બંને ઉદ્યોગપતિઓની સંપત્તિમાં ઘટાડો ભારતીય ઉદ્યોગ માટે પડકારરૂપ
(સંપૂર્ણ સમાચાર સેવા)
મુકેશ અંબાણી અને ગૌતમ અદાણી ભારતના સૌથી ધનિક ઉદ્યોગપતિઓમાં સામેલ છે. વર્ષ ૨૦૨૪ આ બંને ઉદ્યોગપતિઓ માટે આર્થિક પડકારોથી ભરેલું હતું. તાજેતરના અહેવાલ મુજબ, રિલાયન્સ ઇન્ડસ્ટ્રીઝના ચેરમેન મુકેશ અંબાણી અને અદાણી ગ્રુપના ચેરમેન ગૌતમ અદાણી હવે ૧૦૦ અબજ ડોલરની ક્લબમાંથી બહાર નીકળી ગયા છે. તાજેતરના મહિનાઓમાં બંનેની સંપત્તિમાં ભારે ઘટાડાએ તેમને ક્લબમાંથી બહાર નીકળવા માટે મજબૂર કર્યા છે એટલું જ નહીં પરંતુ તેમના વ્યવસાયિક સામ્રાજ્ય માટે નવા પડકારો પણ ઉભા કર્યા છે.
મુકેશ અંબાણીની સંપત્તિ જુલાઈ ૨૦૨૪ માં ૧૨૦.૮ અબજ ડોલર હતી, જે હવે ડિસેમ્બર ૨૦૨૪ માં ઘટીને લગભગ ૯૬.૭ અબજ ડોલર થઈ ગઈ છે. આ ઘટાડો મુખ્યત્વે રિલાયન્સ ઇન્ડસ્ટ્રીઝના રિટેલ અને ઊર્જા વિભાગોની નબળી કામગીરી અને વધતા દેવાને કારણે હતો. કંપનીના વ્યવસાયના વિસ્તરણને લઈને અંબાણીના રોકાણકારોમાં ચિંતા વધી રહી છે. તેમની સંપત્તિનું આ સ્તર જુલાઈમાં તેમના પુત્ર અનંત અંબાણીના લગ્નના સમય કરતાં લગભગ ૨૪ અબજ ડોલર ઓછું છે.ગૌતમ અદાણીની સંપત્તિમાં ઘટાડા પાછળ યુએસ ડિપાર્ટમેન્ટ ઓફ જસ્ટિસ ની તપાસ અને હિન્ડેનબર્ગ રિસર્ચ રિપોર્ટનો મોટો ફાળો છે. હિન્ડેનબર્ગ અહેવાલમાં છેતરપિંડીના આક્ષેપોથી અદાણી જૂથની છબીને ઘણું નુકસાન થયું હતું. અદાણીની સંપત્તિ જૂન ૨૦૨૪માં ૧૨૨.૩ અબજ ડોલર હતી, જે હવે નવેમ્બર ૨૦૨૪માં ઘટીને માત્ર ૮૨.૧ અબજ ડોલર થઈ ગઈ છે. આ ઘટાડાએ અદાણીને બ્લૂમબર્ગના સેન્ટીબિલિયોનેર્સ ક્લબમાંથી બહાર કરી દીધા છે.
મળતા અહેવાલમાં ભારતની ટેલિકોમ કંપનીઓ માટે સંભવિત જોખમ વિશે પણ વાત કરવામાં આવી હતી. અમેરિકાના ચૂંટાયેલા રાષ્ટ્રપતિ ડોનાલ્ડ ટ્રમ્પની નીતિઓ અને એલન મસ્કની કંપની સ્ટારલિંકનો ભારતમાં પ્રવેશ ટેલિકોમ ક્ષેત્રમાં નવા પડકારો પેદા કરી શકે છે. વોલમાર્ટનો વોલ્ટન પરિવાર ૪૩૨.૪ અબજ ડોલરની સંપત્તિ સાથે આ યાદીમાં ટોચ પર છે. આ યાદીમાં મુકેશ અંબાણી આઠમા સ્થાને છે, જ્યારે અદાણી આ યાદીમાંથી બહાર થઈ ગયા છે.મુકેશ અંબાણી અને ગૌતમ અદાણીની સંપત્તિમાં ઘટાડો ભારતીય ઉદ્યોગ માટે ટર્નિંગ પોઇન્ટ સાબિત થઈ શકે છે. રોકાણકારો અને ઉદ્યોગ નિષ્ણાતો માને છે કે બંને ઉદ્યોગપતિઓએ તેમના વ્યવસાયિક સામ્રાજ્યને સ્થિર કરવા માટે વ્યૂહાત્મક પગલાં લેવા પડશે.
