Last Updated on by Sampurna Samachar
એક જ દિવસમાં રેકોર્ડ ૭૦૭ મિલિયન ટ્રાન્ઝેક્શન થયા
ભારતમાં, ૨ ઓગસ્ટે UPI એ બનાવ્યો નવો રેકોર્ડ
(સંપૂર્ણ સમાચાર સેવા)
ડિજિટલ તરફ આગળ વધતા ભારતમાં UPI ની લોકપ્રિયતા કેટલી વધી છે તેનો અંદાજ તમે એ વાત પરથી પણ લગાવી શકો છો કે એક જ દિવસમાં અમેરિકાની વસ્તી કરતા બમણી UPI દ્વારા ટ્રાન્ઝેક્શન થયા છે. ૨૦૨૪ ના આંકડા મુજબ, અમેરિકાની વસ્તી લગભગ ૩૪૧.૨ મિલિયન હતી, પરંતુ ભારતમાં, ૨ ઓગસ્ટ, ૨૦૨૫ ના રોજ, UPI દ્વારા એક જ દિવસમાં રેકોર્ડ ૭૦૭ મિલિયન ટ્રાન્ઝેક્શન થયા.
નેશનલ પેમેન્ટ્સ કોર્પોરેશન ઓફ ઈન્ડિયા (NPCI ) દ્વારા શેર કરાયેલા આ આંકડા દર્શાવે છે કે આ પ્લેટફોર્મનો ઉપયોગ કેવી રીતે ઝડપથી વધ્યો છે. UPI એ છેલ્લા કેટલાક વર્ષોમાં જ આ ઐતિહાસિક સીમાચિહ્ન હાંસલ કર્યું છે. ૨૦૨૩ માં, દરરોજ લગભગ ૩૫૦ મિલિયન (૩૫ કરોડ) UPI વ્યવહારો હતા. ઓગસ્ટ ૨૦૨૪ સુધીમાં, આ સંખ્યા વધીને ૫૦૦ મિલિયન (૫૦ કરોડ) થઈ ગઈ. હવે આ આંકડો ૭૦૦ મિલિયન (૭૦ કરોડ) સુધી પહોંચી ગયો છે.
દૈનિક વ્યવહારોને ૧ અબજ સુધી વધારવાનુ લક્ષ્યાંક
હવે સરકારનું લક્ષ્ય UPI દ્વારા દૈનિક વ્યવહારોને ૧ અબજ (૧૦૦ કરોડ) સુધી વધારવાનું છે. ફિનટેક કંપનીઓ અને પેમેન્ટ યુનિયનો કહે છે કે આટલા મોટા ટ્રાન્ઝેક્શન વોલ્યુમને ટકાવી રાખવા માટે, હવે MDR (મર્ચન્ટ ડિસ્કાઉન્ટ રેટ) પાછો લાવવો જરૂરી બની શકે છે.
RBI એ તાજેતરમાં કહ્યું છે કે UPI સિસ્ટમને નાણાકીય રીતે ટકાઉ બનાવવી જરૂરી છે. RBI ગવર્નર સંજય મલ્હોત્રાએ કહ્યું, “કોઈને તો આ માળખાગત સુવિધાનો ખર્ચ ઉઠાવવો પડશે.” સરકારે અગાઉ નાણાકીય વર્ષ ૨૦૨૪ માં UPI સિસ્ટમ માટે લગભગ રૂ. ૪,૫૦૦ કરોડની સબસિડી આપી હતી, પરંતુ નાણાકીય વર્ષ ૨૫ માં તે ઘટાડીને માત્ર રૂ. ૧,૫૦૦ કરોડ કરવામાં આવી હતી.
UPI હવે માત્ર ભારતમાં જ નહીં પરંતુ સમગ્ર વિશ્વમાં સૌથી વધુ સંખ્યામાં રીઅલ-ટાઇમ ડિજિટલ ચુકવણીઓ પ્રક્રિયા કરે છે. ગયા મહિને, UPI એ લગભગ ૨૫ લાખ કરોડ રૂપિયાના ૧૯.૫ અબજ વ્યવહારો કર્યા. જો તમે યુનિફાઈડ પેમેન્ટ્સ ઈન્ટરફેસ (UPI) થી પૈસા ટ્રાન્સફર કરી રહ્યા હોવ અને ભૂલથી તે કોઈ બીજાના ખાતામાં ટ્રાન્સફર થઈ જાય તો ઘણી વાર પરેશાન થઈ જવાય છે. જોકે, રિફંડ મેળવવા માટેની પ્રક્રિયાઓ પણ છે.
