Last Updated on by Sampurna Samachar
રેલવે સ્ટેશન પાસે ૧.૮૦ કરોડના ખર્ચે બનશે હાઈટેક સિટી બસ પોર્ટ
માત્ર બસો ઊભી રાખવાની જ નહીં, પરંતુ મુસાફરોને સુવિધાસભર અનુભવ મળે તે માટે પણ આ પ્રોજેક્ટમાં વિશેષ ધ્યાન આપવામાં આવ્યું છે
(સંપૂર્ણ સમાચાર સેવા)
નવસારી મહાનગરપાલિકા શહેરના આધુનિકીકરણ અને નાગરિકોને વધુ સુવિધાસભર જાહેર પરિવહન ઉપલબ્ધ કરાવવા માટે સતત પ્રયત્નશીલ રહી છે. શહેરના વિકાસને નવી દિશા આપવા માટે હવે એક વધુ મહત્વાકાંક્ષી અને જનહિતકારક પ્રોજેક્ટનો આરંભ કરવામાં આવ્યો છે. નવસારી રેલવે સ્ટેશન જેવા વ્યસ્ત અને જનસંચારથી ભરપૂર વિસ્તારમાં આશરે રૂપિયા ૧.૮૦ કરોડના ખર્ચે અત્યાધુનિક સિટી બસ પોર્ટ (ટર્મિનલ) તૈયાર કરવાનો ર્નિણય લેવામાં આવ્યો છે.
આ પ્રોજેક્ટ માત્ર પરિવહન સુવિધાઓમાં વધારો નહીં કરે, પરંતુ સમગ્ર શહેરના ટ્રાફિક મેનેજમેન્ટ અને શહેરી સૌંદર્યમાં પણ નોંધપાત્ર યોગદાન આપશે.રોજબરોજ નવસારી રેલવે સ્ટેશન ખાતે હજારો લોકોની અવરજવર રહે છે. શહેર તથા આસપાસના વિસ્તારોમાંથી આવતા મુસાફરો માટે રેલ્વે સ્ટેશન એક મહત્વનું કેન્દ્ર બન્યું છે. આવી સ્થિતિમાં મુસાફરોને બસ સુવિધા સરળતાથી, એક જ સ્થળે અને વધુ સગવડ સાથે મળી રહે તે માટે સિટી બસ પોર્ટની કલ્પના કરવામાં આવી છે.
નવસારી શહેર વિકાસના નકશા પર વધુ મજબૂત રીતે ઉભરી આવશે
આ પ્રોજેક્ટ સાકાર બન્યા બાદ રેલવે સ્ટેશનથી શહેરના વિવિધ વિસ્તારો તેમજ નજીકના વિસ્તારોમાં જવા માટેના મુસાફરોને સરળ, સુવ્યવસ્થિત અને આરામદાયક જાહેર પરિવહનનો લાભ મળશે.તંત્ર દ્વારા આપવામાં આવેલી માહિતી મુજબ, આ પ્રસ્તાવિત સિટી બસ પોર્ટમાં એકસાથે ૧૦ બસો ઊભી રહી શકે તેવી આધુનિક બસ બેઝ ઉભી કરવામાં આવશે.
બસોના નિયમિત આગમન-ર્નિગમનને ધ્યાનમાં રાખીને તેની રચના એવી રીતે કરવામાં આવશે કે મુસાફરોને કોઈ ગૂંચવણ ન રહે અને ટ્રાફિકનું દબાણ પણ ઘટે. ખાસ કરીને રેલ્વે સ્ટેશન જેવા સંવેદનશીલ અને વ્યસ્ત વિસ્તારમાં બસો માટે અલગ અને સુનિયોજિત જગ્યા ઉપલબ્ધ થવાથી માર્ગવ્યવહાર વધુ શિસ્તબદ્ધ બનશે.
