Last Updated on by Sampurna Samachar
અમેરિકાની ૭૧ ઈમિગ્રેશન કોર્ટમાં લગભગ ૭૦૦ ઈમિગ્રેશન જજ
ટ્રમ્પના સત્તામાં આવ્યા બાદ ઇમિગ્રેશનમાં થયા ઘણાં ફેરફાર
(સંપૂર્ણ સમાચાર સેવા)
ટ્રમ્પ એડમિનિસ્ટ્રેશને ટેક્સાસમાં ફેડરલ ઈમિગ્રેશન કોર્ટમાંથી પાંચ જજને હાંકી કાઢ્યા છે. તેમનું પ્રતિનિધિત્વ કરતા એક યુનિયનના જણાવ્યા પ્રમાણે પાંચ જજની હકાલપટ્ટીથી હાલમાં કેસનો જે બેકલોગ છે તેમાં વધારો થશે.
ઈન્ટરનેશનલ ફેડરેશન ઓફ પ્રોફેશનલ એન્ડ ટેક્નિકલ એન્જિનિયર્સના જણાવ્યા પ્રમાણે જે પાંચ જજને કાઢી મૂકવામાં આવ્યા છે તેઓ હ્યુસ્ટન, લારેડો અને અલ પાસોની કોર્ટમાં કામ કરતા હતા. તેમાંથી ત્રણ એસોસિયેટ ચીફ જજ હતા જેઓ કોર્ટનું સંચાલન કરતા હતા અને પોલિસી લાગુ કરતા હતા. યુનિયનના જણાવ્યા પ્રમાણે તાજેતરના અઠવાડિયામાં યુએસ જસ્ટિસ ડિપાર્ટમેન્ટના એક્ઝિક્યુટિવ ઓફિસ ફોર ઈમિગ્રેશન રિવ્યુના ૨૮ કર્મચારીઓને દૂર કરવામાં આવ્યા છે જેમાં આ પાંચ જજનો સમાવેશ થાય છે. દેશની ૭૧ ઈમિગ્રેશન કોર્ટમાં લગભગ ૭૦૦ ઈમિગ્રેશન જજ છે.
ડોનાલ્ડ ટ્રમ્પની કાર્યવાહી
ટેક્સાસ ટિબ્યુને જે પાંચ જજને કાઢી મૂકવામાં આવ્યા છે તેમાંથી બે એસોસિયેટ ચીફ જજને ઓળખી કાઢ્યા છે અને આ બંને હ્યુસ્ટનના છે. જેમાં એક છે બ્રેન્ડન જેરોચ અને નોએલ શાર્પનો સમાવેશ થાય છે. આ બંને જજે પુષ્ટી કરી હતી કે તેમને તેમની સંબંધિત બેન્ચ પરથી દૂર કરી દેવામાં આવ્યા છે. જાેકે, તેમણે વધારે કંઈ કહેવાનો ઈનકાર કરી દીધો હતો.
બ્રેન્ડન જેરોચ ભૂતપૂર્વ આસિસ્ટન્ટ યુએસ એટર્ની અને ફેડરલ પબ્લિક ડિફેન્ડર છે. તેઓ સરકાર અને સૈન્યમાં બે દાયકાથી વધુનો અનુભવ ધરાવે છે. જ્યારે નોએલ શાર્પ ભૂતપૂર્વ ઈમિગ્રેશન લૉયર છે જે ઓછામાં ઓછા ૨૦૨૧થી બેન્ચ પર સેવા આપી રહ્યા હતા. ટ્રિબ્યુન દ્વારા એક્ઝિક્યુટિવ ઓફિસ ફોર ઈમિગ્રેશન રિવ્યૂમાંથી દેશભરમાંથી દૂર કરવામાં આવેલા તમામ જજની યાદી માંગી હતી, પરંતુ એક પ્રવક્તાએ તે વિશે કોઈ માહિતી આપવાનો ઈનકાર કર્યો હતો.
ડોનાલ્ડ ટ્રમ્પ પ્રેસિડેન્ટ બન્યા ત્યારથી અમેરિકામાંથી લાખો અનડોક્યુમેન્ટેડ ઈમિગ્રન્ટ્સને ડિપોર્ટ કરવાનું શરૂ કરી દીધું છે અને ત્યારબાદ દેશની ઈમિગ્રેશન કોર્ટમાં ફેરફારો કરવામાં આવી રહ્યા છે. ૨૦ જાન્યુઆરીએ ટ્રમ્પે શપથ ગ્રહણ કર્યા હતા અને ત્યારે તેમણે ઘણા એક્ઝિક્યુટિવ ઓર્ડર સાઈન કર્યા હતા જેના કારણે અમેરિકાની ઈમિગ્રેશન અને અસાયલમ સિસ્ટમને હચમચાવી દીધી છે અને તેના કારણે ઈમિગ્રન્ટ કોમ્યુનિટીમાં ડર અને ચિંતાનો માહોલ છે.
