ધારાસભ્યની હાલત હજુ પણ નાજુક : હોસ્પિટલના અધિકારી
(સંપૂર્ણ સમાચાર સેવા)
કેરળના થ્રીક્કાકરાના કોંગ્રેસના ધારાસભ્ય ગંભીર રીતે ઘાયલ થયાના સમાચાર સામે આવ્યા છે. જેમાં ધારાસભ્ય ઉમા થોમસ જવાહરલાલ નહેરુ ઈન્ટરનેશનલ સ્ટેડિયમની ગેલેરીમાંથી પડી જતાં ગંભીર રીતે ઘાયલ થયા હતા. તેમને માથા અને કરોડરજ્જુમાં ઈજા થઈ છે અને તે સારવાર હેઠળ છે. રક્તસ્રાવની સ્થિતિમાં, ધારાસભ્યને સ્વયંસેવકો અને અન્ય લોકો દ્વારા સ્ટેડિયમ નજીકની ખાનગી હોસ્પિટલમાં દાખલ કરવામાં આવ્યા હતા.
ઉલ્લેખનીય છે કે ઉમા થોમસ કોંગ્રેસના દિવંગત નેતા પી.ટી. થોમસના પત્ની છે. થોમસ અને થ્રીક્કાકારા વિધાનસભા મત વિસ્તારનું પ્રતિનિધિત્વ કરે છે. ૨૦૨૧માં પી.ટી થોમસના મૃત્યુ બાદ કોંગ્રેસે ઉમાને ચૂંટણીમાં ઉતાર્યા હતા.
હોસ્પિટલ દ્વારા જારી કરાયેલા મેડિકલ બુલેટિન મુજબ, તેમને માથા અને કરોડરજ્જુમાં ઈજાઓ થઈ છે, તેમની પાંસળીમાં ફ્રેક્ચર અને તેના ફેફસામાં આંતરિક રક્તસ્ત્રાવ થયો છે. હોસ્પિટલના અધિકારીઓએ જણાવ્યું કે ધારાસભ્યની હાલત હજુ પણ નાજુક છે અને તેમને ‘વેન્ટિલેટર સપોર્ટ’ પર રાખવામાં આવ્યા છે. સૂત્રોએ જણાવ્યું હતું કે સ્ટેડિયમની ‘VIP ગેલેરી’માંથી લગભગ ૧૫ ફૂટની ઊંચાઈએથી પડીને તેનું માથું જમીન પર અથડાયું હતું.
સૂત્રોએ જણાવ્યું કે ઉમા થોમસ એક ડાન્સ પ્રોગ્રામમાં ભાગ લેવા સ્ટેડિયમ પહોંચી હતી. જેનું ઉદ્ઘાટન સાંસ્કૃતિક બાબતોના મંત્રી સાજી ચેરિયન કરવાના હતા. હોસ્પિટલ પહોંચેલા ઉદ્યોગ મંત્રી પી રાજીવે કહ્યું કે સ્વાસ્થ્ય વિભાગની નિષ્ણાત ટીમ ટૂંક સમયમાં હોસ્પિટલના ડોકટરોની સાથે સારવાર આપશે. સ્વાસ્થ્ય મંત્રી વીણા જ્યોર્જે કહ્યું કે સ્વાસ્થ્ય વિભાગની નિષ્ણાત મેડિકલ ટીમ ઉમા થોમસની સ્વાસ્થ્ય સ્થિતિનું મૂલ્યાંકન કરશે. વિપક્ષના નેતા વી ડી સતીસન પણ હોસ્પિટલ પહોંચ્યા અને કહ્યું કે ઘાયલ ધારાસભ્ય માટે તાત્કાલિક યોગ્ય તબીબી સંભાળ સુનિશ્ચિત કરવાની તેમની પ્રાથમિકતા છે.