માત્ર બસો ઊભી રાખવાની જ નહીં, પરંતુ મુસાફરોને સુવિધાસભર અનુભવ મળે તે માટે પણ આ પ્રોજેક્ટમાં વિશેષ ધ્યાન આપવામાં આવ્યું છે. સિટી બસ પોર્ટમાં અદ્યતન ટિકિટ વિન્ડો, આરામદાયક વેટિંગ એરિયા, બેઠકોની વ્યવસ્થા, તેમજ મુસાફરોને સુરક્ષિત રીતે અવરજવર કરી શકે તેવા માર્ગોનું આયોજન કરવામાં આવશે. મુસાફરોને લાંબા સમય સુધી બસની રાહ જોવી પડે ત્યારે તેમને અસુવિધા ન થાય અને ગરમી, વરસાદ કે ભીડ વચ્ચે પણ રાહત મળે તે માટે આ ટર્મિનલને સંપૂર્ણ સુવ્યવસ્થિત રીતે ડિઝાઇન કરાશે.
આ સમગ્ર બસ પોર્ટની રચનામાં મુસાફરોની સુરક્ષા, સુગમતા અને આધુનિકતાને કેન્દ્રસ્થાને રાખવામાં આવી છે. શહેરી પરિવહનનું કેન્દ્ર હોવા છતાં તે માત્ર વ્યવહારુ જ નહીં, પરંતુ દેખાવમાં પણ આકર્ષક બને તે માટે મહાનગરપાલિકા તરફથી વિશેષ આયોજન કરવામાં આવ્યું છે.
ટર્મિનલ પરિસરમાં મોડર્ન સ્કલ્પચર્સ, લેન્ડસ્કેપિંગ, હરિયાળી અને સુશોભન કામ પણ હાથ ધરાશે. પરિણામે આ બસ પોર્ટ માત્ર મુસાફરો માટેનો પરિવહન કેન્દ્ર નહીં રહે, પરંતુ શહેરની નવી ઓળખ અને વિકાસની પ્રતિમૂર્તિ તરીકે પણ ઉભરશે.
આ પ્રોજેક્ટનો સૌથી મોટો ફાયદો ટ્રાફિક વ્યવસ્થામાં જોવા મળશે. હાલ રેલવે સ્ટેશન આસપાસ બસો, ઓટોરિક્ષા, ખાનગી વાહનો અને મુસાફરોની અવરજવરથી ઘણીવાર અવ્યવસ્થા સર્જાય છે. સિટી બસ પોર્ટ બન્યા બાદ બસોની અવરજવર માટે અલગ અને નિર્ધારિત જગ્યા ઉપલબ્ધ થશે, જેના કારણે માર્ગો પરનો દબાણ ઘટશે અને સમગ્ર વિસ્તાર વધુ વ્યવસ્થિત બનશે.
ખાસ કરીને રોજિંદા મુસાફરો, નોકરીયાત લોકો, વિદ્યાર્થીઓ અને વેપારીઓ માટે આ નવી સુવિધા આશીર્વાદરૂપ સાબિત થવાની છે.આ વર્ષની અંત સુધીમાં નવસારીની જનતા માટે આ સિટી બસ પોર્ટ કાર્યરત બની શકે છે. આમ, આવનારા સમયમાં નવસારીના નાગરિકોને જાહેર પરિવહનનો એક નવો, સુવિધાસભર અને આધુનિક અનુભવ મળશે. સ્વચ્છ, સુવ્યવસ્થિત અને આધુનિક શહેર બનાવવાની દિશામાં આ પ્રોજેક્ટને એક મહત્વપૂર્ણ કડી તરીકે જાેવામાં આવી રહ્યો છે.
સિટી બસ પોર્ટ નવસારી માટે માત્ર એક ઇન્ફ્રાસ્ટ્રક્ચર પ્રોજેક્ટ નથી, પરંતુ શહેરના વિકસતા ચહેરાને વધુ મજબૂત બનાવતો અને નાગરિકોની જરૂરિયાતોને સમજતો એક દુરંદેશી પ્રયાસ છે. જાહેર પરિવહન ક્ષેત્રે આ પહેલ સફળ સાબિત થશે તો નવસારી શહેર વિકાસના નકશા પર વધુ મજબૂત રીતે ઉભરી આવશે.
