US કસ્ટમ્સ એન્ડ બોર્ડર પ્રોટેક્શન દ્વારા આંકડા જાહેર
ભારતીયોની સંખ્યામાં ૨૨ ટકાનો ઉછાળો નોંધાયો
(સંપૂર્ણ સમાચાર સેવા)
છેલ્લા કેટલાક સમયથી અમેરિકાએ યુએસમાં ઘૂસણખોરી કરતા ઈલલીગલ ઈમિગ્રન્ટ્સ માટેના ઘણા રૂટ પર સખ્તી વધારી દીધી છે જેના કારણે તાજેતરના વર્ષોમાં US -કેનેડા બોર્ડર પર ઈલલીગલ ક્રોસિંગ વધી ગયું છે અને તેમાં ભારતીયોની સંખ્યામાં પણ મોટો ઉછાળો આવ્યો છે. યુએસ કસ્ટમ્સ એન્ડ બોર્ડર પ્રોટેક્શન દ્વારા જાહેર કરવામાં આવેલા ડેટા પ્રમાણે નોર્ધન બોર્ડર પર થયેલા એન્કાઉન્ટરમાં અમેરિકામાં ઈલલીગલી ઘૂસણખોરી કરનારા ભારતીયોની સંખ્યામાં ૨૨ ટકાનો ઉછાળો નોંધાયો છે. તેના નાણાકીય વર્ષ અનુસાર ડેટા જાહેર કરવામાં આવ્યા છે.
૨૦૨૨માં અમેરિકામાં ઈલલીગલી એન્ટર થવાના કુલ ૧,૦૯,૫૩૫ પ્રયાસો થયા હતા જેમાં ભારતીયોની સંખ્યા ૧૬ ટકા જેટલી હતી. ૨૦૨૩માં તે ટકાવારીમાં કોઈ મોટો વધારો ન હતો થયો અને મોટા ભાગે તે સ્થિર રહી હતી. જોકે બાદમાં ઈલલીગલી US માં એન્ટર થવાના પ્રયાસોની સંખ્યામાં તીવ્ર ઉછાળો આવ્યો હતો અને તે ૧,૮૯,૪૦૨ થયો હતો જેમાં ભારતીયોની સંખ્યા ૩૦,૦૧૦ હતી. આ વર્ષે પણ તેમાં નોંધપાત્ર વધારો થયો છે કુલ ૧,૯૮,૯૨૯ પ્રયાસોમાંથી ભારતીયોની સંખ્યા ૪૩,૭૬૪ હતી જે ૨૨ ટકાની નજીક થાય છે. જોકે આ ડેટા બોર્ડર ઓફિસર્સ દ્વારા જે લોકો પકડાયા છે તેમની છે પરંતુ જે લોકો ડિટેક્ટ થઈ શક્યા નથી તેમની સંખ્યા ઉપલબ્ધ નથી.
અમેરિકાના પ્રેસિડેન્ટ તરીકે ચૂંટાયેલા ડોનાલ્ડ ટ્રમ્પે ૨૦ જાન્યુઆરીએ સત્તા સંભાળતા પહેલા જ કેનેડાને ઈલીગલ ક્રોસિંગ બંધ કરાવવાની ધમકી આપતા કહ્યું હતું કે જો કેનેડાએ આમ ના કર્યું તો તેના પર ૨૫ ટકા ટેરિફ ઝીંકવામાં આવશે. ટ્રમ્પની આ ધમકી બાદ કેનેડાના પ્રાઈમ મિનિસ્ટર જસ્ટિન ટ્રૂડો સાત લોકોની ટીમ સાથે ટ્રમ્પની મુલાકાત કરવા માટે તાબડતોબ ફ્લોરિડા પહોંચ્યા હતા. ટ્રૂડોએ ટ્રમ્પના માર-એ-લાગો સ્થિત નિવાસ સ્થાને આગામી યુએસ પ્રેસિડેન્ટ સાથે મુલાકાત કરી હતી. ટ્રૂડોની સાથે કેનેડાના પબ્લિક સિક્યોરિટી મિનિસ્ટર ડોમિનિક લેબ્લેન્ક હતા અને તેઓ કેનેડિયન બોર્ડર સર્વિસીસ એજન્સીનો હવાલો સંભાળે છે.
