Last Updated on by Sampurna Samachar
આશિષ કપૂર પર બાથરૂમમાં દુષ્કર્મ કરવાનો આરોપ લગાવ્યો
યે રિશ્તા ક્યા કહેલાતા હૈથી જાણીતો થયો
(સંપૂર્ણ સમાચાર સેવા)
પોપ્યુલર ટીવી અભિનેતા આશિષ કપૂર પર દુષ્કર્મનો આરોપ લાગ્યો હોવાના સમાચાર સામે આવ્યા છે, જેનાથી ચાહકો ચોંકી ગયા છે. અભિનેતાની પુણે પોલીસે ધરપકડ કરી લીધી છે. પીડિતાએ ઓગસ્ટમાં દિલ્હીમાં એક હાઉસ પાર્ટી દરમિયાન આશિષ કપૂર પર બાથરૂમમાં દુષ્કર્મ કરવાનો આરોપ લગાવ્યો છે. દિલ્હીના સિવિલ લાઈન્સ પોલીસ સ્ટેશનમાં આશિષ વિરુદ્ધ કેસ નોંધવામાં આવ્યો છે.
આશિષ કપૂર ટીવી જગતનો એક જાણીતો ચહેરો છે. ટીવી ઉપરાંત તેણે ફિલ્મોમાં પણ કામ કર્યું છે. તે ઈન્સ્ટાગ્રામ પર પણ એક્ટિવ છે અને તેની સારી ફેન ફોલોઈંગ છે. જોકે, હવે આ એકાઉન્ટ બંધ કરી દેવામાં આવ્યું છે.
આશિષ કપૂરે અનેક ટીવી સિરિયલમાં કર્યૂ કામ
આશિષ કપૂર સરસ્વતીચંદ્ર, લવ મેરેજ યા અરેન્જ્ડ મેરેજ, ચાંદ છુપા બાદલ મેં, શ્શ્શ… ફિર કોઈ હૈ, સસુરાલ સિમર કા ૨, સાત ફેરે-સલોની કા સફર, દેખા એક મો ખ્વાબ, મોલક્કી રિશ્તો કી અગ્નિપરીક્ષા, યે રિશ્તા ક્યા કહેલાતા હૈ, વો અપના સા અને બંદિની જેવા ટીવી શોમાં નજર આવી ચૂક્યો છે. તેણે ટેબલ નંબર ૨૧ અને કુર્બાન જેવી ફિલ્મો પણ કામ કર્યું છે.
આશિષને ટીવી શો દેખા એક ખ્વાબમાં ઉદયવીર સિંહના પાત્રથી લોકપ્રિયતા મળી હતી. ટીવીની દુનિયામાં આવતા પહેલા આશિષ કપૂરે ઈન્ટિરિયર ડિઝાઈનર તરીકે પણ કામ કર્યું હતું. તેણે ટીવી શો શ્શ્શ…કોઈ હૈ થી એક્ટિંગ ડેબ્યૂ કર્યું હતું.
આશિષ કપૂર પોતાની પર્સનલ લાઈફને લઈને પણ ખૂબ ચર્ચામાં રહ્યો છે. તે પહેલા કો-સ્ટાર પ્રિયલ ગૌરને ડેટ કરી રહ્યો હતો, પરંતુ બાદમાં તેમનું બ્રેકઅપ થઈ ગયું. બ્રેકઅપ પછી પણ તેમની મિત્રતા ચાલુ રહી. બાદમાં આશિષે અલ્બેનિયન મોડેલ ઈલ્ડા ક્રોનીને ડેટ કરી. આ સંબંધ પણ તૂટી ગયો.
આશિષ કપૂરે એપ્રિલ ૨૦૨૧માં ટીવી પ્રોડ્યૂસર પર્લ ગ્રે સાથે સગાઈ કરી હતી. બંનેએ મેચિંગ ટેટૂ પણ બનાવ્યા હતા. પર્લ ગ્રે અને આશિષની મુલાકાત ટીવી શો મન કી આવાઝ પ્રતિજ્ઞા ૨ ના સેટ પર થઈ હતી. જોકે, માત્ર એક જ વર્ષમાં તેમની સગાઈ તૂટી ગઈ. આશિષ કપૂર લાંબા સમયથી ટીવી અને ફિલ્મોની દુનિયાથી દૂર હતો અને હવે તે દુષ્કર્મના કેસમાં ફસાઈ ગયો છે.
એક અહેવાલ પ્રમાણે પોલીસે અનેક સ્થળોએ આશિષ કપૂરની ગતિવિધિઓ પર નજર રાખ્યા બાદ પુણેથી તેની ધરપકડ કરી છે. પોલીસના જણાવ્યા પ્રમાણે પીડિતાએ આરોપ લગાવ્યો છે કે, ઓગસ્ટના બીજા અઠવાડિયામાં દિલ્હીમાં એક હાઉસ પાર્ટી દરમિયાન આશિષે બાથરૂમમાં તેની સાથે દુષ્કર્મ આચર્યું હતું. ૧૧ ઓગસ્ટના રોજ ફરિયાદ નોંધ્યા પછી પોલીસે આશિષ કપૂરની તલાશ શરૂ કરી દીધી હતી.
પોલીસ અધિકારીઓએ જણાવ્યું કે, પીડિતાએ પોતાની શરૂઆતની ફરિયાદમાં કેટલાક અન્ય લોકોના નામ લીધા હતા, પરંતુ બાદમાં તેણે પોતાનું નિવેદન બદલી નાખ્યું.
પહેલા નિવેદનમાં પીડિતાએ આરોપ લગાવ્યો હતો કે, આશિષે કેટલાક અજાણ્યા લોકો સાથે મળીને મારી સાથે દુષ્કર્મ આચર્યું. બાદમાં તેણે માત્ર આશિષ પર જ આરોપ લગાવ્યો હતો. પીડિતાએ એવો પણ દાવો કર્યો કે, ઘટનાનો વીડિયો પણ રેકોર્ડ કરવામાં આવ્યો હતો, પરંતુ તપાસ દરમિયાન આવા કોઈ ફૂટેજ નથી મળ્યા.
