Last Updated on by Sampurna Samachar
એન્કાઉન્ટરમાં એક જવાન વીરગતિ પામ્યો
ઘૂસણખોરી અને આતંકવાદી ગતિવિધિઓની ઝડપથી વધી રહી છે
(સંપૂર્ણ સમાચાર સેવા)
પહેલગામમાં થયેલા દુ:ખદ આતંકી હુમલાના થોડા દિવસો બાદ જમ્મુ અને કાશ્મીરના ઉધમપુર જિલ્લાના ડુડુ-બસંતગઢ વિસ્તારમાં સુરક્ષા દળો અને આતંકવાદીઓ વચ્ચે અથડામણ થઈ હતી. લેફ્ટનન્ટ કર્નલ સુનીલ બરટવાલે કહ્યું, “દુડુ-બસંતગઢ વિસ્તારમાં સુરક્ષા દળો અને આતંકવાદીઓ વચ્ચે ગોળીબાર ચાલુ છે. તેમણે કહ્યું કે એન્કાઉન્ટર સંબંધિત સંપૂર્ણ માહિતીની રાહ જોવાઈ રહી છે.
મળતી માહિતી મુજબ, પ્રારંભિક એન્કાઉન્ટરમાં એક જવાન વીરગતિ પામ્યો છે. એવું માનવામાં આવે છે કે આ આતંકવાદીઓ કદાચ એ જ મોટા જૂથનો ભાગ છે. જેણે તાજેતરમાં આંતરરાષ્ટ્રીય સરહદ પાર કરીને હીરાનગર સેક્ટરથી ભારતમાં પ્રવેશ કર્યો હતો. સાનિયાલ ગામ પાસેના ડોલકા જંગલમાં એક દંપતીની સતર્કતાને કારણે આ જૂથ પહેલીવાર ૨૩ માર્ચે જોવા મળ્યું હતું.
ત્રણ જૈશ-એ-મોહમ્મદના આતંકવાદીઓ માર્યા ગયા
આ પછી ૨૭ માર્ચે કઠુઆ જિલ્લાના જાખોલે ગામ પાસે સુફાન જંગલોમાં એન્કાઉન્ટરમાં બે આતંકવાદીઓ માર્યા ગયા હતા. એ જ રીતે, ૧૧-૧૨ એપ્રિલના રોજ, કિશ્તવાડ જિલ્લાના ચત્રુ વિસ્તારના નદગામ જંગલોમાં સેનાના વિશેષ ઓપરેશનમાં ત્રણ જૈશ-એ-મોહમ્મદના આતંકવાદીઓ માર્યા ગયા હતા.
આતંકવાદીઓએ જમ્મુ અને કાશ્મીરના પ્રખ્યાત પર્યટન સ્થળ પહેલગામ પર હુમલો કર્યો હતો, જેમાં ૨૬ પ્રવાસીઓ માર્યા ગયા હતા. આ હુમલાએ સમગ્ર દેશને હચમચાવી દીધો હતો અને સમગ્ર વિશ્વમાં તેની સખત નિંદા કરવામાં આવી હતી. હવે ઉધમપુરમાં આતંકવાદીઓની હાજરી અને એન્કાઉન્ટરથી એ સ્પષ્ટ થઈ રહ્યું છે કે ઘૂસણખોરી અને આતંકવાદી ગતિવિધિઓ ઝડપથી વધી રહી છે અને તેનો વ્યાપ પણ વધી શકે છે.
હાલમાં ડુડુ-બસંતગઢ વિસ્તારમાં વધારાના સુરક્ષા દળો મોકલવામાં આવ્યા છે અને સમગ્ર વિસ્તારને કોર્ડન કરી લેવામાં આવ્યો છે. સુરક્ષા દળોનું સર્ચ ઓપરેશન ચાલુ છે અને દરેક સ્તરે કડક તકેદારી રાખવામાં આવી રહી છે. સરકાર અને સુરક્ષા દળોની યોજનાઓ હવે આતંકવાદીઓના સમગ્ર નેટવર્કને ખતમ કરવા પર કેન્દ્રિત છે.
