Last Updated on by Sampurna Samachar
આરોપી અગાઉ ૨૦ કિલો ચરસ સાથે ઝડપાયો હતો
(સંપૂર્ણ સમાચાર સેવા)
ગુજરાત ATS ની ટીમ દ્વારા અમદાવાદ શહેરના લાલ દરવાજા વિસ્તારમાંથી ડ્રગ્સ ઝડપી લેવામાં આવ્યું છે. ATS એ રૂ.૨૭ લાખના MD ડ્રગ્સ સાથે ફરજાન શેખની ધરપકડ કરી છે. ઝડપાયેલો શખસ ડ્રગ પેડલર છે. અગાઉ પણ તે ડ્રગ્સની હેરાફેરી કરતા ઝડપાયો છે. આ અંગે ATS ની ટીમે વધુ તપાસ શરૂ કરી છે.
જાણવા મળ્યા અનુસાર ગુજરાત ATS નો સ્ટાફ અમદાવાદમાં ચાલતી ગેરકાયદે પ્રવૃત્તિઓ ડામવા પેટ્રોલીંગમાં હોય ત્યારે બાતમી મળી હતી કે લાલ દરવાજા વિસ્તારમાં એક આરોપી ડ્રગ્સ લઈને આવે છે ત્યારે તેને રોકીને તપાસ કરતા તેની પાસેથી ડ્રગ્સ મળી આવ્યું હતુ જેની કિંમત ૨૭ લાખ રૂપિયા છે.
ATS દ્વારા આરોપી ફરજાન શેખની ધરપકડ કરવામાં આવી છે અને ડ્રગ્સ કયાંથી લાવ્યો અને કોને આપવાનો હતો તે દિશામાં તપાસ હાથધરી છે. આરોપીને લઈ પોલીસે તેના મોબાઈલ ફોનનો ડેટા પણ લીધો છે અને અગાઉ કયાં ડ્રગ્સ આપ્યું અને કોની પાસેથી લાવ્યો તેને લઈ ટેકનિકલી તપાસ હાથધરી છે. આરોપી અગાઉ ૨૦ કિલો ચરસ સાથે ઝડપાયો હતો એટલે આરોપી ગુનાહિત ઈતિહાસ ધરાવે છે અને તે ડ્રગ્સ અને ચરસના ધંધા સાથે સંકળાયેલો છે. પોલીસે અન્ય સંડોવાયેલ આરોપીઓની તપાસ શરૂ કરી છે.
