Last Updated on by Sampurna Samachar
કોંગ્રેસ નેતાએ રોહિત શર્માની કેપ્ટન્સીને દેશના ઈતિહાસમાં સૌથી ખરાબ પણ ગણાવી
વિવાદ વધતાં નેતાએ પોતાનો બચાવ કર્યો
(સંપૂર્ણ સમાચાર સેવા)
રોહિત શર્માએ રનો અને સદીઓનો વરસાદ કરીને ભારતને અનેક ઐતિહાસિક જીત અપાવી છે. કેપ્ટન તરીકે રોહિત શર્માએ અનેક સફળતાઓ મેળવી છે. રોહિત શર્માએ ભારતને ૨૦૨૪ ટી૨૦ વર્લ્ડ કપ પણ અપાવ્યો છે. રોહિત (SHARMA) શર્માની કેપ્ટન્સી હેઠળ ભારત ૨૦૨૩ વનડે વર્લ્ડ કપમાં રનર અપ રહ્યું હતું. હાલના સમયમાં રોહિત શર્માની કેપ્ટન્સીવાળી ટીમ ઈન્ડિયાએ ICC ચેમ્પિયન્સ ટ્રોફી ૨૦૨૫ની સેમીફાઈનલમાં જગ્યા મેળવી લીધી છે. હવે તે ખિતાબની પ્રબળ દાવેદાર છે.
આ બધા વચ્ચે કોંગ્રેસ નેતા શમા મોહમ્મદે ભારતીય ક્રિકેટ ટીમના કેપ્ટન રોહિત શર્મા પર એક વિવાદિત ટિપ્પણી કરી નાખતા હંગામો મચી ગયો છે. કોંગ્રેસ નેતાએ રોહિત શર્માની બોડી શેમિંગ કરતા તેને મોટો કહી નાખ્યો છે. ફક્ત એટલું જ નહીં કોંગ્રેસ નેતા શમા મોહમ્મદે રોહિત શર્માની કેપ્ટન્સીને દેશના ઈતિહાસમાં સૌથી ખરાબ પણ ગણાવી દીધી. આ સાથે જ તેમણે રોહિતને વજન ઘટાડવાની સલાહ પણ આપી દીધી. શમા મોહ્મદે એક્સ પર પોસ્ટ કરીને લખ્યુ હતું કે ‘રોહિત એક ખેલાડી તરીકે મોટો (જાડો) છે. વજન ઘટાડવાની જરૂર છે. અને હા, ભારતનો અત્યાર સુધીનો સૌથી નિરાશાજનક કેપ્ટન.’
ભાજપ નેતાએ કર્યા આકરા પ્રહારો
કોંગ્રેસ નેતા શમા મોહમ્મદની આ કમેન્ટની ભારે ટીકા થઈ રહી છે. વિવાદ વધતા શમા મોહમ્મદે આ પોસ્ટ ડિલીટ કરવી પડી. જોકે ત્યાં સુધીમાં ઘણું મોડું થઈ ચૂક્યું હતું અને હવે તેની પોસ્ટનો સ્ક્રીન શોટ વાયરલ થઈ રહ્યો છે. આ ઘટના બાદ ભાજપના નેતા રાધિકા ખેડાએ કોંગ્રેસ નેતા શમા મોહમ્મદ પર આકરા પ્રહારો કર્યા છે. કોંગ્રેસથી નાતો તોડીને ભાજપમાં જોડાનારા રાધિકા ખેડાએ પોતાની પૂર્વ પાર્ટી પર ‘દાયકાઓ સુધી એથલિટોનું અપમાન’ કરવાનો આરોપ લગાવ્યો છે.
કોંગ્રેસ અને શમા મોહમ્મદ પર આકરા પ્રહારો કરતા રાધિકા ખેડાએ એક્સ પર લખ્યું કે આ એ જ કોંગ્રેસ છે જેણે દાયકાઓ સુધી એથલિટોનું અપમાન કર્યું. તેમને માન્યતા આપવાની ના પાડી અને હવે એક ક્રિકેટના દિગ્ગજની મજાક ઉડાવવાની હિંમત કરી રહ્યા છે.? ભાઈ-ભત્રીજાવાદ પર જીવતી પાર્ટી એક ચેમ્પિયનને ઉપદેશ આપી રહી છે? રાધિકા ખેડાએ રાહુલ ગાંધીની આકરી ટીકા કરતા કહ્યું કે રોહિત શર્માએ ભારતને વર્લ્ડ કપમાં જીત અપાવી, પરંતુ કોંગ્રેસ નેતા પોતાની પાર્ટીને કોઈ પણ ઉથલપાથલ વગર સંભાળવા માટે સંઘર્ષ કરતા રહ્યા.
રાધિકા ખેડાએ જયરામ રમેશ ઉપર પણ કટાક્ષ કર્યો અને તેમને આગ્રહ કર્યો કે તેઓ ભારતને ગૌરવ અપાવનારા ક્રિકેટર પર નિશાન સાધવાની જગ્યાએ કોંગ્રેસ પાર્ટીની ઘટતી પ્રાસંગિકતા, વિશ્વસનીયતા અને ચૂંટણી સ્થિતિ પર ધ્યાન આપે. રાધિકા ખેડાએ કહ્યું કે, કોંગ્રેસે ભારતના ગૌરવ પર સસ્તા પ્રહાર કરતા પહેલા પોતાના ડૂબતા વંશ વિશે ચિંતા કરવી જોઈએ.
વિવાદ વધી જતા શમા મોહમ્મદે રોહિત શર્મા પર પોતાની ટિપ્પણીનો બચાવ કરતા કહ્યું કે તેમની ટ્વીટ એથલિટની ફિટનેસ વિશે એક સામાન્ય ટિપ્પણી હતી, બોડી શેમિંગનું ઉદાહરણ નહીં. આલોચકોને જવાબ આપતા તેમણે કહ્યું કે, આ બોડી શેમિંગ નહતું. મારું હંમેશાથી માનવું છે કે ખેલાડીએ ફિટ રહેવું જોઈએ અને મને લાગ્યું કે તેમનું (રોહિત શર્મા) વજન થોડું વધુ છે. આથી મે બસ આ અંગે ટ્વીટ કર્યું.
ભાજપ નેતા પ્રદીપ ભંડારીએ પણ કહ્યું કે, “કોંગ્રેસ પાર્ટી એ સંદેશો આપવાની કોશિશ કરે છે કે જે પણ દેશભક્ત દેશ માટે સારું કરશે, કોંગ્રેસ તેનો વિરોધ કરશે. તેમને એ વાતથી સમસ્યા છે કે રોહિત શર્મા અને ભારતીય ટીમના કેપ્ટને દેશ માટે સારું કર્યું અને ન્યૂઝીલેન્ડને હરાવ્યું. આ પણ કોંગ્રેસ પાર્ટીની દેશભક્તિ પર સવાલ ઉઠાવે છે. હવે તે ભારતના લોકો સમક્ષ પૂરી રીતે સ્પષ્ટ છે કે જે ભારતનું સમર્થન કરે છે, દેશભક્ત છે જે ભારત માટે સારું કરે છે, તેનો કોંગ્રેસ પાર્ટી વિરોધ કરશે. જે દેશ વિરુદ્ધ બોલશે તેનું સમર્થન કરવામાં આવશે. “
