Last Updated on by Sampurna Samachar
સરકારી વકીલની સેવા ગૃહ વિભાગ હસ્તક સોંપી દેવાઈ
(સંપૂર્ણ સમાચાર સેવા)
રાજ્યના કાયદા વિભાગની સત્તામાં ઘટાડો કરાયો હોય તેમ રાજ્યની અલગ અલગ અદાલતોમાં ચાલતા ફોજદારી કેસમાં સરકારી વકીલની સેવા ગૃહ વિભાગ હસ્તક સોંપી દેવાઈ છે. એક મહત્વપૂર્ણ વહીવટી ર્નિણયમાં રાજ્ય સરકારે રાજ્યભરની તમામ અદાલતોમાં ફોજદારી કેસોમાં કાર્યવાહી સંબંધિત તમામ બાબતો રાજ્યના કાનૂની વિભાગથી ગૃહ વિભાગને સોંપી દીધી છે.
આ ર્નિણય સાથે, જિલ્લા અદાલતો અને ગુજરાત હાઈકોર્ટ સહિત તમામ અદાલતોમાં સરકારી વકીલોની સેવાઓનું નિયમન કરવાનું મહત્વપૂર્ણ કાર્ય હવેથી રાજ્યના ગૃહ વિભાગના કાર્યક્ષેત્ર હેઠળ આવશે. સરકારી વકીલો અને સહાયક/વધારાના સરકારી વકીલોની નિમણૂક ઉપરાંત, ખાસ સરકારી વકીલોની નિમણૂક પણ ગૃહ વિભાગ દ્વારા સંચાલિત કરવામાં આવશે.
આમ ગૃહ વિભાગ, જે મુખ્યત્વે પોલીસ સેવાઓનું સંચાલન કરે છે તે ફોજદારી કેસોમાં કોર્ટ કાર્યવાહીના પાસાંનું પણ સંચાલન કરશે, જેની તપાસ પોલીસ એજન્સીઓ દ્વારા કરવામાં આવે છે. એક ઠરાવમાં રાજ્યના કાનૂની વિભાગે જણાવ્યું છે કે તેમને રાજ્ય સરકાર તરફથી આદેશ મળ્યો છે કે કાનૂની વિભાગના કાર્યક્ષેત્ર હેઠળની બધી શાખાઓ જે અત્યાર સુધી ફોજદારી કાર્યવાહીનું ધ્યાન રાખી રહી છે તેમને રાજ્યના ગૃહ વિભાગમાં ટ્રાન્સફર કરવામાં આવ્યા છે. તેમાં જણાવાયું છે કે જિલ્લાઓમાં ફોજદારી કેસોનું ધ્યાન રાખતી ઇ-૧ શાખા તેને ફાળવવામાં આવેલા વિષયો, રેકોર્ડ, રજિસ્ટ્રાર અને સ્ટાફને રાજ્યના ગૃહ વિભાગને ટ્રાન્સફર કરશે.
તેવી જ રીતે કાનૂની વિભાગમાં બી-શાખા જે ફોજદારી કેસોમાં ચુકાદાઓ સામે દાખલ કરાયેલી અપીલોનું ધ્યાન રાખે છે તે પણ તેના સંસાધનો રાજ્યના ગૃહ વિભાગને ટ્રાન્સફર કરશે. અગાઉ IPC ની કલમ ૧૮, અને હવે ભારતીય નાગરિક સુરક્ષા સંહિતાની કલમ ૧૮ રાજ્ય સરકારને ફરિયાદીઓની નિમણૂક અને નિયમન કરવાની સત્તા આપે છે.
