હિન્દી ભારતની રાષ્ટ્રભાષા નથી તેમ કહેતા સૌ કોઇમાં મૌન છવાઇ ગયું
(સંપૂર્ણ સમાચાર સેવા)
ભારતના સ્ટાર ઓફ સ્પિનર રવિચંદ્રન અશ્વિન પોતાના એક નિવેદનના કારણે વિવાદમાં આવી ગયા છે. રવિચંદ્રન અશ્વિન કહ્યું કે, હિન્દી ભારતની રાષ્ટ્રભાષા નથી. રવિચંદ્રન અશ્વિનના આ નિવેદને સમગ્ર વિશ્વમાં હલચલ મચાવી દીધી છે. જ્યારબાદ રવિચંદ્રન અશ્વિન સોશિયલ મીડિયામાં ચર્ચાનું કેન્દ્ર બન્યો છે. રવિચંદ્રન અશ્વિને તમિલનાડુની એક ખાનગી એન્જિનિયરિંગ કોલેજના પદવીદાન સમારોહ દરમિયાન વિદ્યાર્થીઓને સંબોધિત કરતા આ વાત કહી છે.
રવિચંદ્રન અશ્વિને વિદ્યાર્થીઓને સંબોધતા કહ્યું કે, જો કોઈ અંગ્રેજી અથવા તમિલ ભાષામાં એટલું નિપુણ નથી, તો શું કોઈને હિન્દીમાં પ્રશ્નો પૂછવામાં રસ રાખે છે. રવિચંદ્રન અશ્વિને આટલું બોલતાની સાથે જ વિદ્યાર્થીઓના ગ્રુપમાં મૌન છવાઈ ગયું હતું. રવિચંદ્રન અશ્વિને અચાનક ભારતમાં ભાષાનો મુદ્દો ઉઠાવ્યો છે.
રવિચંદ્રન અશ્વિને હિન્દી ભાષા અંગે વિદ્યાર્થીઓની પ્રતિક્રિયામાં તફાવત જોયો. આ પછી ઓફ-સ્પિનરે કહ્યું કે, મને લાગ્યું કે મારે આ કહેવું જોઈએઃ હિન્દી આપણી રાષ્ટ્રભાષા નથી; તે એક સત્તાવાર ભાષા છે. આ ટિપ્પણી એવા સમયે નવી ચર્ચાને જન્મ આપી શકે છે જ્યારે તમિલનાડુના શાસક ડીએમકે સહિત ઘણા વિરોધ પક્ષોએ કેન્દ્ર પર રાજ્યોમાં ખાસ કરીને દક્ષિણમાં હિન્દી થોપવાનો પ્રયાસ કરવાનો આરોપ લગાવ્યો છે.
આ જ કાર્યક્રમમાં અશ્વિને ટીમ ઈન્ડિયાની કેપ્ટનશિપ વિશે પણ વાત કરી હતી. અહીં, અનુભવી ઓફ-સ્પિનરે રાજદ્વારી જવાબ આપ્યો. અશ્વિને કહ્યું કે, ‘જ્યારે કોઈ કહે કે હું આ કરી શકતો નથી, ત્યારે હું તેને પૂર્ણ કરવા માટે ઊભો થઈ જાઉં છું, પરંતુ જો તેઓ કહે કે હું કરી શકું છું, તો હું રસ ગુમાવી દઉં છું.’ અશ્વિને જણાવ્યું કે, તેમણે એન્જિનિયરિંગ પણ કર્યું છે. અશ્વિને તેની સફરમાંથી શીખેલા બોધપાઠને શેર કરતાં વિદ્યાર્થીઓને ક્યારેય હાર ન માનવા અને શંકાના સમયમાં પણ તેમના માર્ગ પર અડગ રહેવા જણાવ્યું. અશ્વિને વધુમાં કહ્યું કે, ‘જાે કોઈ એન્જિનિયરિંગ સ્ટાફે મને કહ્યું હોત કે, હું કેપ્ટન નહીં બની શકું તો મેં વધુ મહેનત કરી હોત. અશ્વિને વિદ્યાર્થીઓને શંકાનો સામનો કરવા માટે ધ્યાન કેન્દ્રિત કરવા અને દ્રઢ રહેવા માટે પ્રોત્સાહિત કર્યા. તેમણે કહ્યું કે, જો તમે વિદ્યાર્થી છો, તો તમે ક્યારેય રોકાશો નહીં. જો તમે રોકશો નહીં, તો શીખવાનું બંધ થઈ જશે અને શ્રેષ્ઠતા તમારા કબાટમાં માત્ર એક શબ્દ બનીને રહી જશે.
