Last Updated on by Sampurna Samachar
આ ભારતીય ટીમનો ખેલાડી ઇજાગ્રસ્ત થતાં ચિંતા
ભારતીય ટીમનું ટેન્શન વધી ગયું
(સંપૂર્ણ સમાચાર સેવા)
ભારતીય ક્રિકેટ ટીમ ૨૦ જૂનથી ઈંગ્લેન્ડ (ENGLAND) સામે ઇંગ્લેન્ડની ધરતી પર પાંચ મેચની ટેસ્ટ શ્રેણી રમવા જઇ રહી છે. શુભમન ગિલના નેતૃત્વ હેઠળની ભારતીય ટીમ આ ટેસ્ટ શ્રેણી માટે ઈંગ્લેન્ડ પહોંચી ગઈ છે. ભારતીય ખેલાડીઓએ પ્રેક્ટિસ પણ શરૂ કરી દીધી છે, સાથે જ ઈંગ્લેન્ડની પરિસ્થિતિઓથી પરિચિત થવાનો પ્રયાસ પણ કરી રહ્યા છે.
જોકે, આ દરમિયાન ભારતીય ટીમનું ટેન્શન વધી ગયું છે. ટીમના ઉપ-કપ્તાન અને વિકેટકીપર બેટ્સમેન ઋષભ પંત ઈજાગ્રસ્ત થયો છે. ૮ જૂને બેકનહામમાં પ્રેક્ટિસ સેશન દરમિયાન બોલ પંતના ડાબા હાથમાં વાગ્યો હતો. મીડિયા અહેવાલ મુજબ, બોલ પંતને વાગવાથી ખૂબ જ પીડામાં જોવા મળ્યો હતો અને ટીમના ડૉક્ટરે તેના પર આઈસ પેક લગાવ્યો હતો.
પંત ટેસ્ટ શ્રેણી માટે ફિટ થવાની પૂરી શક્યતા
રિપોર્ટમાં એમ પણ કહેવામાં આવ્યું છે કે ઋષભ પંતના હાથમાં પાટો પણ બાંધવામાં આવ્યો હતો અને તે તેની રિકવરી પર ધ્યાન કેન્દ્રિત કરવા માટે બાકીના નેટ સત્રમાંથી ગેરહાજર રહ્યો હતો. ઇન્ડિયન પ્રીમિયર લીગની તાજેતરની સીઝનમાં ઋષભ પંતનું પ્રદર્શન બહુ સારું નહોતું. પંતે ૧૪ મેચમાં ૨૪.૪૫ની સરેરાશથી ૨૬૯ રન બનાવ્યા હતા.
ઋષભ પંતે લખનૌ સુપર જાયન્ટ્સની છેલ્લી મેચમાં સદી ફટકારી હતી, પરંતુ ત્યાં સુધીમાં ઘણું મોડું થઈ ગયું હતું. પંતની કેપ્ટનશીપ હેઠળ, લખનૌની ટીમ પ્લેઓફમાં પણ પહોંચી શકી નહોતી. બીજી તરફ, ઓસ્ટ્રેલિયા પ્રવાસ પર બોર્ડર-ગાવસ્કર ટ્રોફી ૨૦૨૪-૨૫માં પંતનું પ્રદર્શન સારું નહોતું. ત્યારબાદ તે ૫ ટેસ્ટ મેચમાં ૨૮.૩૩ની સરેરાશથી ૨૫૫ રન બનાવી શક્યો હતો.
જો ઋષભ પંત સંપૂર્ણપણે ફિટ ન હોય, તો ભારતીય ટીમ ધ્રુવ જુરેલનો વિકેટકીપર તરીકે ઉપયોગ કરી શકે છે. જોકે, પંત ટેસ્ટ શ્રેણી માટે ફિટ થવાની પૂરી શક્યતા છે. ટેસ્ટ શ્રેણી શરૂ થાય તે પહેલાં, ભારતીય ટીમે ૧૩ જૂનથી ભારત-એ સામે ઇન્ટ્રા-સ્ક્વોડ મેચ પણ રમવાની છે.
ઇંગ્લેન્ડ પ્રવાસ માટે ૧૮ સભ્યોની ભારતીય ટીમ : શુભમન ગિલ (કેપ્ટન), યશસ્વી જયસ્વાલ, કેએલ રાહુલ, સાઈ સુદર્શન, ઋષભ પંત (વાઈસ કેપ્ટન/વિકેટકીપર), નીતિશ કુમાર રેડ્ડી, રવિન્દ્ર જાડેજા, ધ્રુવ જુરેલ (વિકેટકીપર), અભિમન્યુ ઈશ્વરન, શાર્દુલ ઠાકુર, જસપ્રીત બુમરાહ, મોહમ્મદ સિરાજ, પ્રસિદ્ધ કૃષ્ણા, કરુણ નાયર, વોશિંગ્ટન સુંદર, આકાશ દીપ, અર્શદીપ સિંહ, કુલદીપ યાદવ.
ભારત સામેની પ્રથમ ટેસ્ટ માટે ઇંગ્લેન્ડ ટીમ : બેન સ્ટોક્સ (કેપ્ટન), શોએબ બશીર, જેકબ બેથેલ, હેરી બ્રુક, બ્રાયડન કાર્સ, સેમ કૂક, જેક ક્રોલી, બેન ડકેટ, જેમી ઓવરટન, ઓલી પોપ, જો રૂટ, જેમી સ્મિથ, જોશ ટંગ, ક્રિસ વોક્સ.
