Last Updated on by Sampurna Samachar
ચૂંટણી પંચે મતદારોને યુનિક EPIC નંબર ફાળવવાનો લીધો નિર્ણય
નકલી મતદારોને ઓનલાઈન ઉમેરવામાં આવ્યા
(સંપૂર્ણ સમાચાર સેવા)
પશ્ચિમ બંગાળના મુખ્યમંત્રી મમતા બેનર્જી (MAMTA BENERJEE) એ તાજેતરમાં બે રાજ્યોમાં એક સરખા વોટર આઈડી નંબરનો મુદ્દો ઉઠાવ્યો હતો. તેની મદદથી તેમણે ચૂંટણી પંચ પર ભાજપ માટે નકલી મતદારો બનાવવાનો પણ આરોપ લગાવ્યો. હવે આ મામલે ચૂંટણી પંચનો જવાબ આવ્યો છે.
ચૂંટણી પંચનું કહેવું છે કે, એક જેવા વોટર આઈડી નંબરનો અર્થ એ નથી કે મતદાર ફર્જી છે. આયોગે કહ્યું, કેટલાક મતદારો પાસે સમાન મતદાર ફોટો ઓળખ કાર્ડ (EPIC) નંબર હોઈ શકે છે, પરંતુ તેમની વસ્તી વિષયક વિગતો, વિધાનસભા મતવિસ્તાર અને મતદાન મથકની માહિતી અલગ હશે.
મતદારોને લઇ EPIC નંબર પર શંકા
એક જેવા EPIC નંબર હોવા છતાં કોઈપણ મતદાર ફક્ત તેમના સંબંધિત મતવિસ્તારમાં નિયુક્ત મતદાન મથક પર જ મતદાન કરી શકે છે, જ્યાં તેમનું નામ મતદાર યાદીમાં નોંધાયેલ હોય. આ સિવાય તે બીજે ક્યાંય મતદાન કરી શકશે નહીં.
ચૂંટણી પંચે સ્પષ્ટતા કરતાં કહ્યું કે, આ ડુપ્લિકેશન રાજ્યોના મતદાર યાદી ડેટાબેઝને પ્લેટફોર્મ પર ખસેડવામાં આવે તે પહેલાં અનુસરવામાં આવતી વિકેન્દ્રિત અને મેન્યુઅલ સિસ્ટમને કારણે હતું. કેટલાક રાજ્યના મુખ્ય ચૂંટણી કમિશનર કાર્યાલયોએ સમાન આલ્ફાન્યૂમેરિક સીરીઝનો ઉપયોગ કર્યો હતો, જેના કારણે વિવિધ રાજ્યોના કેટલાક વિધાનસભા મતવિસ્તારોમાં મતદારોને ડુપ્લિકેટ EPIC નંબરો ફાળવવામાં આવ્યા હોવાની શક્યતા ઊભી થઈ હતી.
જોકે, ચૂંટણી પંચે હવે આવા મતદારોને યુનિક EPIC નંબર ફાળવવાનું સુનિશ્ચિત કરવાનો ર્નિણય લીધો છે. ડુપ્લિકેટ EPIC નંબરના દરેક કિસ્સામાં એક અનન્ય EPIC નંબર ફાળવીને સુધારો કરવામાં આવશે. પશ્ચિમ બંગાળના મુખ્યમંત્રી મમતા બેનર્જીએ EPIC નંબરોમાં ડુપ્લિકેશનનો ઉલ્લેખ કરીને ભાજપ પર ચૂંટણી પંચ સાથે સાંઠગાંઠ કરીને આવતા વર્ષે બંગાળ વિધાનસભાની ચૂંટણી પહેલા રાજ્યની મતદાર યાદીમાં નકલી મતદારો ઉમેરવાનો આરોપ લગાવ્યો હતો.
તેમણે કહ્યું હતું કે, મારી પાસે પશ્ચિમ બંગાળના તમામ જિલ્લાઓમાંથી પુરાવા છે. પશ્ચિમ બંગાળના રહેવાસીઓ સાથે હરિયાણા અને ગુજરાતના લોકોના નામ એક જ EPIC નંબર હેઠળ જોવા મળી રહ્યો છે. નકલી મતદારોને ઓનલાઈન ઉમેરવામાં આવ્યા છે.
