Last Updated on by Sampurna Samachar
ભારત અમેરિકા પર ૧૦૦ ટકા ટેરિફ લગાવે છે જે અયોગ્ય
મેક્સિકો પણ અમેરિકા પર ટેરિફ લગાવવાની કરી શકે જાહેરાત
(સંપૂર્ણ સમાચાર સેવા)
અમેરિકાના પ્રેસિડન્ટ ડોનાલ્ડ ટ્રમ્પે અમેરિકન સંસદને સંબોધિત કરતા યુએસની વસ્તુઓ પર મોટો ટેરિફ (TERIFF) લગાવનારા દેશો પર ૨ એપ્રિલથી રેસિપ્રોકલ ટેરિફ લગાવવાની જાહેરાત કરી છે. એ સાથે જ દુનિયામાં સૌથી મોટા ટ્રેડ વોરની શરૂઆત થઈ ચૂકી છે. તેઓ જે દેશો પર રેસિપ્રોકલ ટેરિફ લગાવવાના છે તે લિસ્ટમાં ભારતનું પણ નામ છે.
ટ્રમ્પે પોતાના ભાષણમાં કહ્યું કે, ચીન, મેક્સિકો અને કેનેડાની સાથે ભારત પણ અમેરિકા પર મોટો ટેરિફ લગાવે છે, જે યોગ્ય નથી. પોતાના ભાષણમાં બે વખત ભારતનો ઉલ્લેખ કરતા ટ્રમ્પે કહ્યું કે, ભારત અમેરિકા પર ૧૦૦ ટકા ટેરિફ લગાવે છે. તેમણે અમેરિકા પર ટેરિફ લગાવતા કેટલાક દેશોના નામ પણ જણાવ્યા અને કહ્યું કે, યુરોપીયન યુનિયન, ચીન, બ્રાઝિલ, ભારત, મેક્સિકો અને કેનેડા અમેરિકા પર ટેરિફ લગાવે છે.
૨ એપ્રિલથી લાગુ કરવાનો ર્નિણય
તેમજ બીજા ઘણા દેશો અમેરિકા જેટલો ટેરિફ લે છે તેના કરતા ઘણો વધારે ટેરિફ વસૂલે છે. તેને અનુચિત જણાવતા ટ્રમ્પે ૨ એપ્રિલથી તે દેશો પર પણ એટલો જ ટેરિફ લગાવવાની જાહેરાત કરી છે. ટ્રમ્પે યુએસ કોંગ્રેસમાં પોતાના સંબોધનમાં કહ્યું કે, તેમનો પ્લાન પહેલા રિસિપ્રોકલ ટેરિફ ૧ એપ્રિલથી લાગુ કરવાનો હતો, પરંતુ તેઓ નથી ઈચ્છતા કે તેને એપ્રિલ ફૂલ સાથે જોડીને જોવામાં આવે એટલે ૨ એપ્રિલથી લાગુ કરવાનો ર્નિણય લેવાયો છે.
ટ્રમ્પે અન્ય દેશોએ દાયકાઓથી અમેરિકા સામે ટેરિફનો ઉપયોગ કર્યો છે, હવે અમેરિકાનો વારો છે. તે સાથે તેમણે કડક વલણ બતાવતા કહ્યું કે, જો તે દેશો અમેરિકાને પોતાના બજારથી બહાર રાખવા માટે નોન-મોનેટ્રી ટેરિફ લગાવશે તો અમેરિકા પણ તેમને પોતાના બજારથી બહાર રાખવા માટે એવું જ કરશે. તેમના કહેવા મુજબ આ પગલાંથી અમેરિકાને ખર્વો ડોલરનું પ્રોડક્શન કરવામાં મદદ મળશે અને તે સાથે જ રોજગારને પણ પ્રોત્સાહન મળશે.
લોકોના મનમાં એ સવાલ ઊભો થવો સ્વાભાવિક છે કે, ટ્રમ્પ જે રેસિપ્રોકલ ટેરિફ પર આટલો ભાર આપી રહ્યા છે, તે આખરે છે શું? તો તમને જણાવી દઈએ કે, રેસિપ્રોકલ ટેરિફ એટલે પારસ્પરિક ટેરિફ, એટલે કે તમે જેટલો ટેક્સ લેશો તેટલો જ ટેક્સ હું પણ લઈશ તેવી આ વાત થઈ. ટૂંકમાં કહીએ તો ‘જેવા સાથે તેવા‘ની નીતિ. વેપારમાં સમાનતા માટે તેને લાગુ કરવામાં આવે છે, પરંતુ તેનાથી નુકસાન પણ થાય છે અને તે સીધો ઈકોનોમીને ટાર્ગેટ કરે છે. તેમજ બે દેશો વચ્ચેના પરસ્પરના ટ્રેડ રિલેશન પર પણ તેની અસર પડે છે.
દરમિયાનમાં બકર્શાયર હેથવે કંપનીના ચેરમેન અને દિગ્ગજ ઈન્વેસ્ટર વોરેન બફેટે ટ્રમ્પની ટેરિફ પોલિસીની આકરી ટીકા કરતા તેને યુદ્ધ જેવું પગલું જણાવ્યું છે. એક ચેનલને આપેલા ઈન્ટર્વ્યુમાં તેમણે કહ્યું કે, ટ્રમ્પનું આ પગલું મોંઘવારું વધારનારું સાબિત થઈ શકે છે અને તેની સીધી અસર ગ્રાહકો પર પડી શકે છે. ટ્રમ્પે મેક્સિકો અને કેનેડા પર ૨૫ ટકા હાઈ ટેરિફ અને ચીન પર ૧૦ ટકા વધારાનો ટેરિફ લગાવવાની જાહેરાત કરી તે પછી વોરેન બફેટે આ વાત કરી હતી.
ઉલ્લેખનીય છે કે, ચીન અને કેનેડાએ પણ પલટવાર કરતા અમેરિકાથી આયાત થતી વસ્તુઓ પર ટેરિફની જાહેરત કરી દીધી છે. ચીને અમેરિકાની ઘણી વસ્તુઓ પર ૧૦થી ૧૫ ટકા વધારાનો ટેરિફ લગાવાની અને જાહેરાત કરી છે અને તે ૧૦ માચર્થી લાગુ થઈ જશે. તેમાં ચિકન, ઘઉં, કપાસ સહિતની વસ્તુઓ સામેલ છે. બીજી તરફ કેનેડાએ કહ્યું કે, તે અમેરિકાથી ૧૨૫ અબજ કેનેડિયન ડોલરથી વધારે આયાત પર જવાબી ટેરિફ લગાવશે. મેક્સિકોએ પણ અમેરિકા પર ટેરિફ લગાવવાની વાત કરી છે, જેની જાહેરાત ટુંક સમયમાં કરવામાં આવી શકે છે.
