મતદાન કેન્દ્રો પર ખોટા વોટ કર્યાના ભાજપે લગાવ્યો આરોપ
(સંપૂર્ણ સમાચાર સેવા)
દિલ્હીમાં વિધાનસભા ચૂંટણીમાં મતદાનની સાથે કેટલીક જગ્યાઓ પર બબાલ થયાના સમાચાર મળ્યા હતા. વાત કરીએ તો સીલમપુર, જંગપુરા અને ગ્રેટર કૈલાશમાં વહીવટીતંત્ર અને નેતાઓ વચ્ચે માથાકૂટ જોવા મળી રહી હતી. સીલમપુરમાં બુરખામાં મતદાનને લઈને હંગામો થયો હતો.જેમાં ભાજપે આરોપ લગાવ્યો હતો કે બુરખાની આડમાં ખોટા વોટ નાખવામાં આવી રહ્યા છે.
હંગામો એટલો વધી ગયો કે ભાજપ અને કોંગ્રેસના કાર્યકરો સામસામે આવી ગયા. ભાજપનો આરોપ છે કે બ્રહ્મપુરીની આર્યન પબ્લિક સ્કૂલમાં બનેલા બૂથ પર નકલી મતદાન થઈ રહ્યું છે. સ્થિતિને કાબુમાં લેવા માટે ભારે પોલીસ બંદોબસ્ત ગોઠવી દેવામાં આવ્યો છે.
દિલ્હી પોલીસે બાદમાં કહ્યું કે નકલી મત આપવાનો આરોપ સાબિત થયો નથી અને કહ્યું કે બુરખાને હટાવીને બૂથ પર ચેકિંગ કરવામાં આવી રહ્યું છે. ત્યારે ગ્રેટર કૈલાશમાં આપ ઉમેદવાર સૌરભ ભારદ્વાજે પોલીસ પર મોટા આરોપો લગાવ્યા છે. સૌરભનો આરોપ છે કે લોકોને વોટ આપવા આવતા રોકવામાં આવી રહ્યા છે. ભારદ્વાજે આરોપ લગાવ્યો કે પોલીસે રોડ પર બેરિકેડ લગાવી દીધા છે જેના કારણે લોકોને આવવામાં ઘણી મુશ્કેલીનો સામનો કરવો પડી રહ્યો છે.
આ બાબતે સૌરભ ભારદ્વાજે પોલીસ સાથે બોલાચાલી કરી હતી. બીજી તરફ સૌરભ ભારદ્વાજના આરોપ પર પોલીસનું કહેવું છે કે તેઓ નિયમ પ્રમાણે કામ કરી રહ્યા છે. પોલીસે કહ્યું કે ચૂંટણી પંચના નિર્દેશો અનુસાર બધું કરવામાં આવી રહ્યું છે, કારણ કે માર્ગદર્શિકાનું પાલન કરવું જરૂરી છે.
આપ નેતા મનીષ સિસોદિયાની સીટ જંગપુરા પર પણ વિવાદના સમાચાર છે. જંગપુરા વિસ્તારના સરાય કાલે ખાનમાં પોલીસ અને સિસોદિયા વચ્ચે બોલાચાલી થઈ હતી. વાસ્તવમાં સિસોદિયાએ બીજેપી પર પૈસાની વહેંચણીનો આરોપ લગાવ્યો, ત્યારપછી બીજેપી અને આપ કાર્યકર્તાઓ સામસામે આવી ગયા હતા. આ દરમિયાન સિસોદિયા વિરુદ્ધ સૂત્રોચ્ચાર પણ કરવામાં આવ્યા હતા