પરંતુ ઈન્ટરનેશનલ ફેડરેશન ઓફ પ્રોફેશનલ એન્ડ ટેકનિકલ એન્જિનિયર્સના પ્રેસિડેન્ટ મેટ બિગ્સે જણાવ્યું હતું કે, હાલમાં કોર્ટમાં રેકોર્ડ ૩.૬ મિલિયન ઈમિગ્રેશન કેસો પેન્ડિંગ છે અને તેથી જજીસને હટાવવાના ર્નિણયથી માસ ડિપોર્ટેશનના પ્રયાસોને કોઈ મદદ નહીં મળે. ફેડરલ ઈમિગ્રેશન જજીસ સામન્ય રીતે દર વર્ષે ૫૦૦થી ૭૦૦ કેસની સુનાવણી કરે છે. જજીસને હટાવીને ડોનાલ્ડ ટ્રમ્પ ફક્ત ઈમિગ્રેશન કેસોનો બેકલોગ વધારી રહ્યા છે.
લૉમેકર્સ, સરકારી વોચડોગ્સ અને રિસર્ચર્સ લાંબા સમયથી કહી રહ્યા છે કે દેશની ઈમિગ્રેશન કોર્ટ્સ કટોકટીનો સામનો કરી રહી છે. યુએસ ગવર્નમેન્ટ એકાઉન્ટેબિલિટી ઓફિસ દ્વારા જારી કરવામાં આવેલા ૨૦૨૩ના રિપોર્ટમાં જણાવવામાં આવ્યું હતું કે ૨૦૧૭થી ઈમિગ્રેશન કોર્ટમાં કેસનો બેકલોગ ત્રણ ગણાથી વધુ વધી ગયો છે.
ગવર્નમેન્ટ ઓવરસાઈટ એજન્સીએ અગાઉ ભલામણ કરી હતી કે ઈમિગ્રેશન કોર્ટ ઓફિસ એક સ્ટ્રેટેજિક વર્કફોર્સ પ્લાન બનાવે પરંતુ તેવું થયું ન હતું. બેકલોકગની અસરો વ્યાપક અને નોંધપાત્ર હોય છે. મહિલાઓ અને બાળકો સહિત ઘણા નોનસિટિઝન્સ તેમના કેસની સુનાવણી થાય તેની વર્ષોથી રાહ જાેઈ રહ્યા છે. ગત નાણાકિય વર્ષના અંતમાં બેકલોગ ચાર મિલિયન સુધી પહોંચી ગયા હતા.
ઉલ્લેખનીય છે કે, અમેરિકામાં જેમનો કોઈ રેકોર્ડ જ નથી તેવા અનડોક્યુમેન્ટેડ ઈમિગ્રન્ટ્સની સંખ્યા લાખોમાં હોવાનો અંદાજ છે, જેમાં ઘણાં ઈન્ડિયન્સનો પણ સમાવેશ થાય છે. ડોનાલ્ડ ટ્રમ્પ વાતો ભલે ૧.૪ કરોડ ઈલીગલ ઈમિગ્રન્ટ્સને ડિપોર્ટ કરવાની કરતા હોય પરંતુ, તેમની તેમની સરકાર પાસે પણ તેનો કોઈ ચોક્કસ આંકડો નથી.
હવે અમેરિકન સરકાર દેશમાં રહેતા એકેએક ઈલીગલ ઈમિગ્રન્ટનો રેકોર્ડ રાખવાની તૈયારી કરી રહી છે, જેમાં ૧૪ વર્ષ કે તેથી વધુ ઉંમર ધરાવતા તમામ ઈલીગલ ઈમિગ્રન્ટ્સના નામ-સરનામાં ઉપરાંત તેમની ફિંગરપ્રિન્ટ્સ પણ લેવામાં આવશે. ટ્રમ્પ એડમિનિસ્ટ્રેશને આ સપ્તાહે જ આ વિશે એક જાહેરાત કરતા જણાવ્યું હતું કે જે પણ અનડોક્યુમેન્ટેડ ઈમિગ્રન્ટ પોતાનું રજિસ્ટ્રેશન નહીં કરાવે તેની સામે ગુનો નોંધીને કાયદેસરની કાર્યવાહી કરવામાં આવશે.
અમેરિકામાં ઈલીગલી દાખલ થયેલા જે ઈમિગ્રન્ટ્સ બોર્ડર પર અરેસ્ટ થયા હતા તેમના રેકોર્ડ અને બાયોમેટ્રિક્સ સરકાર પાસે છે પરંતુ, જે લોકો બોર્ડર પર પકડાયા વિના જ અમેરિકા આવ્યા છે અને જે લોકો વિઝિટર વિઝા કે પછી બીજા કોઈ વિઝા પર યુએસ આવ્યા બાદ ઓવરસ્ટે થઈ ગયા છે તેમને પોતાનું રજિસ્ટ્રેશન કરાવીને સરકારને જણાવવું પડશે કે તેઓ યુએસમાં કોઈ સ્ટેટસ વિના રહે છે. એવું માનવામાં આવી રહ્યું છે કે ટ્રમ્પ સરકારનો આ પ્લાન લાખો ઈલીગલ ઈમિગ્રન્ટ્સને એક્સપોઝ કરી દેશે અને તેમાંથી ઘણાને સામે ચાલીને અમેરિકા છોડવાની ફરજ પડશે.
