Last Updated on by Sampurna Samachar
ઉત્તર પ્રદેશ સ્પેશિયલ ટાસ્ક ફોર્સે કરી ધરપકડ
એવા દેશોનો રાજદૂત કે જે નકશામાં પણ નથી
(સંપૂર્ણ સમાચાર સેવા)
ઉત્તર પ્રદેશ સ્પેશિયલ ટાસ્ક ફોર્સ (STF) ના નોઈડા યુનિટે ગાઝિયાબાદના હર્ષવર્ધનની ધરપકડ કરી છે અને એવો ખુલાસો કર્યો છે જેનાથી સુરક્ષા અને ગુપ્તચર એજન્સીઓ પણ ચોંકી ગઈ છે. હર્ષવર્ધન જૈન ગાઝિયાબાદના કવિનગર વિસ્તારમાં નકલી દૂતાવાસ ચલાવતો હતો. તે પોતાને એવા દેશોનો રાજદૂત કહેતો હતો, જે વાસ્તવમાં વિશ્વના નકશા પર અસ્તિત્વમાં નથી. આ નેટવર્ક માત્ર નકલી ઓળખની મદદથી જ ચાલતું નહોતું પરંતુ હવાલા અને તેના દ્વારા વિદેશી ચલણના ગેરકાયદેસર વ્યવહાર જેવી પ્રવૃત્તિઓ પણ ચલાવતો હતો.
તપાસમાં બહાર આવ્યું છે કે હર્ષવર્ધન જૈન પોતાને માઈક્રોનેશન અથવા નકલી દેશોનો રાજદૂત કહેતો હતો. તેણે West Arctica, Saborga, Poulvia, Lodonia ના નામે દૂતાવાસો ખોલ્યા હતા. ખાસ વાત એ છે કે ઇન્ટરનેટ પર ક્યાંય આ દેશોનો ઉલ્લેખ નથી. જો તમે ગૂગલ પર Saborga શોધશો, તો તમને ખબર પડશે કે એવો કોઈ દેશ નથી, પરંતુ એક ગામ અને સૂક્ષ્મ રાષ્ટ્ર છે જેને દેશનો દરજ્જો મળ્યો નથી.
આંતરરાષ્ટ્રીય રાજદ્વારી વ્યક્તિ સાબિત કરવા અનેક પેંતરા
બીજું નામ Poulvia હતું, જેને શોધવા પર કેટલાક લોકોના નામનું શીર્ષક મળે છે. તેવી જ રીતે જ્યારે Lodonia ને સર્ચ કરતા જાણવા મળ્યું કે આ એક પ્રયોગશાળાનું નામ છે. આ વ્યક્તિ એક દેશનું નામ West Arctica લખતો હતો, જેને સર્ચ કરતા જાણવા મળ્યું કે આ સંયુક્ત રાષ્ટ્ર માટે કામ કરતી એક બિન-લાભકારી સંસ્થાનું નામ છે.
હર્ષવર્ધને ગાઝિયાબાદના KB 35 કવિનગર ખાતે સ્થિત ભાડાના બંગલામાં આ નામોથી દૂતાવાસ જેવું સંપૂર્ણ સેટઅપ બનાવ્યું હતું. અહીં, વિદેશી ફ્લેગ, નકલી રાજદ્વારી પાસપોર્ટ અને નકલી દસ્તાવેજો દ્વારા પોતાને આંતરરાષ્ટ્રીય રાજદ્વારી ગણાવીને લોકોને છેતરવામાં આવતા હતા. હર્ષવર્ધને વડાપ્રધાન નરેન્દ્ર મોદી સાથેનો નકલી ફોટો બનાવ્યો હતો.
