Last Updated on by Sampurna Samachar
સાવકા પિતાએ ૬ વર્ષની માસૂમ દીકરીને પીંખવાનો પ્રયાસ કર્યો
TCS માં નોકરી કરતા વિકૃત પિતાની કૃષ્ણનગર પોલીસે કરી ધરપકડ; માતાની સમયસૂચકતાથી બાળકી બચી ગઈ
(સંપૂર્ણ સમાચાર સેવા)
અમદાવાદના કૃષ્ણનગર વિસ્તારમાંથી લોહીના સંબંધોને લજવતો અને હચમચાવી મૂકે એવો એક કિસ્સો સામે આવ્યો છે. અહીં એક વિકૃત માનસિકતા ધરાવતા સાવકા પિતાએ પોતાની જ ૬ વર્ષ અને ૧૦ મહિનાની માસૂમ દીકરી પર દુષ્કર્મ આચરવાનો પ્રયાસ કર્યો હતો. સદનસીબે, બાળકીની માતાએ સમયસર પહોંચી જઈને પોતાની દીકરીને આ નરાધમની ચુંગાલમાંથી બચાવી લીધી હતી. આ મામલે માતાએ હિંમત દાખવીને પોલીસમાં ફરિયાદ નોંધાવતા, કૃષ્ણનગર પોલીસે ગણતરીના કલાકોમાં જ આરોપી પિતાની ધરપકડ કરીને કાયદેસરની કાર્યવાહી હાથ ધરી છે.
મળતી માહિતી મુજબ, આ ઘટના બની ત્યારે રાતનો સમય હતો. જમી પરવારીને બાળકીની માતા બેડરૂમની બહાર કપડાં સૂકવી રહી હતી. આ જ તકનો લાભ લઈને ઘરમાં રહેલા સાવકા પિતાની દાનત બગડી અને તેણે ૬ વર્ષની માસૂમ બાળકીને પોતાની હવસનો શિકાર બનાવવાનો પ્રયાસ કર્યો. આરોપીએ જેવી બાળકી સાથે અડપલાં કરવાની શરૂઆત કરી કે તરત જ ગભરાયેલી દીકરીએ જોરથી ચીસાચીસ કરી મૂકી.
ગભરાયેલી દીકરીએ જોરથી ચીસાચીસ કરી મૂકી
બાળકીની બૂમો સાંભળીને માતા તરત જ દોડીને બેડરૂમમાં પહોંચી ગઈ. ત્યાં તેણે જોયું તો આરોપી અને માસૂમ બાળકી વાંધાજનક સ્થિતિમાં હતા. પોતાની દીકરીને આ હાલતમાં જોઈને માતાના પગ નીચેથી જમીન સરકી ગઈ હતી.
જોકે, તેણે સહેજ પણ ડર્યા વગર તાત્કાલિક પોતાની દીકરીને આરોપીના હાથમાંથી આંચકી લીધી અને તેને બચાવી લીધી. આ પછી તરત જ તેણે કૃષ્ણનગર પોલીસ સ્ટેશન દોડી જઈને ફરિયાદ નોંધાવી હતી.આ પરિવારની વાત કરીએ તો, ભોગ બનનાર બાળકીની માતાના પહેલા લગ્ન વર્ષ ૨૦૧૯ માં થયા હતા અને વર્ષ ૨૦૨૦ માં છૂટાછેડા થયા હતા. આ માસૂમ દીકરી એ પહેલા પતિની જ સંતાન છે. ત્યારબાદ ૨૮-૦૮-૨૦૨૧ ના રોજ મહિલાએ આ આરોપી સાથે બીજા લગ્ન કર્યા હતા, જેનાથી તેમને એક દીકરો પણ છે.
આશ્ચર્યની વાત એ છે કે, આ જઘન્ય અપરાધ કરનાર આરોપી કોઈ અભણ કે અશિક્ષિત નથી. તેણે ધોરણ ૧૦ પછી મિકેનિકલ ડિપ્લોમા કર્યું છે અને હાલ તે ગાંધીનગર સ્થિત જાણીતી આઇટી કંપની ટીસીએસમાં નોકરી કરે છે.
પોલીસે આરોપીની ધરપકડ કરી લીધી છે અને તેની સઘન પૂછપરછ શરૂ કરી છે. ભણેલો-ગણેલો અને સારી જગ્યાએ નોકરી કરતો માણસ ૬ વર્ષની માસૂમ સાથે આવું કૃત્ય કઈ રીતે કરી શકે, તે તેની વિકૃત માનસિકતા પર મોટો સવાલ ઊભો કરે છે. પોલીસના જણાવ્યા અનુસાર, અગાઉ તેણે આવું કોઈ કૃત્ય કર્યું હોય તેવો કોઈ ગુનાહિત ઇતિહાસ અત્યાર સુધી સામે આવ્યો નથી, પરંતુ પોલીસ આ દિશામાં ઊંડાણપૂર્વક તપાસ કરી રહી છે.
