Last Updated on by Sampurna Samachar
ડોલરની તેજીને ધ્યાનમાં લેતાં રૂપિયો વધુ તૂટવાની ભીતિ
(સંપૂર્ણ સમાચાર સેવા)
દેશના ફોરેક્સ રિઝર્વમાં સતત ઘટાડો તેમજ GDP ગ્રોથ મંદ પડવા પાછળ RBI ના પૂર્વ ગવર્નર શક્તિકાંત દાસને જવાબદાર ઠેરવવામાં આવ્યા છે. દેશનું ફોરેક્સ રિઝર્વ ૩ જાન્યુઆરીએ ૬૩૪ અબજ ડોલર સાથે ૧૦ માસના તળિયે પહોંચ્યું છે. જે ઓલટાઈમ હાઈથી અત્યારસુધીમાં ૭૦ અબજ ડોલર ઘટી ચૂક્યું છે. આ ઘટના માટે પણ SBI મ્યુચ્યુઅલ ફંડના પૂર્વ ઈક્વિટી હેડ સંદીપ સભરવાલ શક્તિકાંત દાસની પોલિસીને જવાબદાર ઠેરવી રહ્યા છે.
સભરવાલે સોશિયલ મીડિયા X પર ટિ્વટ કર્યું હતું કે, ભારતનું ફોરેક્સ રિઝર્વ દસ માસના તળિયે પહોંચ્યું છે. RBI ના પૂર્વ ગવર્નરની પોલિસીઓના કારણે રૂપિયો સ્થિર રહ્યો હતો. જ્યારે બીજી તરફ ડોલર તમામ કરન્સીઓના મુકાબલે ઝડપથી વધી રહ્યો હતો. સ્પોટ અને ફોરવર્ડ ડોલરની વેચવાલીના કારણે ફોરેક્સ રિઝર્વ ઘટ્યું છે. દાસએ GDP ગ્રોથ જાણી જોઈને વધારીને રજૂ કર્યો અને કેશને સીમિત રાખતાં વ્યાજદરો ઊંચા રાખ્યાં, તેના કારણે GDP ગ્રોથ મંદ પડ્યો છે. તેમની આ નીતિઓનો ભોગ દેશ બન્યો છે.
શક્તિકાંત દાસના કાર્યકાળ દરમિયાન, વૈશ્વિક ઉથલપાથલ વચ્ચે રૂપિયાને સ્થિર કરવા માટે RBI એ ફોરેક્સ રિઝર્વ માર્કેટમાં આક્રમક રીતે હસ્તક્ષેપ કર્યો હતો. ત્યારે આ ક્રિયાઓ તાત્કાલિક સ્થિરતા પ્રદાન કરવા માટે વ્યાપકપણે વખાણવામાં આવી હતી. પરંતુ વાસ્તવમાં તેની કિંમત ચૂકવવી પડી, જેનાથી રિઝર્વ ઘટી અને લિક્વિડિટી પણ ઘટી છે.
બજાર વિશ્લેષકોએ જણાવ્યું હતું કે દાસના કાર્યકાળ દરમિયાન, RBI એ રૂપિયાની વોલિટિલિટી ઘટાડવા ફોરેક્સ રિઝર્વની વેચવાલી નોંધાવી હતી. આ અભિગમને ટૂંકા ગાળા માટે સ્થિરતા પ્રદાન કરવા માટે સફળ રહ્યો પરંતુ લાંબા ગાળે તેની વિપરિત અસરો થઈ.
RBI ના તાજેતરના ડેટા અનુસાર, ભારતનું ફોરેક્સ રિઝર્વ સળંગ પાંચ સપ્તાહથી ઘટી ૩ જાન્યુઆરી સુધીમાં ૬૩૪.૫૯ અબજ ડોલરે પહોંચ્યું હતું. જે સપ્ટેમ્બર અંતમાં ૭૦૪.૮૯ અબજ ડોલરની ઓલટાઈમ હાઈ સપાટીએ હતું. નોમુરાના વિશ્લેષકોએ જણાવ્યું કે, RBI ની દખલગીરીથી કેપિટલ આઉટફ્લો અને ડોલર જમાખોરીમાં વૃદ્ધિ થઈ શકે છે. આગામી સમયમાં ડોલરની તેજીને ધ્યાનમાં લેતાં રૂપિયો વધુ તૂટવાની ભીતિ જોવા મળી છે. ભારતનો GDP ગ્રોથ પણ ૨૦૨૪-૨૫માં ૬.૪ ટકા રહેવાનો અંદાજ છે. જે ચાર વર્ષના તળિયે છે.