૨૨ જુલાઈ, ૨૦૨૫ના રોજ નોઈડા STF એ આ નકલી દૂતાવાસ પર દરોડો પાડ્યો અને હર્ષવર્ધન જૈનની ધરપકડ કરી. પૂછપરછ દરમિયાન એવું જાણવા મળ્યું કે તેણે પોતાનો પ્રભાવ વધારવા માટે વડાપ્રધાન નરેન્દ્ર મોદી, ભૂતપૂર્વ રાષ્ટ્રપતિ એપીજે અબ્દુલ કલામ અને અન્ય વિદેશી નેતાઓ સાથેના પોતાના મોર્ફ કરેલા ફોટોગ્રાફ્સનો ઉપયોગ કર્યો હતો.
આ સમગ્ર કામગીરી પાછળનો તેનો મુખ્ય ઉદ્દેશ્ય વિદેશમાં નકલી નોકરીઓનું વચન આપીને લોકો પાસેથી પૈસા પડાવવાનો, શેલ કંપનીઓ દ્વારા હવાલાનો વ્યવસાય કરવાનો અને નકલી પાસપોર્ટ અને વિદેશી ચલણનો ગેરકાયદેસર વેપાર કરવાનો હતો, તેમજ ખાનગી કંપનીઓને વિદેશી જોડાણો આપવાના નામે દલાલી કરવાનો હતો.
હર્ષવર્ધન જૈન કોઈ નવું નામ નથી. ૨૦૧૧માં પણ ગેરકાયદેસર સેટેલાઇટ ફોન રાખવા બદલ તેની સામે કેસ નોંધવામાં આવ્યો હતો, જેની FIR કવિનગર પોલીસ સ્ટેશનમાં નોંધાયેલી છે. આ ઉપરાંત તે વિવાદાસ્પદ આધ્યાત્મિક ગુરુ ચંદ્રાસ્વામી અને આંતરરાષ્ટ્રીય વેપારી અદનાન ખાગોશી સાથે પણ સંપર્કમાં રહ્યો છે. જે સૂચવે છે કે આરોપીનું નેટવર્ક ફક્ત સ્થાનિક કે રાજ્ય સ્તર સાથે જ નહીં, પરંતુ આંતરરાષ્ટ્રીય શંકાસ્પદ પ્રવૃત્તિઓ સાથે પણ જોડાયેલું છે.
એસટીએફ દ્વારા હાથ ધરવામાં આવેલી સર્ચ દરમિયાન જપ્ત કરાયેલી વસ્તુઓમાંથી રાજદ્વારી નંબર પ્લેટવાળી ચાર લક્ઝરી કાર મળી આવી હતી. ૧૨ રાજદ્વારી પાસપોર્ટ જે નકલી માઇક્રોનેશનના નામે બનાવવામાં આવ્યા હતા. ભારતીય વિદેશ મંત્રાલયની સીલ ધરાવતા નકલી દસ્તાવેજો, બે નકલી પાન કાર્ડ, ૩૪ અલગ અલગ કંપનીઓ અને દેશોના નકલી સીલ, બે નકલી પ્રેસ કાર્ડ, ૪૪,૭૦,૦૦૦ રૂપિયા રોકડા અને ઘણા દેશોના વિદેશી ચલણ ઉપરાંત ૧૮ અલગ અલગ રાજદ્વારી નંબર પ્લેટ મળી આવી છે. આરોપીએ આ બધી વસ્તુઓનો ઉપયોગ પોતાને આંતરરાષ્ટ્રીય રાજદ્વારી વ્યક્તિ તરીકે સાબિત કરવા માટે કર્યો હતો.
હાલમાં, આરોપી વિરુદ્ધ ગાઝિયાબાદના કવિનગર પોલીસ સ્ટેશનમાં કેસ નોંધવામાં આવ્યો છે અને પૂછપરછ ચાલી રહી છે. STF એ પણ તપાસ કરી રહી છે કે કોની સાથે નાણાકીય વ્યવહારો થયા, આ દ્વારા વિદેશમાં સંપર્કો મેળવવા માટે કેટલી કંપનીઓને લાલચ આપવામાં આવી અને આ વ્યક્તિ કયા હવાલા નેટવર્ક સાથે જાેડાયેલો હતો. તપાસ એજન્સીઓ એવું પણ માને છે કે આ કેસના મૂળ દેશની બહાર પણ હોઈ શકે છે.