વોશિંગ્ટન ડીસી સ્થિત થિંક ટેન્ક નિસ્કાનેન સેન્ટરે આ વર્ષે સપ્ટેમ્બરમાં કરેલા એનાલિસિસ પ્રમાણે ભારતીયો માટે યુએસમાં ઈલીગલી એન્ટર થવા માટે કેનેડા એક સરળ રસ્તો બની ગયો છે. આનું કારણ સમજાવતા થિંક ટેન્કે જણાવ્યું છે કે સરેરાશ કેનેડિયન વિઝિટર વિઝા માટે પ્રોસેસિંગનો સમય ૭૬ દિવસનો હતો, જ્યારે બીજી તરફ યુએસના વિઝિટર વિઝાની એપોઈન્ટમેન્ટ માટેનો વેઈટિંગ પીરિયડ લગભગ એક વર્ષ છે. આ ઉપરાંત યુએસ-કેનેડા બોર્ડર યુએસ-મેક્સિકો બોર્ડર કરતાં લાંબી છે અને ત્યાં સિક્યોરિટી પણ પ્રમાણમાં ઓછી છે. કેનેડામાં ખાલિસ્તાનનો મુદ્દો પણ ઘણો મહત્વનો ભાગ ભજવી રહ્યો છે તેમ જણાવતા એનાલિસિસમાં કહેવામાં આવ્યું છે કે, ભારતમાંથી તાજેતરના ઘણા ઈરેગ્યુલર માઈગ્રન્ટ્સમાંથી મોટા ભાગના પંજાબથી આવે છે જે મુખ્યત્વે શીખ રાજ્ય છે અને તેઓ કેનેડા મારફતે આવીને અમેરિકામાં અસાયલમ માંગે છે. આ મુદ્દો ભવિષ્યમાં ત્રિપક્ષીય વિવાદનો મુદ્દો બનવાની સંભાવના છે.
ઉલ્લેખનીય છે કે કેનેડા બોર્ડર પર અરેસ્ટ થતાં લોકોનો આંકડો ભલે મેક્સિકોની સરખામણીએ ઘણો ઓછો હોય, પરંતુ આ બોર્ડર પર પકડાયા વિના જ અમેરિકામાં ઘૂસી જતાં લોકોની સંખ્યા ઘણી વધારે છે. બાઈડને પ્રેશર વધાર્યા બાદ પણ કેનેડાએ છેલ્લા છ મહિનામાં ઈન્ડિયન્સને વિઝા આપવા પર અનેક નિયંત્રણો મૂકી દીધા છે તેમજ વિઝા એપ્લિકેશનને પ્રોસેસ કરવાની સિસ્ટમમાં પણ ધરમૂળથી સુધારા કર્યા છે. આ ઉપરાંત યુએસ-કેનેડા બોર્ડર જીવલેણ પણ સાબિત થઈ શકે અને તેમાં પણ ખાસ કરીને શિયાળો શરૂ થાય ત્યારે ત્યાંનું વાતવરણ અત્યંત આકરું બની જતું હોય છે. ૧૯ જાન્યુઆરી ૨૦૨૨ના રોજ કેનેડા-અમેરિકા બોર્ડર પર કાતિલ ઠંડીમાં થીજીને મોતને ભેટેલા ડીંગુચાના જગદીશ પટેલ અને તેમના પરિવારના મોતે સનસનાટી મચાવી દીધી હતી. આ પરિવાર કેનેડાની બોર્ડરથી યુએસમાં ઈલીગલી એન્ટર થવા ગયો હતો પરંતુ યુએસ બોર્ડરથી થોડા જ અંતરે કાતિલ ઠંડીમાં થીજીને તેમના મોત થયા હતા.
