Last Updated on by Sampurna Samachar
સાવધાન! અત્યારે પેમેન્ટ કરી દો, કાલે સિલિન્ડર મળી જશે
લોકો ગેસની અછતથી ચિંતિત હોવાથી છેતરાઈ રહ્યા છે
(સંપૂર્ણ સમાચાર સેવા)
દુનિયાના કેટલાક ભાગોમાં ચાલી રહેલા યુદ્ધની અસર હવે સામાન્ય માણસના રસોડા સુધી પહોંચી છે. ભારતમાં ગેસ સિલિન્ડરની અછતનો ફાયદો ઉઠાવીને સાયબર ઠગ હવે સક્રિય થયા છે.
સોશિયલ મીડિયા, WhatssApp અને SMS દ્વારા એક નવો સ્કેમ તેજીથી ફેલાઈ રહ્યો છે, જેમાં LPG સિલિન્ડર યુઝર્સને નિશાન બનાવવામાં આવી રહ્યા છે. ઠગબાજો લોકોને એવા મેસેજ મોકલે છે કે જો તમે અત્યારે ઓનલાઇન પેમેન્ટ કરશો, તો બીજા જ દિવસે ગેસ સિલિન્ડર તમારા ઘરે પહોંચી જશે. લોકો ગેસની અછતથી ચિંતિત હોવાથી આ લાલચમાં આવીને છેતરાઈ રહ્યા છે.
મોડું કર્યા વગર ૧૯૩૦ સાયબર ક્રાઈમ હેલ્પલાઇન પર કોલ કરવો
આ સાયબર ફ્રોડ મુખ્યત્વે ત્રણ સ્ટેપ્સમાં કામ કરે છે. સૌથી પહેલા સોશિયલ મીડિયા પર નકલી એડ બતાવવામાં આવે છે, જેમાં ત્વરિત ગેસ ડિલિવરીનો વાયદો હોય છે. જ્યારે કોઈ વ્યક્તિ આ એડ કે લિંક પર ક્લિક કરે છે, ત્યારે તે એક એવી વેબસાઇટ પર પહોંચી જાય છે જે અસલી ગેસ કંપની જેવી જ દેખાતી હોય છે. અહીં યુઝર્સ પાસેથી બેન્ક ડિટેલ્સ,UPI આઈડી કે ઓનલાઇન પેમેન્ટ માંગવામાં આવે છે.
જેવા તમે પૈસા ચૂકવો કે તમારી વિગતો આપો, તરત જ ઠગબાજો તમારા ખાતામાંથી રકમ ઉપાડીને ગાયબ થઈ જાય છે. ઘણીવાર તો એવા પણ મેસેજ આવે છે કે જો અત્યારે બુકિંગ નહીં કરો તો સિલિન્ડર બીજાને આપી દેવાશે, જેના ડરથી લોકો ઉતાવળમાં ભૂલ કરી બેસે છે.
સાયબર એક્સપર્ટ્સ અને પોલીસ દ્વારા આ બાબતે એલર્ટ જાહેર કરવામાં આવ્યું છે. યાદ રાખો કે Indane,BharatGas કે HP જેવી અધિકૃત કંપનીઓ ક્યારેય પણ અજાણી લિંક દ્વારા પેમેન્ટની માંગણી કરતી નથી.
ગેસ સિલિન્ડર બુક કરાવવા માટે હંમેશા કંપનીની અધિકૃત વેબસાઇટ અથવા ઓફિશિયલ એપનો જ ઉપયોગ કરવો જોઈએ. કોઈ પણ અજાણ્યા વ્યક્તિ સાથે OTP,UPI પિન કે બેન્કની વિગતો શેર ન કરવી. જો તમારી સાથે આવો કોઈ ફ્રોડ થાય, તો જરાય મોડું કર્યા વગર ૧૯૩૦ સાયબર ક્રાઈમ હેલ્પલાઇન પર કોલ કરવો અથવા WEBSITE પર ફરિયાદ નોંધાવવી જોઈએ.
