Last Updated on by Sampurna Samachar
નરાધમે બળજબરીથી દૂષ્કર્મ આચર્યાનો આણંદનો બનાવ
પ્રેમજાળમાં ફસાવી લગ્ન કરવાની લાલચ આપી હતી
(સંપૂર્ણ સમાચાર સેવા)
આણંદ શહેરમાં રહેતી ૧૭ વર્ષની સગીર વયની કિશોરીને લગ્નની લાલચ આપી મિત્રના ઘરે લઇ જઇ નરાધમે દુષ્કર્મ આચર્યાનુ સામે આવ્યું છે. માહિતી પ્રમાણે મિત્રતા કરી પ્રેમજાળમાં ફસાવીને લગ્ન માટે માતાને મળવા લઈ જવાના બહાને ઉતરસંડા ખાતે મિત્રના ઘરે લઈ જઈ કિશોરી પર દુષ્કર્મ ગુજારી તેનો વિડીયો બનાવી કિશોરીને વિડીયો વાયરલ કરી બદનામ કરવાની ધમકીઓ આપનાર આરોપીને આણંદ ટાઉન પોલીસે ઝડપી પાડ્યો હતો.
પ્રાપ્ત વિગતો અનુસાર આણંદ શહેરમાં ફેબ્રિકેશનના કારખાનામાં કામ કરતા અને સાંગોળપુરામાં રહેતા તુષાર પ્રકાશભાઈ બારૈયાએ ૧૭ વર્ષની સગીર કિશોરી સાથે ઓળખાણ કરી મિત્રતા કરી હતી અને ત્યારબાદ ધીમે ધીમે કિશોરીને પોતાની પ્રેમજાળમાં ફસાવી લગ્ન કરવાની લાલચ આપી હતી.
પોલીસે નરાધમની ધરપકડ કરી કાર્યવાહી હાથ ધરી
સગીર કિશોરી સાથે બદકામ કરવાના ઈરાદે તુષારે સગીર કિશોરીને આપણે લગ્ન કરવાના હોવાથી ચાલ તને મારી માતા પાસે લઈ જઈ તને બતાવી દઉ તેમ કહી સગીર કિશોરીને પોતાની એકટીવા મોપેડ પર બેસાડીને નડિયાદનાં ઉતરસંડા ખાતે સ્ટેશન રોડ પર રહેતા પોતાના મિત્રના ઘરે લઈ ગયો હતો. કિશન ઘરમાં એકલો જ હતો જેથી તુષાર અને સગીર કિશોરીને ઘરમાં બેસાડીને હું હમણાં આવું છું તેમ કહીને કિશન ઘર બંધ કરીને ચાલ્યો ગયો હતો.
તુષાર પ્રકાશ બારૈયાએ સગીરાને હું તને બે વર્ષથી પ્રેમ કરું છું. તું મને તારી સાથે શારીરિક સંબંધ બાંધવા દે. જો તું મને તારી સાથે શરીર સંબંધ બાંધવા નહીં દઉં. તો તું મારી સાથે મોબાઇલ પર વાતો કરતી હતી અને મને મેસેજો કરતી હતી તેની હું તારા ઘરે જાણ કરી દઈશ તેમ કહી તુષારે બળજબરીથી દુષ્કર્મ આચર્યું હતું.
તુષારે કિશોરીને કહ્યું હતું કે મે તારો વિડીયો ઉતારી લીધો છે. તું કોઈને આ બાબતની જાણ કરીશ તો હું આ વિડીયો તારા વિસ્તારમાં વાયરલ કરી તને બદનામ કરી નાખીશ તેવી ધમકીઓ આપી હતી. જેથી સગીર કિશોરી ગભરાઈ ગઈ હતી અને ત્યારબાદ તુષાર કિશોરીને આણંદ શહેરમાં ગ્રીડ ચોકડી પાસે મૂકીને ફરાર થઈ ગયો હતો.
આ ઘટનાથી ડરી ગયેલી સગીર કિશોરી પોતાના ઘરે આવી સૂનમૂન રહેતી હોવાથી પરિવારજનોએ તેણીની પૂછપરછ કરતા સગીરાએ રડતાં રડતાં પોતાના માવતરને સઘળી હકીકત જણાવી હતી. જેને લઈને પરિવારજનો ચોકી ઉઠ્યા હતાં.
પરિવારે આણંદ શહેર પોલીસ મથકે પહોંચી જઈને ફરિયાદ નોંધાવતા પોલીસે તુષાર પ્રકાશભાઈ બારૈયા રહે, સાંઞોળપુરા તથા કિશન સુરેશભાઈ તડવી રહે, ઉત્તરસંડા વિરુદ્ધ દુષ્કર્મની અને પોકસો કલમ હેઠળ ગુનો નોંધી અગાઉ કિશન તડવીને ઝડપી પાડી તેની ધરપકડ કરી હતી.
પોલીસે દુષ્કર્મ ગુજારનાર આરોપી તુષાર પ્રકાશભાઈ બારૈયાને ઝડપી પાડી તેની દુષ્કર્મના ગુનામાં ધરપકડ કરી હતી અને આજે સવારે મેડીકલ કરાવ્યા બાદ ઉતરસંડા ખાતે ઘટના સ્થળે લઈ જઈ સમગ્ર ઘટનાનું રિકન્ટ્રક્શન કરવામાં આવ્યું હતું.
