Last Updated on by Sampurna Samachar
જાડેજાને ભારતીય ટીમમાં સ્પેશિયલ ટેગ અપાયું
જાડેજાથી ઇંગ્લેન્ડ ટીમનો કેપ્ટન પણ પ્રભાવિત
(સંપૂર્ણ સમાચાર સેવા)
ભારતીય ટીમના સ્પિનર રવિન્દ્ર જાડેજાને સ્પેશ્યલ ઇનામ આપવામાં આવ્યું છે. જાડેજાએ એકલા હાથે પૂછડિયા ખેલાડીઓનો સાથ આપીને ભારતને લોર્ડ્સના ઐતિહાસિક મેદાનમાં જીત અપાવવાની કોશિશ કરી હતી. જોકે, જાડેજાએ જે રીતે ભારતને જીત અપાવવા માટેના પ્રયાસ કર્યા તે પણ ગર્વની વાત રહી અને અંગ્રેજો બાપુને જીત્યા પછી સલામ કરવા લાગ્યા હતા.
ભારતના મુખ્ય કોચ ગૌતમ ગંભીરે ઓલરાઉન્ડર રવિન્દ્ર જાડેજાની પ્રશંસા કરી છે અને ઇંગ્લેન્ડ સામે લોર્ડ્સ ટેસ્ટમાં તેના પ્રદર્શનને અવિશ્વસનીય ગણાવી છે. આવી રમત માટે જાડેજાને ટીમનો મોસ્ટ વેલ્યુએબલ પ્લેયર (MVP) નો એવોર્ડ પણ એનાયત કરવામાં આવ્યો હતો. મેચના છેલ્લા દિવસે રવિન્દ્ર જાડેજાએ ૧૮૧ બોલમાં ૬૧ રનની અણનમ ઇનિંગ રમી હતી. તેની શાનદાર ઇનિંગ્સ છતાં, ભારત ત્રીજી ટેસ્ટ ૨૨ રનથી હારી ગયું હતું.
અમારી ટીમમાં આવો ખેલાડી હોવાથી અમે ભાગ્યશાળી
ભારતીય ક્રિકેટ કંટ્રોલ બોર્ડ (BCCI) એ વેબસાઇટ પર એક વીડિયો જાહેર કર્યો છે જેમાં ગંભીરે જાડેજાની ખૂબ પ્રશંસા કરી છે. “તે અવિશ્વસનીય હતું,” ગંભીરે ધ MVP , રવિન્દ્ર જાડેજા નામના વીડિયોમાં કહ્યું. જડ્ડુની લડાયક ઇનિંગ્સ ખરેખર શાનદાર હતી. ૧૯૩ રનના લક્ષ્યાંકનો પીછો કરતી વખતે ભારતીય ટીમ નિષ્ફળ ગઈ અને તેના ટોચના ૮ બેટ્સમેનો ૪૦ ઓવર સુધી પણ ટકી શક્યા નહોતા. આવી મુશ્કેલ પરિસ્થિતિમાં સાતમા નંબરે બેટિંગ કરવા આવતા, જાડેજાએ પોતાનું સ્થાન જાળવી રાખ્યું અને નીચલા ક્રમના બેટ્સમેન જસપ્રીત બુમરાહ અને મોહમ્મદ સિરાજ સાથે મળીને ખૂબ જ હિંમત અને ધીરજ બતાવી.
જાડેજાનો સાથ આપીને જસપ્રીત બુમરાહે ૫૪ બોલનો સામનો કર્યો અને પાંચ રન બનાવ્યા હતા, જ્યારે સિરાજે ૩૦ બોલમાં ચાર રન બનાવ્યા હતા. ભારત ૭૪.૫ ઓવરમાં ૧૭૦ રનમાં ઓલઆઉટ થઈ ગયું અને આમ પાંચ મેચની સીરિઝ ૧-૨ થી પાછળ રહી ગયું. જોકે, રવિન્દ્ર જાડેજાથી ઈંગ્લિશ ટીમનો કેપ્ટન બેન સ્ટોક પણ પ્રભાવિત થયો હતો અને તેણે મેચ જીત્યા બાદ જાડેજા પાસે આવીને તેની પીઠ થાબડી હતી. વીડિયોમાં, સહાયક કોચ રાયન ટેન ડોશેટે કહ્યું, જાડેજાની બેટિંગ એક અલગ જ સ્તરે પહોંચી ગઈ છે. છેલ્લી બે ટેસ્ટ મેચોમાં તેણે જે ધીરજ બતાવી તે ખરેખર પ્રશંસનીય છે. હું તેને વર્ષોથી રમતા જોઈ રહ્યો છું. મેં જોયું છે કે તેણે પોતાની રમતમાં કેટલો સુધારો કર્યો છે. તેનો બચાવ ખૂબ જ મજબૂત છે અને તે એક મહાન બેટ્સમેન લાગી રહ્યો છે. હવે જાડેજાને MVP ટેગ આપવામાં આવ્યું છે. જે એક મોટી સિદ્ધી છે.
ભારતના બેટિંગ કોચ સિતાંશુ કોટકે કહ્યું, મને હંમેશા લાગતું હતું કે તેનામાં દબાણનો સામનો કરવાની ક્ષમતા છે. તે સામાન્ય રીતે કોઈ પણ પડકારજનક પરિસ્થિતિમાં ટીમને જે જોઈએ છે તે કરે છે. તે ટીમ માટે ખરેખર ખૂબ જ મૂલ્યવાન છે. ફાસ્ટ બોલર સિરાજે કહ્યું, તેના જેવો ખેલાડી શોધવો ખૂબ મુશ્કેલ છે. અમારી ટીમમાં આવો ખેલાડી હોવાથી અમે ભાગ્યશાળી છીએ.
