Last Updated on by Sampurna Samachar
GST ચોરીનો આંકડો ૧ લાખ કરોડની સપાટી વટાવી ગયો
ગુજરાતના વાર્ષિક બજેટથી પણ બમણી
(સંપૂર્ણ સમાચાર સેવા)
દેશના કર માળખામાં પારદર્શિતા તેમજ કરચોરી અટકાવવા લાગુ કરવામાં આવેલી વન નેશન વન ટેક્સ સિસ્ટમ GST માં જ ચોરીનું પ્રમાણ સતત વધી રહ્યું છે. સેન્ટ્રલ ગુડ્સ એન્ડ સર્વિસિઝ ટેક્સ (GST) ના ફિલ્ડ અધિકારીઓએ દેશમાં છેલ્લા પાંચ વર્ષમાં રૂ. ૭.૦૮ લાખ કરોડની GST ચોરી શોધી કાઢી છે. જેમાં રૂ. ૧.૭૯ લાખ કરોડની ઈનપુટ ટેક્સ ક્રેડિટ ફ્રોડ પણ સામેલ હોવાનું આજે લોકસભામાં જણાવવામાં આવ્યું હતું.
નાણાં રાજ્ય મંત્રી પંકજ ચૌધરીએ લોકસભામાં આંકડાઓ રજૂ કરતાં કહ્યું કે, ૨૦૨૪-૨૫માં રૂ. ૨.૨૩ લાખ કરોડની GST ચોરી શોધી કાઢવામાં આવી છે. છેલ્લા પાંચ નાણાકીય વર્ષમાં દેશમાં કુલ રૂ. ૭.૦૮ લાખ કરોડની GST ચોરી થઈ હતી. જે ગુજરાત સરકાર દ્વારા ફાળવવામાં આવેલા તેના વાર્ષિક બજેટ કરતાં બમણી છે.
GST ના અમલીકરણને કુલ આઠ વર્ષ થયા
નોંધનીય છે, ગુજરાત સરકારે ૨૦૨૪-૨૫માં રૂ. ૩.૩૨ લાખ કરોડ અને ૨૦૨૫-૨૬ માટે રૂ. ૩.૭૦ લાખ કરોડનું બજેટ ફાળવ્યું હતું. ગત નાણાકીય વર્ષ ૨૦૨૪-૨૫માં જીએસટી ચોરીના નોંધાયેલા કુલ ૩૦૦૫૬ કેસમાંથી ૧૫૨૮૩ કેસ ITC (ઈનપુટ ટેક્સ ક્રેડિટ) ફ્રોડના હતાં. જેમાં રૂ. ૫૮૭૭૨ કરોડની આઈટીસી ચોરી થઈ હતી. ૨૦૨૩-૨૪માં પણ CGST ના ફિલ્ડ અધિકારીઓએ રૂ. ૨.૩૦ લાખ કરોડની GST ચોરી પકડી પાડી હતી. જેમાં રૂ. ૩૬૩૭૪ કરોડનું ITC ફ્રોડ સામેલ હતું.
GST ના અમલીકરણને કુલ આઠ વર્ષ થયા છે. કર નીતિઓને સરળ બનાવવા તેમજ પારદર્શિતા વધારવા ૨૦૧૭માં લાગુ જીએસટીમાં ફ્રોડનું પ્રમાણ પણ સમય જતાં વધી રહ્યું છે. છેલ્લા ત્રણ વર્ષની તુલના કરીએ તો જીએસટી કલેક્શનની સાથે સાથે GST ચોરીનો આંકડો પણ ૧ લાખ કરોડની સપાટી વટાવી ગયો છે. સાથે સાથે ફેક ઈનપુટ ટેક્સ ક્રેડિટનું પ્રમાણ પણ વધ્યું છે.
ચૌધરીએ GST ચોરી વિશે આંકડાઓ રજૂ કરતાં અંતે કહ્યું હતં કે, કેન્દ્ર સરકાર અને જીએસટીએન આ ટેક્સ ચોરીને અટકાવવા માટે વિવિધ પગલાં લઈ રહી છે. જેના માટે ઈ-ઈનવોઈસિંગ, જીએસટી એનાલિટિક્સ મારફત ડિજિટાઈઝેશન પર ભાર મૂકવામાં આવ્યો છે. સિસ્ટમ-ફ્લેગ મિસમેચના આધાર પર આઉટલેયરને ઉજાગર કરવુ, સ્ક્રૂટિની માટે રિટર્નની પસંદગી અને કાર્યવાહી વિશે જાણકારી આપવી, તેમજ જોખમના વિવિધ માપદંડો પર ઓડિટના આધારે કરદાતાઓની પસંદગી કરવી વગેરે સામેલ છે. આ પગલાંઓ જીએસટી ચોરી કરનારાઓ પર અંકુશ લાદી પકડી પાડે છે.
