Last Updated on by Sampurna Samachar
૧૨૧ કરોડના બોગસ બિલો બનાવીને સરકારી તિજોરીને મોટો ચૂનો
તપાસમાં અન્ય મોટા માથાના નામ ખૂલે તેવી શક્યતા
(સંપૂર્ણ સમાચાર સેવા)
રાજ્યમાં સીબીઆઈ, ઈન્કમટેક્સ અને ઈડીની કાર્યવાહી બાદ હવે ડાયરેકટર જનરલ ઓફ જીએસટી ઇન્ટેલીજન્સએ સપાટો બોલાવ્યો છે. જીએસટી વિભાગે રાજ્યવ્યાપી દરોડા પાડીને અંદાજે રૂ. ૮૦૦ કરોડના મસમોટા બોગસ બિલિંગ કૌભાંડનો પર્દાફાશ કર્યો છે. આ તપાસનો રેલો જામનગર સુધી પહોંચતા બ્રાસપાર્ટના જાણીતા ઉદ્યોગપતિની ધરપકડ કરવામાં આવતા સમગ્ર ઉદ્યોગ જગતમાં ખળભળાટ મચી ગયો છે.
DGGI ની તપાસમાં સામે આવ્યું છે કે જામનગરની ‘પટેલ મેટલ કાસ્ટ એલએલપી‘ ના ભાગીદાર જયદીપ મુકેશભાઈ વિરાણી આ કૌભાંડના મુખ્ય સુત્રધાર પૈકીના એક છે. તેમણે આર્થિક ફાયદો મેળવવા માટે ૪૦ જેટલી બોગસ પેઢીઓ ઉભી કરી હતી. તપાસમાં ચોંકાવનારી વિગત એ ખૂલી છે કે, વાસ્તવિક રીતે માત્ર ૨૨ કરોડનો વ્યવહાર હોવા છતાં, તેમણે ૧૨૧ કરોડના બોગસ બિલો બનાવીને સરકારી તિજોરીને મોટો ચૂનો ચોપડ્યો છે. અધિકારીઓએ તેમના કબજામાંથી ચેકબુક, દસ્તાવેજો, મોબાઈલ ફોન અને કોમ્પ્યુટર સહિતનો મુદ્દામાલ જપ્ત કર્યો છે.
હવાલા અને રોકડ વ્યવહારો દ્વારા નાણાંની હેરફેર કરાઇ
DGGI ના અમદાવાદ ઝોનલ યુનિટને મળેલી બાતમીના આધારે ભાવનગર, મુંબઈ, ચંદ્રપુર અને રાજકોટમાં ગુપ્ત રાહે તપાસ હાથ ધરવામાં આવી હતી.આ કૌભાંડમાં બદ્રે આલમ પઠાણ અને તોફીક ખાનની અમદાવાદથી ધરપકડ કરવામાં આવી છે. તોફીક ખાને કોઈપણ માલની ખરીદી કર્યા વિના ખોટી વેરાશાખ મેળવવા માટે રૂ. ૪૫ કરોડના નકલી બિલો મેળવ્યા હતા.
અન્ય એક કેસમાં જૂનાગઢની ‘ભારત સેનેટરી એન્ડ ફીટીંગ‘ ના ભાગીદાર હાર્દિક સંજયભાઈ રાવલની પણ ધરપકડ થઈ છે. તેમણે ૪૭ નકલી કંપનીઓ દ્વારા ઈશ્યુ કરાયેલા ૧૧૦.૫૭ કરોડના બોગસ બિલોના આધારે રૂ. ૨૮.૦૨ કરોડની ખોટી વેરાશાખ મેળવી સરકાર સાથે છેતરપિંડી કરી હતી.
તપાસ અધિકારીઓના જણાવ્યા મુજબ, આ કૌભાંડીઓ સક્રિય GST નંબર ધરાવતી પણ નિષ્ક્રિય હોય તેવી કંપનીઓ ખરીદી લેતા હતા. ત્યારબાદ તેના ડિરેક્ટરો અને સરનામાં બદલી નાખતા અને મોટાપાયે નકલી બિલો બનાવતા હતા. આ કૌભાંડમાં હવાલા અને રોકડ વ્યવહારો દ્વારા નાણાંની હેરફેર કરવામાં આવતી હતી. હાલમાં આ સમગ્ર મામલે DGGI દ્વારા સઘન પૂછપરછ ચાલી રહી છે અને આગામી દિવસોમાં આ કૌભાંડમાં સંડોવાયેલા અન્ય મોટા માથાઓના નામ ખૂલવાની શક્યતા છે.
