આ સન્માન ન્યૂયોર્ક સાથેના બગડતા સંબંધોના ઇતિહાસમાં એક નવો અધ્યાય
(સંપૂર્ણ સમાચાર સેવા)
ડોનાલ્ડ ટ્રમ્પ લગભગ છ મહિના પહેલા લોઅર મેનહટનની એક કોર્ટમાં બેઠા હતા અને આ દરમિયાન જ્યુરી દ્વારા આપવામાં આવેલા ર્નિણયે તેમની એક નવી ઓળખ બનાવી હતી. તેઓ ગુનામાં દોષિત ઠરનાર પ્રથમ અમેરિકી રાષ્ટ્રપતિ બન્યા છે. ટ્રમ્પ હવે આ કોર્ટથી થોડે દૂર આવેલા ન્યૂયોર્ક સ્ટોક એક્સચેન્જ ખાતે ઘંટ વગાડીને સત્રની શરૂઆત કરશે અને તેમને ટાઈમ મેગેઝિન દ્વારા ‘પર્સન ઑફ ધ યર’નો પુરસ્કાર આપવામાં આવશે.
બિઝનેસમેનમાંથી રાજકારણી બનેલા ટ્રમ્પ માટે આ સન્માન ન્યૂયોર્ક સાથેના તેમના બગડતા સંબંધોના ઇતિહાસમાં એક નવો અધ્યાય છે. તે ટ્રમ્પ માટે મજબૂત પુનરાગમન પણ દર્શાવે છે, જેમણે ચાર વર્ષ પહેલાં રાષ્ટ્રપતિની ચૂંટણીમાં તેમની હાર સ્વીકારવાનો ઇનકાર કર્યો હતો. નવેમ્બરમાં રાષ્ટ્રપતિની ચૂંટણી જીત્યા બાદ ટ્રમ્પ વ્હાઇટ હાઉસ પરત ફર્યા છે. ટ્રમ્પના સમયપત્રકની જાણકારી ધરાવતા ચાર લોકોના જણાવ્યા અનુસાર, ટ્રમ્પ દિવસના ટ્રેડિંગની ઔપચારિક શરૂઆત માટે વોલ સ્ટ્રીટની મુલાકાત લઈ શકે છે. તે જ સમયે, વિકાસથી વાકેફ એક વ્યક્તિએ કહ્યું કે, ગુરુવારે ટ્રમ્પને ૨૦૨૪ માટે ‘પર્સન ઑફ ધ યર’ જાહેર કરવામાં આવશે. નામ જાહેર ન કરવાની શરતે આ લોકોએ ‘એસોસિએટેડ પ્રેસ’ને ટ્રમ્પની ન્યૂયોર્ક સ્ટોક એક્સચેન્જની મુલાકાત અને ટાઈમ એવોર્ડની રજૂઆત વિશે માહિતી આપી હતી.
૨૦૧૬માં પહેલીવાર વ્હાઇટ હાઉસમાં ચૂંટાયા પછી પણ ટ્રમ્પને ટાઇમ દ્વારા ‘પર્સન ઑફ ધ યર’ જાહેર કરવામાં આવ્યા હતા. આ વર્ષના પુરસ્કાર માટે ટાઇમ મેગેઝિન દ્વારા સૂચિબદ્ધ ફાઇનલિસ્ટમાં ટ્રમ્પનો સમાવેશ વાઇસ પ્રેસિડેન્ટ કમલા હેરિસ, સોશિયલ મીડિયા પ્લેટફોર્મ ‘ઠ’ના માલિક ઇલોન મસ્ક, ઇઝરાયેલના વડા પ્રધાન બેન્જામિન નેતન્યાહૂ અને પ્રિન્સેસ ઑફ વેલ્સ કેટ સાથે કરવામાં આવ્યો હતો. ટાઇમ મેગેઝિને એવોર્ડની જાહેરાત પહેલા ટ્રમ્પની પસંદગીની પુષ્ટિ કરવાનો ઇનકાર કર્યો હતો.
