાર સેવા)

રો-રો ફેરી મારફતે ફરી એકવાર દારૂની હેરાફેરીનો પર્દાફાશ થયો છે. ટ્રકમાં સ્ક્રેપની આડમાં સંતાડીને લઇ જતા દારૂના જથ્થા સાથે હજીરા પોલીસે બે આરોપીની ધરપકડ કરી છે. બાતમીને આધારે પોલીસે ૧ લાખના દારૂ સાથે ૧૮ લાખનો દારૂ જપ્ત કર્યો છે.

હજીરા પોલીસને બાતમી મળી હતી કે, સુરતથી ગેરકાયદે રીતે દારૂ ભરેલો ટ્રક રો-રો ફેરી મારફતે ભાવનગર તરફ જવાનો છે. જેથી પોલીસે રો-રો ફેરી ખાતે વોચ ગોઠવી શંકાસ્પદ ટ્રકને અટકાવી તલાશી હાથ ધરી હતી.  જયાં તપાસ દરમિયાન સ્ક્રેપ ભરેલા ટ્રકમાં ગુપ્ત રીતે સંતાડેલી વિદેશી દારૂની ૧૧૩ બોટલો મળી હતી. જેની કિંમત ૧ લાખથી વધુ આંકવામાં આવી હતી. જ્યારે ટ્રકની કિંમત ૭ લાખથી વધુ દર્શાવવામાં આવી છે. આ ઉપરાંત ૧૬ ટન સ્ક્રેપ સહિત ૧૮ લાખના મુદ્દામાલ સાથે બે આરોપીઓની ધરપકડ કરી કાયદેસરની કાર્યવાહી હાથ ધરાઇ છે.

સ્ટેટ મોનીટરીંગ સેલે ઝડપ્યો દારૂ

સુત્રો દ્વારા મળતી માહિતી મુજબ ફેબ્રુઆરી મહિનામાં સુરતના હજીરાથી ભાવનગરના ઘોઘા વચ્ચે ચાલતી રો-રો ફેરી મારફતે મોકલાતો દારૂ સ્ટેટ મોનીટરીંગ સેલે ઝડપી લીધો હતો. સ્ટેટ મોનીટરીંગ સેલે હજીરા સ્થિત રો-રો ફેરીના પાર્કિંગમાં પાર્ક કરેલા આઇશર ટેમ્પોમાં લેમીનેશન કરી રાખેલા સ્ટીમ બોઈલરનું લેમીનેશન દૂર કરી અંદર તપાસ કરતા તેમાંથી ૧૯.૨૦  લાખ રૂપિયાની દારૂની ૧૯,૨૦૦ બોટલ મળી હતી.

આરોપીની પૂછપરછ કરતા સામે આવ્યું હતું કે,આ દારૂનો જથ્થો ગીર સોમનાથના વેરાવળ ખાતે એક વ્યક્તિને તેના મોબાઈલ નંબર ઉપર સંપર્ક કરીને આપવાનો હતો, બાદમાં આ જથ્થો સંભવત: જૂનાગઢ પહોંચાડવાનો હતો. આ રીતે દારૂ લઈ જવાની તેમની છઠ્ઠી ટ્રીપ હતી.