દલિત વિદ્યાર્થીનીને પીરિયડ્સ આવતા તેને સીડી પર બેસાડી

Last Updated on 12/04/2025 by Sampurna Samachar

 સ્કૂલમાં દલિત વિદ્યાર્થિની સાથે ભેદભાવનો મામલો સામે આવ્યો

સ્કૂલની સામે વિભાગીય તપાસ કરવામાં આવી

(સંપૂર્ણ સમાચાર સેવા)

તમિલનાડુના કોઈમ્બતુરમાં એક ખાનગી સ્કૂલમાં દલિત વિદ્યાર્થિની સાથે ભેદભાવનો મામલો સામે આવ્યો છે. શાળામાં અભ્યાસ કરતી આઠમાં ધોરણની વિદ્યાર્થિનીને ક્લાસની બહાર સીઢી પર પરીક્ષા આપવા માટે મજબૂર કરવામાં આવી હતી. કારણ કે, તેને પહેલીવાર પીરિયડ્સ આવ્યા હતાં.

આ ઘટના બાદ આચાર્યને બરતરફ કરી દેવામાં આવ્યા છે. સ્કૂલ પરિસરની સીડી પર પરીક્ષા આપતી વિદ્યાર્થિનીનો વીડિયો વાઈરલ થયા બાદ, પોલાચીના અધિક પોલીસ અધિક્ષક સૃષ્ટિ સિંહના નેતૃત્વમાં પોલીસ ટીમે આ મામલે તપાસ હાથ ધરી હતી.

આચાર્યને બરતરફ કરી દેવામાં આવ્યો

વીડિયો વાઈરલ થયા બાદ સ્કૂલ શિક્ષણ વિભાગના અધિકારીઓએ જિલ્લાના પોલાચીના સેંગુટ્ટઈપલાયમ સ્થિત સ્કૂલના મેનેજમેન્ટ સ્પષ્ટીકરણ માંગ્યું હતું. શિક્ષણ મંત્રી અંબિલ મહેશ પોય્યામોઝીએ જણાવ્યું કે, સ્કૂલની સામે વિભાગીય તપાસ કરવામાં આવી છે અને આચાર્યને બરતરફ કરી દેવામાં આવ્યો છે. સોશિયલ મીડિયા પ્લેટફોર્મ એક્સ પર મંત્રીએ કહ્યું કે, બાળકો પર કોઈપણ પ્રકારના અત્યાચાર સહન કરવામાં નહીં આવે.

વિદ્યાર્થિનીના પિતાએ જણાવ્યું કે, અમને શાળામાંથી પરીક્ષા માટે અલગ ટેબલ અને ખુરશીની વ્યવસ્થા કરવાનું કહેવામાં આવ્યું હતું. પરંતુ, શાળા તરફથી વ્યવસ્થા કરવામાં ન આવી અને અમારી દીકરીને ક્લાસની બહાર સીડી પર બેસીને લખવાનું કહેવામાં આવ્યું. વિદ્યાર્થિની સતત બે કલાકથી વધુ સીડી પર બેઠી. આ દરમિયાન તેને સખત પેટમાં પણ દુખી રહ્યું હતું.